کراچی : سندھ میں آج سے نئے ٹیکسز کا نفاذ ہوگیا، جس کے تحت اندرون ملک پرواز کے ٹکٹ پر 250 روپے سندھ حکومت وصول کرے گی جبکہ عالمی پرواز کے ٹکٹ پر ایک ہزار روپے ٹیکس لاگوہوگیا۔
تفصیلات کے مطابق سندھ میں آج سے نئے ٹیکسز نافذ ہوگئے، اس حوالے سے محکمہ خزانہ سندھ نوٹیفکیشن جاری کرے گا۔
سندھ حکومت نئے مالی سال میں 76 ارب روپے کے اضافے ٹیکس وصول کرے گی، تعلیمی اداروں، اسپتالوں، انشورنس کمپنیوں ،پیٹرول پمپس سے ٹیکس وصول کیا جائے گا۔
اندرون ملک پرواز کے ٹکٹ پر 250 روپے سندھ حکومت وصول کرے گی جبکہ عالمی پرواز کے ٹکٹ پر ایک ہزار روپے ٹیکس لاگوہوگیا۔
الاٹمنٹ آرڈر یا تجدید پر 5 ہزار روپے ٹیکس نافذ ہوگا جبکہ رئیل اسٹیٹ،زمینوں دکان یا فلیٹس پر 2 فیصد ٹیکس وصول کیاجائےگا اور کسی بھی کاروبار میں پارٹنرشپ پر 5ہزار روپے ٹیکس نافذ ہوگا۔
انشورنس کی تجدید پر ٹیکس اور بحری جہاز کی انشورنس پر 5ہزار روپے صوبائی ٹیکس وصول کیا جائے گا۔
لائف انشورنس،عمارتی انشورنس،فصلوں اور املاک کے انشورنس پر ٹیکس اور غیر متحرک املاک کے پاور آف اٹارنی پر 5ہزار روپے ٹیکس نافذ ہوگا۔
3ہزار سی سی سے اوپر کاروں اور جیپوں پر ساڑھے 3 لاکھ روپے اور مقامی طور پر بننے والی 2 ہزار سی سی گاڑیوں پر 5 ہزار روپےٹیکس نافذ ہوگا۔.
تمام پروفیشنلز پر دو ہزار روپے سالانہ ٹیکس نافذکردیاگیا ہے جبکہ تمام پیٹرول پمپس ،سی این جی اسٹیشنز پر 20 ہزار روپے سالانہ ٹیکس اور فارم ہاؤسز ، نجی اسپتال،کلینکس ،گیسٹ ہاؤسز ،فیشن ہالز پر بھی ٹیکس نافذ ہوگا۔
اس کے علاوہ 5 لاکھ روپے سے زائد سالانہ فیس لینے والے تعلیمی اداروں پر بھی ٹیکس لگایا گیا اور وٹرنری اسپتالوں،گیمزسینٹرپربھی ٹیکس لاگو کردیاگیا ہے۔
