Tag: سندھ

کراچی: صوبہ سندھ میں 50 ہزار کے قریب ملزمان کے مفرور ہونے کا انکشاف ہوا ہے، یہ بات سندھ ہائی کورٹ میں آئی جی سندھ کی جانب سے جمع کرائی گئی ایک رپورٹ میں سامنے آئی ہے۔

تفصیلات کے مطابق سندھ ہائیکورٹ میں صوبے بھر کے مفرور ملزمان سے متعلق کیس میں آئی جی سندھ کی جانب سے ایک رپورٹ جمع کرائی گئی ہے جس کی کاپی اے آر وائی نیوز نے حاصل کر لی۔

رپورٹ میں انکشاف کیا گیا ہے کہ سندھ بھر کے مفرور ملزمان میں 8 بیرون ملک فرار ہیں، صوبے کے مفرور ملزمان کی فہرست میں بانی ایم کیو ایم کا نام بھی شامل ہے، بانی ایم کیو ایم 4 مقدمات میں مفرور ہیں، وہ ضلع غربی کے ایک کیس میں 1992 سے لندن فرار ہیں، حیدرآباد، سجاول اور ٹنڈو محمد خان کے مقدمات میں بھی انھیں مفرور قرار دیا گیا ہے۔

بیرون ملک فرار دیگر ملزمان میں عدیل، خلیل احمد، راشد اقبال، عدنان عرف چیوڑا شامل ہیں، رپورٹ میں تفصیلاً بتایا گیا ہے کہ کراچی کے ضلع شرقی میں 6 ہزار 102 مفرور ملزمان ہیں، ضلع جنوبی میں 4 ہزار 252، غربی میں ایک ہزار 908 مفرور ملزمان ہیں۔

حیدر آباد ڈویژن میں 6 ہزار 280 مفرور ملزمان میں سے 3 بیرون ملک فرار ہیں، میرپور خاص ڈویژن میں 536 مفرور ملزمان میں سے 3 بیرون ملک فرار ہیں، شہید بینظیر آباد میں 2 ہزار 126، سکھر ڈویژن میں 4 ہزار 987 مفرور ملزمان ہیں، جب کہ لاڑکانہ ڈویژن میں 23 ہزار 257 ملزمان کو مفرور قرار دیا گیا ہے۔

سی ٹی ڈی سندھ کی فہرست میں 608 ملزمان سنگین جرائم میں مفرور ہیں، عدالت نے اس رپورٹ کو ریکارڈ کا حصہ بنا لیا۔

کراچی: سندھ میں غیرقانونی معاشی سرگرمیوں کے خلاف بڑے پیمانے پر کریک ڈاؤن جاری ہے، جس میں پانی چوری میں ملوث 106 افراد اور مختلف جرائم میں ملوث 843 غیر ملکی باشندوں کو گرفتار کرلیا۔

تفصیلات کے مطابق سندھ میں غیرقانونی معاشی سرگرمیوں کیخلاف بڑے پیمانے پر کریک ڈاؤن جاری ہے اور غیر قانونی سرگرمیوں میں ملوث افراد کیخلاف پاک رینجرز اورپولیس کی مسلسل کارروائیاں کررہی ہے۔

کراچی میں غیر قانونی واٹرہائیڈرنٹس کے خلاف مہم بھی جاری ہے ، کراچی واٹر اینڈ سیوریج بورڈ کی سپلائی لائن کو محفوظ بنانے کے لئے پاکستان رینجرز
نے آپریشن میں واٹر بورڈ کے اشتراک سے 30 غیرقانونی ہائیڈرنٹس سیل کردیئے اور 106 افراد پانی چوری کے الزام میں گرفتار کیے گئے۔

آپریشنز منگھو پیر، ناظم آباد، اورنگی، ایوب گوٹھ ، جنجل گوٹھ اور گلزار ہجری ، قیوم آباد اور جمشید کوارٹرزکےعلاقے میں قائم غیرقانونی ہائیڈرنٹس کیخلاف کئے گئے اور واٹر بوزر، موٹرز،پائپس، کیبل سمیت واٹر پمپس تحویل میں لے کر 21 ایف آئی آر درج کی گئیں۔

صوبہ سندھ میں غیر قانونی طور پر مقیم غیر ملکی باشندوں کے خلاف آپریشن جاری ہے، ستمبر2021 سےاب تک تقریباً3432غیر قانونی طورپربسنےوالےغیر ملکیوں کو گرفتارکیا جا چکا ہے، اس کے علاوہ مختلف جرائم میں ملوث 843 غیر ملکی باشندے بھی گرفتار کیے گئے۔

حکومت کی ہدایات پر رینجرز نے ذخیرہ اندوزوں کے خلاف آپریشن کرتے ہوئے غیرقانونی طورپرذخیرہ کی گئی پیٹرول، چینی، گندم، کھاد سمیت دیگراشیاء خردونوش برآمد کرلیں۔

اندرون سندھ اورکراچی میں غیرقانونی طورپرذخیرہ کی گئی چینی کی تقریباً 150,000سےزائدبوریاں برآمد کی گئیں جبکہ 28 آپریشنز میں 74،589لیٹرپیٹرول برآمد جبکہ 78 افراد گرفتار کیے گئے جبکہ حب چوکی سمیت کئی علاقوں سے ہزاروں لیٹر ایرانی پیٹرول برآمد کیا گیا۔

ڈاکوئوں، منشیات فروشوں اور اسٹریٹ کرمنلز کے خلاف بھی 124 مختلف آپریشنز کیے گئے ، ان آپریشنز میں 355 افراد گرفتار، 82 ہتھیار اور 996 گولہ بارود برآمد کیا گیا۔

بڑی وارداتوں میں ملوث رکشہ ڈکیٹ اور شمس ڈکیٹ گروپ سمیت 7 بڑے گروپوں کی خلاف آپریشنز کیے گئے۔

رینجرز،پولیس کےاشتراک سے گھوٹکی،سکھر، خیرپور،لاڑکانہ،جیکب آباد،شکارپور،کشموراور دیگرعلاقوں میں اسنیپ چیکنگ کے ذریعےمجرموں کی تلاش جاری ہے، کندھ کوٹ میں رینجرز اور پولیس کے انٹیلی جنس بیسڈآپریشن میں دو آرمز ڈیلر گرفتار کیے گئے۔

کراچی : سندھ بھر میں ملیریا کے کیسز میں خطرناک حد تک اضافہ ہوگیا، رواں سال صوبے میں ملیریا سے 2 لاکھ 69 ہزار 596 کیسز رپورٹ ہوئے۔

تفصیلات کے مطابق سندھ بھر میں مچھروں کی بھرمار کے باعث ملیریا کے کیسز میں خطرناک حد تک اضافہ ہوگیا ، حیدرآباد ڈوہڑن سب سے زیادہ متاثر ہے۔

رواں سال سندھ بھر میں ملیریا سے 2 لاکھ 69 ہزار 596 کیسز رپورٹ ہوئے، محکمہ صحت سندھ نے بتایا کہ حیدرآباد ڈویڑن میں جنوری تا اگست1 لاکھ 32 ہزار 441 کیسز رپورٹ ہوئے۔

اس کے علاوہ میرپور خاص ڈویڑن میں 65 ہزار 807 کیسز ، لاڑکانہ ڈویڑن میں 48 ہزار 499 کیسز اور سکھر ڈویڑن میں 11 ہزار 591 کیسز رپورٹ ، شہید بے نظیرآباد 4ہزار 924 اور کراچی میں 1834 کیسز رپورٹ ہوئے۔

محکمہ صحت سندھ کا کہنا تھا کہ رواں سال ملیریا سے کوئی ہلاکت نہیں ہوئی۔