کراچی : کراچی کے مختلف علاقوں میں سابق صدر پرویز مشرف کے حق میں وال چاکنگ کی گئی ہے،وال چاکنگ میں نعرے درج ہیں اور سابق صدر کی تصاویر بھی چسپاں کی گئی ہیں۔

کراچی کے ضلع وسطی کے مختلف علاقوں نارتھ کراچی اور ناظم آباد میں رات گئے اچانک سابق صدر پرویز مشرف کے حق میں وال چاکنگ کر دی گئی جس میں پرویز مشرف کو خوش آمدید کہا گیا ہے اور ان کی قیادت پر اعتماد کا اظہار کیا گیا ہے وال چاکنگ میں سابق صدر کی تصاویر بھی آویزاں ہیں۔

خیال رہے متحدہ قومی موومنٹ اب ایم کیو ایم پاکستان ، پاک سر زمین پارٹی اور لندن گروپ میں منقسم ہو چکی ہے اور کراچی میں کھینچا تانی کی سیاست جاری ہے کبھی مصطفیٰ کمال کے نام کی چاکنگ ہوتی ہے تو کہیں فاروق ستار جلسہ کرتے نظر آتے ہیں تو کہیں بانی ایم کیو ایم کے حق میں نعرے بازی ہوتی نظر آتی ہے۔

دوسری جانب سابق صدر پرویز مشرف سے دبئی میں ایم کیو ایم پاکستان کے رہنما خواجہ اظہار الحسن نے ملاقات کی تھی جب کہ ایم کیو ایم پاکستان کے سربراہ فاروق ستار اور رکن قومی اسمبلی خالد مقبول صدیقی نے پرویز مشرف سے ملاقات کی تردید کی تھی۔

اس کے علاوہ میڈیا پر یہ خبریں بھی زیر گردش ہیں کہ پرویز مشرف ایم کیو ایم پاکستان اور پاک سر زمین پارٹی کو یکجا کر کے دونوں جماعتوں کے سربراہ بننے کے لیے ان جماعتوں کے رہنماؤں سے مسلسل رابطے میں ہیں۔

حیدرآباد: پاک سرزمین پارٹی کے رہنما انیس قائم خانی نے حیدر آباد میں 24 نومبر کو پہلے ورکرز کنونشن کا اعلان کرتے ہوئے کہا کہ آج حیدر آباد نے ثابت کردیا ہے کہ یہ شہر کسی ایک شخص یا پارٹی کا نہیں بلکہ پاکستانیوں کا ہے۔

پاک سرزمین پارٹی کے رہنما انیس قائم خانی حیدر آباد میں پاکستان ہاؤس میں ایک پُر ہجوم پریس کانفرنس سے خطاب کر رہے تھے۔

اس موقع پر ایم کیو ایم پاکستان کے حیدر آباد سے تعلق رکھنے والے مقامی عہدیداروں سمیت دیگر جماعتوں سے تعلق رکھنے والے افراد نے پاک سر زمین سے شمولیت کا اعلان کیا۔

اُن کا کہنا تھا کہ حیدر آباد سے تعلق رکھنے والے 350 سے زائد سیاسی کارکنان اور رہنماؤں کی پاک سرزمین پارٹی میں شمولیت سے ثابت ہو گیا ہے کہ حیدر آباد کسی ایک شخص یا جماعت کا نہیں بلکہ تمام پاکستانیوں کا ہے اور یہاں نسلی تضاد یا فسادات پھیلانے والوں کی کوئی گنجائش نہیں ہے۔

انیس قائم خانی نے کہا کہ 24 نومبر کو ہونے والے پہلے ورکرز کنونشن میں بھرپور عوامی قوت کا مظاہرہ کریں گے اور دنیا دیکھ لے گی کہ سندھ باسیوں کو آپس لڑوانے والوں کی سیاست ختم ہو گئی ہے اور محب الوطن پاکستانی پاک سرزمین پارٹی کے پرچم تلے جمع ہو رہے ہیں۔

واضح رہے کہ انیس قائم خانی نے متحدہ قومی موومنٹ کے پلیٹ فارم کا آغاز حیدرآباد سے کیا تھا اور اہم عہدہ ملنے کے بعد وہ کراچی منتقل ہوگئے تھے اور عزیز آباد میں رہائش اختیار کی تھی، بعد ازاں اپنی جماعت کے قائد سے اختلاف کے بعد دبئی چلے گئے تھے اور رواں سال مارچ میں مصطفیٰ کمال کے ہمراہ پاکستان واپس لوٹ کر اپنی سیاسی جماعت پاک سرزمین پارٹی کی بنیاد رکھی تھی۔