Tag: sindh rangers

کراچی: سندھ حکومت نے کراچی میں رینجرز کو تفویض کردہ خصوصی اختیارات میں مزید تین ماہ کی توسیع کا نوٹیفیکشن جاری کردیا‘ وزیراعلیٰ سندھ کا کہنا ہے کہ کراچی کا امن پورے ملک کا امن ہے۔

تفصیلات کے مطابق سندھ حکومت کے محکمہ داخلہ کی جانب سے وزیراعلیٰ سندھ مراد علی شاہ کو رینجرز کے خصوصی اختیارات میں تین ماہ توسیع کی سمری ارسال کی گئی تھی جسے انہوں نے منظور کرلیا ہے۔

اس موقع پر وزیراعلیٰ سندھ مراد علی شاہ کا کہنا تھا کہ کراچی کا امن پورے ملک کا امن ہے ‘ رینجرز کراچی میں ٹارگٹڈ آپریشن اور امن کے لیے کوشاں ہے۔ واضح رہے رینجرز کو تین ماہ کے لیے انسداد دہشت گردی کے قانون کے تحت خصوصی اختیارات دیے جاتے ہیں‘ یہ اختیارات اے ٹی اے 1997 کے تحت تفویض کیے جاتے ہیں۔

یاد رہے کہ ماضی میں سندھ حکومت کی جانب سے انسداد دہشت گردی قانون کی کچھ شقوں کو معطل کرنے کی سفارش کی گئی تھی تاہم وفاقی وزارتِ داخلہ کا موقف تھا کہ انسدادِ دہشت گردی کے قانون پر کسی قسم کی قدغن نہیں لگائی جا سکتی اور نہ ہی اس قانون کی متعلقہ شقوں کو جزوی طورپرعلیحدہ یا بدلا جا سکتا ہے اس لیے صوبائی حکومت کی سفارشات کا قانون کے دائرہ کار میں ہونا ضروری ہے اوررینجرزاختیارات کے سلسلے میں تجاویزمتعلقہ قانون کے زمرے میں نہیں آتیں۔

دوسری جانب وزیراعلیٰ سندھ نے آج ایڈیشنل آئی جی سندھ سے بھی ملاقات کی اور شہر میں تالے توڑنے کی بڑھتی ہوئی وارداتوں پر تشویش کا اظہار کر تے ہوئے ان واقعات پر فی الفور قابو پانے کا حکم دیا ہے۔

یاد رہے کہ شہرِ قائد میں کئی تالا توڑ گروہ ان دنوں متحرک ہیں جن کی وجہ سے سینکڑوں کاروباری اپنی قیمتی اشیا اور نقد رقم سے محروم ہوچکے ہیں۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔