ARYNews.tv | Urdu – Har Lamha Bakhabar

Tag: sindh police

  • سندھ اسمبلی میں پولیس کو خراج تحسین پیش کرنے کی قرارداد منظور

    سندھ اسمبلی میں پولیس کو خراج تحسین پیش کرنے کی قرارداد منظور

    کراچی: سندھ اسمبلی اجلاس میں پولیس کو خراج تحسین پیش کرنے کی قرارداد متفقہ طور پر منظور کرلی گئی۔

    اے آر وائی نیوز کی رپورٹ کے مطابق سندھ اسمبلی اجلاس کے دوران پیپلزپارٹی کے رہنما ڈاکٹر سہراب سرکی نے سندھ پولیس کو خراج تحسین پیش کرنے کی قرارداد پیش کی جسے متفقہ طور پر منظور کرلیا گیا۔

    قرارداد کے متن کے مطابق 18 اکتوبر کو آئی جی سندھ مشتاق مہر کے ساتھ پیش آنے والا واقعہ افسوسناک ہے، آئی جی کے ساتھ جو واقعہ پیش آیا اس کی جتنی مذمت کی جائے کم ہے۔

    قرارداد کے متن میں کہا گیا کہ اس طرح کی حرکتیں ملک کے ساتھ درست نہیں، ہم نے پاکستان کے لیے ووٹ دیا، ہم اداروں کو مضبوط دیکھنا چاہتے ہیں۔

    پیپلزپارٹی رہنما ڈاکٹر سہراب سرکی کی جانب سے پیش کردہ قرارداد متفقہ طور پر منظور کرلی گئی۔

    مولانا عادل کی شہادت، پی ٹی آئی نے مذمتی قرارداد جمع کروادی

    دوسری جانب سندھ اسمبلی میں تحریک انصاف کی جانب سے مولانا عادل کی شہادت پر مذمتی قرارداد جمع کروادی گئی۔

    قرارداد رکن سندھ اسمبلی سعید آفریدی، رابستان خان نے جمع کروائی، قرارداد کے متن کے مطابق ایوان مولانا عادل خان کی شہادت کی شدید مذمت کرتا ہے۔

    قرارداد میں کہا گیا کہ مولانا عادل کی علمی و ادبی خدمات کو ہمیشہ یاد رکھا جائے گا، سندھ حکومت مولانا عادل کے قاتلوں کو جلد از جلد گرفتار کرے۔

  • سندھ پولیس نے کیپٹن(ر)صفدر کی گرفتاری سے متعلق اپنا ٹوئٹ ڈلیٹ کردیا

    سندھ پولیس نے کیپٹن(ر)صفدر کی گرفتاری سے متعلق اپنا ٹوئٹ ڈلیٹ کردیا

    کراچی : سندھ پولیس نے کیپٹن(ر)صفدر کی گرفتاری سے متعلق اپنا ٹوئٹ ڈلیٹ کردیا، ٹوئٹ میں کہا گیا تھا کہ کیپٹن(ر) صفدر کیخلاف کارروائی قانون کے مطابق کی گئی۔

    تفصیلات کے مطابق سندھ پولیس نےکیپٹن(ر)صفدرکی گرفتاری سےمتعلق اپناٹوئٹ ڈلیٹ کردیا ،ٹوئٹ 35 منٹ بعد ڈلیٹ کیا گیا ، ٹوئٹ میں کہا گیا تھا کہ کیپٹن(ر) صفدر کیخلاف کارروائی قانون کے مطابق کی گئی، سندھ پولیس کی جانب سے پہلی مرتبہ ٹوئٹر پر خبرجاری کی گئی تھی۔

    اس سے قبل وزیراعلیٰ ہاؤس میں کیپٹن (ر)صفدر کی گرفتاری پر اہم اجلاس ہوا تھا ، جس میں آئی جی سندھ، ایڈیشنل آئی جی، پراسیکیوٹرجنرل،سیکریٹری قانون شریک تھے۔

    ذرائع کے مطابق وزیراعلیٰ سندھ مرادعلی شاہ نے کیپٹن(ر)صفدر کے کیس پربریفنگ لی اور قانون کے مطابق کارروائی کیلئےافسران کو احکامات جاری کئے اور کہا وزیراعلیٰ ہاؤس میں میٹنگ پر ترجمان اپنا مؤقف نہیں دے رہے۔

    یاد رہے پیپلزپارٹی کےصوبائی وزیر سعیدغنی نے کیپٹن صفدر کی گرفتاری پر مریم نواز کے ٹوئٹ کا جواب دیتے ہوئے الزام کراچی پولیس پرڈال دیا تھا اور کہا تھا کہ مزارقائدپرکیپٹن صفدرنےجوکچھ کیاوہ نامناسب تھا، جس اندازمیں کراچی پولیس نےگرفتاری کی وہ قابل مذمت ہے۔

    سعیدغنی کا کہنا تھا کہ کیپٹن صفدرکی گرفتاری سندھ حکومت کی ہدایات پرنہیں ہوئی، پولیس کااقدام پی ڈی ایم جماعتوں میں خلیج پیداکرنےکی سازش کاحصہ ہے، پاکستان ڈیموکریٹک موومنٹ میں خلیج پیدا کرنے کے اقدام کو ہم ناکام بنائیں گے۔

    واضح رہے مزارقائد تقدس پامالی کیس میں کیپٹن(ر)صفدر کو گرفتار کر لیا گیا تھا ، کیپٹن(ر)صفدرکی گرفتاری نجی ہوٹل سےعمل میں لائی گئی تھی۔

    مزار قائد کے تقدس کی پامالی کامقدمہ وقاص احمد نامی شہری کی مدعیت میں مریم نواز اور کیپٹن ریٹائرڈ صفدر سمیت دو سو نامعلوم افراد کیخلاف بریگیڈ تھانے میں درج کیا گیا تھا، مقدمے میں قائداعظم مزار آرڈیننس کی خلاف ورزی جان سے مارنے اور ہنگامہ آرائی کی دفعات شامل کی گئی۔

  • سندھ پولیس کے 3 ہزار سے زائد اہلکار کرونا وائرس سے متاثر ہوئے: ترجمان

    سندھ پولیس کے 3 ہزار سے زائد اہلکار کرونا وائرس سے متاثر ہوئے: ترجمان

    کراچی: سندھ پولیس کے ترجمان کا کہنا ہے کہ سندھ پولیس کے 3 ہزار 409 پولیس افسران و جوان کرونا وائرس سے متاثر ہوئے، جس میں سے 3 ہزار 366 صحت یاب ہو چکے ہیں۔

    تفصیلات کے مطابق ترجمان سندھ پولیس کا کہنا ہے کہ 3 ہزار 409 پولیس افسران و جوان کرونا وائرس سے متاثر ہوئے، کرونا وائرس کے خلاف فرائض کی انجام دہی میں 19 پولیس افسران و جوان شہید ہوئے۔

    ترجمان کا کہنا ہے کہ زیر علاج افسران اور جوانوں کی تعداد 24 ہے، 3 ہزار 366 افسران اور جوان صحت یاب ہو کر گھر جا چکے ہیں۔

    خیال رہے کہ ملک بھر میں کرونا وائرس کیسز کی مجموعی تعداد 3 لاکھ 14 ہزار 616 ہوچکی ہے جن میں سے فعال کیسز 9 ہزار 135 ہے۔

    ملک میں اب تک 6 ہزار 513 مریض کرونا وائرس کے باعث جاں بحق ہوچکے ہیں جبکہ صحت یاب ہونے والوں کی تعداد 2 لاکھ 98 ہزار 968 ہوچکی ہے۔

    اس حوالے سے وزیر اعظم عمران خان نے کہا ہے کہ سردی میں کرونا وائرس کی دوسری لہر آنے کا خدشہ ہے، وبا روکنے کے لیے میں ہر ایک سے ماسک پہننے کی اپیل کرتا ہوں۔

    انہوں نے کہا کہ تمام دفاتر اور تعلیمی ادارے ماسک کے استعمال کو یقینی بنائیں۔

    وزیر اعظم کا مزید کہنا تھا کہ دیگر ممالک کی نسبت اللہ نے پاکستان پر کرم کیا ہے، اللہ نے پاکستان کو کرونا وائرس کے بدترین اثرات سے محفوظ رکھا۔

  • جنسی زیادتی کے بڑھتے واقعات: سندھ پولیس کا اینٹی ہراسمنٹ یونٹ بنانے کا اعلان

    جنسی زیادتی کے بڑھتے واقعات: سندھ پولیس کا اینٹی ہراسمنٹ یونٹ بنانے کا اعلان

    کراچی: ملک بھر میں خواتین اور بچوں سے زیادتی اور تشدد کے بڑھتے واقعات کے پیش نظر سندھ پولیس میں اینٹی ہراسمنٹ یونٹ بنانے کا اعلان کردیا گیا۔

    تفصیلات کے مطابق سندھ کے ایڈیشنل چیف سیکریٹری ہوم ڈاکٹر عثمان چاچڑ کی زیر صدارت اجلاس منعقد ہوا، اجلاس میں ایڈیشنل آئی جی حیدر آباد ڈاکٹر جمیل، ڈی آئی جی آپریشن مقصود میمن اور سندھ پولیس کی خواتین افسران نے شرکت کی۔

    اجلاس میں خواتین اور بچوں سے زیادتی اور تشدد کے بڑھتے واقعات زیر بحث آئے۔

    اجلاس میں ڈی آئی جی مقصود میمن نے اینٹی ہراسمنٹ یونٹ بنانے کا اعلان کیا، مقصود میمن کا کہنا تھا کہ اے ایچ یو کا دفتر کورنگی روڈ پر پولیس سہولت مرکز میں بنایا جائے گا، زیادتی اور تشدد کے بڑھتے ہوئے واقعات کا سدباب کیا جائے گا۔

    اجلاس میں متاثرہ خواتین اور بچوں کو آسان قانونی دسترس فراہم کرنے کا بھی فیصلہ کیا گیا۔ مقصود میمن کا کہنا تھا کہ ایس ایس یو اور 15 مددگار یونٹ کو مدد فراہم کریں گے۔

    زیادتی کے واقعات کے سدباب کے لیے مہم چلانے کا فیصلہ کرتے ہوئے ایڈیشنل آئی جی حیدر آباد ڈاکٹر جمیل نے کہا کہ سوشل میڈیا مہم سے پولیس اور عوام میں ہم آہنگی کو فروغ ملے گا۔

    انہوں نے کہا کہ خواتین اور بچوں سے زیادتی کے واقعات کی روک تھام میں مدد ملے گی۔

  • پولیس افسران بھی نیب کے ریڈار پر آگئے

    پولیس افسران بھی نیب کے ریڈار پر آگئے

    کراچی: قومی احتساب بیورو (نیب) نے پولیس افسران کو بھی ریڈار پر لے لیا، سی آئی اے انچارج حیدر آباد اسلم لانگاہ کے خلاف انکوائری شروع کردی گئی۔

    تفصیلات کے مطابق قومی احتساب بیورو (نیب) نے سی آئی اے انچارج حیدر آباد اسلم لانگاہ کے خلاف انکوائری شروع کردی۔ نیب کراچی نے اسلم لانگاہ کی تمام تر تفصیلات طلب کرلیں۔

    ذرائع کا کہنا ہے کہ نیب نے اسلم لانگاہ سے متعلق آئی جی سندھ سے تفصیل دریافت کرتے ہوئے کہا ہے کہ اسلم لانگاہ کے خلاف شکایت ہے، مطلوبہ دستاویزات فراہم کی جائیں، اسلم لانگاہ کی شناختی کارڈ کے ساتھ پرسنل فائل فراہم کی جائے۔

    نیب نے کہا ہے کہ اسلم لانگاہ کے اثاثہ جات اور تنخواہ کی تفصیلات بھی دی جائیں، علاوہ ازیں اسلم لانگاہ کب اور کہاں کہاں تعینات رہے، اس حوالے سے بھی تفصیلات دی جائیں۔

    نیب نے تمام تفصیلات کل تک فراہم کرنے کی ہدایت دیتے ہوئے کہا ہے کہ تفصیلات ایڈیشنل ڈائریکٹر انچارج کمپلینٹ سیل جاوید خان کو بھیجی جائیں۔

  • کراچی میں فائرنگ سے سب انسپکٹر شہید، ملزمان فرار

    کراچی میں فائرنگ سے سب انسپکٹر شہید، ملزمان فرار

    کراچی: شہر قائد کے علاقے سپر ہائی وے کے قریب نامعلوم افراد کی فائرنگ سے سب انسپکٹر شہید ہوگیا۔

    اے آر وائی نیوز کی رپورٹ کے مطابق کراچی کے علاقے گلشن معمار تھانے میں تعینات سب انسپکٹر کو نامعلوم افراد نے فائرنگ کرکے شہید کردیا، ایک ماہ کے دوران پولیس اہلکاروں پر یہ پانچواں حملہ ہے جن میں‌ 4 اہلکار جاں‌ بحق ہوچکے ہیں۔

    پولیس کے مطابق سب انسپکٹر یار محمد گلشن معمار تھانے میں تعینات تھا، جاں بحق سب انسپکٹر ڈیوٹی کرکے موٹرسائیکل پر گھر جارہا تھا۔

    پولیس حکام کے مطابق نامعلوم موٹر سائیکل سوار ملزمان نے ناردرن بائی پاس پر افسر کو نشانہ بنایا۔

    آئی جی سندھ نے ناردرن بائی پاس پرفائرنگ سےپولیس اہلکارکی شہادت کانوٹس لیتے ہوئے ایس ایس پی ملیرسے فوری رپورٹ طلب کرلی۔

    مزید پڑھیں: پولیس اہلکاروں‌ کی جان کو خطرہ، اے آئی جی کے احکامات نظر انداز

    واضح رہے کہ کراچی کے مختلف تھانوں کے پولیس اہلکاروں نے ایڈیشنل آئی جی غلام نبی میمن کے احکامات ہوا میں اُڑا دئیے اور منع کرنے کے باوجود ڈیوٹی آمد اور گھر واپسی پر وردی میں ملبوس ہوکر آنے اور جانے کا سلسلہ جاری ہے۔

    پولیس چیف نے دہشت گردوں کی جانب سے پولیس اہلکاروں کو نشانہ بنانے پر احکامات جاری کیے تھے کہ کوئی بھی اہلکار دوران ڈیوٹی اور گھر جاتے ہوئے وردی نہیں پہنے گا اور سادہ لباس میں گھر جائے گا۔

    غلام نبی میمن کا کہنا تھا کہ جو پولیس اہلکار احکامات کی خلاف ورزی کرتے پایا گیا اس کے خلاف محکمہ جاتی کارروائی عمل میں لائی جائے گی۔

    یاد رہے کہ چند روز قبل اےایس آئی غلام محمد کوفائرنگ کرکےقتل کیاگیا اور ملزم قتل کے بعدغلام محمد کا اسلحہ ساتھ لے گئے، تمام واقعات میں پولیس اہلکاروں کو شناخت کرنے کے بعد نشانہ بنایا گیا۔

    پولیس کا کہنا ہے کہ اے ایس آئی غلام محمد گھر سے نکل کر ڈیوٹی پر جارہا تھا تو لائنز ایریا فرنیچر مارکیٹ میں پان کے کیبن پر رکا ، ملزمان آئے اور گولیاں مار کر فرار ہوگئے۔

    پولیس کے مطابق جائے وقوع سے 30بور کا ایک خول ملا، جائے وقوع سے ملے خول کا فرانزک ٹیسٹ کرایا جائے گا، پولیس اہلکاروں کو باقاعدہ شناخت کرکے نشانہ بنایا جارہا ہے اور ملزمان تینوں واقعات میں اہلکاروں کا اسلحہ بھی ساتھ لے گئے۔

    اس سے قبل محمودآباد میں ون فائیوکے اہلکار نعمان کوشہید کیا گیا، ملزمان قتل کےبعد نعمان کااسلحہ ساتھ لےگئے جبکہ کورنگی میں پولیس اہلکار اصغر کو شہید کیا گیا اور اس واقعے میں بھی ملزم اسلحہ ساتھ لے گئے۔

  • لاک ڈاؤن، کراچی سے باہر جانے کے لیے میت کا ڈرامہ بے نقاب

    لاک ڈاؤن، کراچی سے باہر جانے کے لیے میت کا ڈرامہ بے نقاب

    کراچی: لاک ڈاؤن کے دوران کراچی سے باہر جانے کے لیے میت کا ڈرامہ بے نقاب ہوگیا۔

    اے آر وائی نیوز کی رپورٹ کے مطابق گڈاپ پولیس نے دیپارلپور جانے والی ایمبولینس کو روک کر کراچی سے باہر جانے کے لیے میت کا ڈرامہ بے نقاب کردیا، شہری کو میت کی صورت میں لٹایا گیا تھا۔

    ایس ایس پی علی رضا کا کہنا ہے کہ ایمبولینس میں خواتین اور بچوں سمیت 10 افراد سوار تھے، ڈرائیور نے دیپالپور جانے کے لیے 52 ہزار روپے میں بکنگ کی تھی۔

    ایس ایس پی علی رضا کے مطابق جعلی ڈیتھ سرٹیفکیٹ برآمد کرکے ایمبولینس ضبط کرلی گئی ہے۔

    مزید پڑھیں: بلوچستان سے ایمبولینس میں گٹکا کراچی منتقل کیے جانے کا انکشاف

    واضح رہے کہ اس سے قبل نیپئر پولیس نے بلوچستان سے مریض کی منتقلی کا جھانسہ دے کر کراچی میں گٹکا اسمگل کرنے والے ملزمان کو گرفتار کر لیا تھا، پولیس نے یہ کارروائی کشتی چوک پر کی اور 3 ملزمان کو ایمبولینس سمیت پکڑا تھا۔

    پولیس کا کہنا تھا کہ ملزمان کرونا بیماری کا جھانسہ دے کر گٹکا سپلائی کر رہے تھے، گٹکا چھپانے کے لیے ایک ملزم کو مریض بنا کر ایمبولینس میں لٹایا گیا تھا، پولیس سے بچنے کے لیے ملزمان نے ایمبولینس کے روٹر بھی آن رکھے ہوئے تھے۔

  • کراچی، پولیس کا ہے فرض مدد آپ کی عملی مثال

    کراچی، پولیس کا ہے فرض مدد آپ کی عملی مثال

    کراچی: پولیس کا ہے فرض مدد آپ کی کے محاورے پر کراچی پولیس نے عمل کرکے شہریوں کے دل جیت لیے۔

    تفصیلات کے مطابق کراچی میں پولیس نے بہترین اقدام کرتے ہوئے لاک ڈاؤن کی خلاف ورزی پر زیر حراست رکشہ ڈرائیورز کو راشن فراہم کرکے چھوڑنا شروع کردیا۔

    پولیس حکام کا کہنا ہے کہ عوام کو کرونا وائرس سے بچانے کیلئے اقدام کررہے ہیں، رکشہ ڈرائیورز کو رہا کرتے وقت راشن فراہم کیا جارہا ہے۔

    پولیس کے مطابق رکشہ ڈرائیور کو پابند کیا جاتا ہے کہ وہ اپنے گھروں میں رہیں، ذرائع کے مطابق مخیر حضرات کی جانب سے پولیس کو راشن دیا گیا تھا۔

    مزید پڑھیں: مشورہ ملا ہے کہ 2ہفتے لاک ڈاؤن کو برقرار رکھ کر مزید سخت کیاجائے، وزیراعلیٰ سندھ

    واضح رہے کہ کراچی کے شہریوں کی جانب سے لاک ڈاؤن کی خلاف ورزی اور لاپرواہی کی وجہ سے کرونا کے کیسز میں تیزی سے اضافہ ہورہا ہے۔

    سندھ حکومت کی جانب سے شہر کی مختلف یوسیز کو سیل کیا گیا ہے جس کا مقصد شہریوں کو پابند بنانا ہے کہ وہ گھروں میں رہیں اور محفوظ رہیں۔

    واضح رہے کہ کمانڈ اینڈ آپریشن سینٹر کے مطابق پاکستان میں کرونا کے 4 ہزار 186 مریض زیر علاج ہیں، کرونا کے باعث 93 اموات ہوئیں اور 44 مریضوں کی حالت تشویش ناک ہے، کرونا سے 1ہزار 95 مریض صحت یاب ہوچکے ہیں۔

  • کراچی، سُسر کے ہاتھوں 25 سالہ بہو قتل، ملزم فرار

    کراچی، سُسر کے ہاتھوں 25 سالہ بہو قتل، ملزم فرار

    کراچی: شہر قائد کے علاقے اورنگی ٹاؤن میں سسر کے ہاتھوں 25 سالہ بہو کو مبینہ طور پر قتل کردیا گیا۔

    اے آر وائی نیوز کی رپورٹ کے مطابق کراچی کے علاقے اورنگی ٹاؤن میں سسر نے 25 سالہ بہو کو قتل کردیا اور باآسانی فرار ہونے میں کامیاب ہوگیا۔

    پولیس کا کہنا ہے کہ گزشتہ روز فاطمہ شمیم نامی خاتون کو اس کے سسر نے تشدد کا نشانہ بنایا تھا، فاطمہ دوران علاج زخموں کی تاب نہ لاتے ہوئے دم توڑ گئی۔

    پاکستان بازار تھانے کی پولیس کا کہنا ہے کہ گزشتہ روز فاطمہ نے اپنے سسر کے تشدد کے خلاف درخواست بھی دی تھی۔

    ایس ایچ او کا کہنا ہے کہ مفرور سسر کی گرفتاری کے لیے چھاپے مارے جارہے ہیں جلد ملزم کو گرفتار کرلیا جائے گا۔

    ساہیوال، 3 بچوں کی ماں قتل، ملزم گرفتار

    دوسری جانب پنجاب کے علاقے ساہیوال تھانہ فتح شیر کی حدود میں خاتون کو مبینہ طور پر قتل کردیا گیا، خاتون 3 بچوں کی ماں تھی، قتل کے الزام میں ملوث ملزم کو گرفتار کرلیا گیا۔

    ورثا نے الزام عائد کیا ہے کہ خاتون کو شوہر اور سسرالیوں نے تشدد کرکے قتل کیا، پولیس کے مطابق خاتون کے چہرے پر تشدد کے نشانات موجود تھے۔

    پولیس کے مطابق خاتون کی لاش پوسٹ مارٹم کے لیے سول اسپتال منتقل کردی گئی ہے، رپورٹ آنے کے بعد مزید کارروائی عمل میں لائی جائے گی۔

  • کراچی، لاک ڈاؤن سے مستثنیٰ قرار دی گئی دکانوں پر ڈاکوؤں کی لوٹ مار

    کراچی، لاک ڈاؤن سے مستثنیٰ قرار دی گئی دکانوں پر ڈاکوؤں کی لوٹ مار

    کراچی: شہر قائد میں جاری لاک ڈاؤن اور پولیس ناکوں کے باوجود ڈاکو دیدہ دلیری سے دکانوں کا صفایا کرکے باآسانی فرار ہوگئے۔

    اے آر وائی نیوز کی رپورٹ کے مطابق کراچی کے علاقے قائد آباد میں 2 مسلح ڈاکوؤں نے لاک ڈاؤن سے مستثنیٰ قرار دی گئی دکانوں میں لوٹ مار کی اور باآسانی فرار ہوگئے۔

    پولیس کے مطابق 2 مسلح ڈاکوؤں نے میڈیکل اسٹور، جنرل اسٹور اور گوشت کی دکان میں لوٹ مار کی، 3 دکانوں میں کی گئی واردات میں 5 لاکھ روپے اور قیمتی سامان لوٹا گیا۔

    نمائندہ اے آر وائی نیوز کے مطابق قائد آباد پولیس نے ڈکیتی کا مقدمہ متاثرہ دکاندار کی مدعیت میں درج کرلیا۔

    مزید پڑھیں: کراچی: لاک ڈاؤن کے دنوں کی انوکھی واردات، 3 گھنٹوں میں گھر کا مکمل صفایا

    واضح رہے کہ اس سے قبل کراچی کے علاقے سرجانی ٹاؤن میں پیدل آنے والے تین ڈکیت گھنٹوں تک گھر میں موجود رہے اور شادی کے لیے جمع پونجی لوٹنے سمیت پورے گھر کا صفایا کرگئے۔

    پیدل ملزمان شہری اقبال کے گھر سے موٹر سائیکلیں، نقدی اور راشن بھی ساتھ لے گئے، شہری نے پولیس سے مدد کی درخواست کرتے ہوئے کہا تھا کہ 5 مسلح ملزمان رات 3 بجے گھر میں داخل ہوئے اور 6 بجے صبح واپس گئے، ملزمان نے کچن میں جا کر اطمینان سے چائے بھی خود بنا کر پی۔

    مدعی کے مطابق ملزمان نے کہا تھا کہ پولیس کو مت بتانا 2 روز بعد موٹر سائیکلیں واپس کر دیں گے، شہری کا کہنا تھا کہ ون فائیو پولیس تو آگئی لیکن تھانے کی پولیس تاحال نہیں پہنچی۔