کراچی : امریکی قونصل جنرل گریس شیلٹن کا کہنا ہے کہ پاکستان غیرملکی سرمایہ کاروں کی توجہ کامرکز ہے۔
تفصیلات کےمطابق امریکی قونصل جنرل گریس شیلٹن کا پاکستان اسٹاک ایکسچینج کا دورہ کیا،امریکی قونصل جنرل نے اسٹاک مارکیٹ میں روائتی گھنٹہ بجا کر ٹریڈنگ کا آغاز کیا۔
امریکی قونصل جنرل نے پاکستان اسٹاک مارکیٹ کو ایم ایس سی آئی اینڈیکس میں شمولیت پر مبارک باد دی ۔گریس شیلٹن کا کہنا تھا کہ پاکستان کو سب سے زیادہ غیر ملکی سرمایہ کاری اور برآمدات امریکہ سے ملتی ہیں اور امید ہے کہ اس میں مزید اضا فہ ہو گا۔
صحافیوں سے بات چیت کے دروان امریکی قونصل جنرل کا کہنا تھا کہ امریکی حکومت پاکستانی معیشت کی بحالی اور پاکستانی کاروباری برادری کی ترقی کےلیے کوشاں ہے۔
واضح رہے کہ امریکی قونصل جنرل گریس شیلٹن کا کہنا تھا کہ پاکستان اسٹاک ایکسچینج ملکی معاشی ترقی کا نشان ہے۔
کراچی :حضرت امام حسینؓ اور شہدائے کربلاؓ کی قربانیوں کی یاد تازہ کرنے اور انہیں خراج عقیدت پیش کرنے کے لیے ملک بھر میں یوم عاشور آج مذہبی عقیدت و احترام سے منایا گیا.ملک بھر سے نکلنے والے جلوس اپنے مقررہ مقام پر پہنچ کر ختم ہوگئے۔
تفصیلات کےمطابق ملک بھر میں یوم عاشور مذہبی عقیدت و احترام سے منایا گیا کراچی، لاہور، پشاور، کوئٹہ، اسلام آباد اور راولپنڈی سمیت ملک کے دیگر چھوٹے بڑے شہروں میں اس موقع پر سیکیورٹی کے انتہائی سخت انتظامات کیے گئے تھے ۔
کراچی کا مرکزی جلوس
کراچی میں یوم عاشور پر مرکزی جلوس نشتر پارک سے 10 بجے برآمد ہو کر اپنی گزر گاہ سے منزل کی جانب رواں دواں ہوا،جلوس نمائش سے ہوتے ہوئے ایم اے جناح روڈ پر واقع امام بارگاہ علی رضا پہنچا جہاں سے تبت سینٹر پر نماز ظہرین ادا کی گئی جہاں سے جلوس جامع کلاتھ، بولٹن مارکیٹ سے ہوتا ہوا حسینیہ ایرانیاں کھارادر پر بہ وقت مغرب ختم ہوا۔
جلوس کے اختتام کے بعد نماز مغرب کے بعد مجلسِ شامِ غریباں برپا ہوئی جہاں ذاکرین نے امام حسینؓ کا فلسفہ شہادت بیان کیا اور مصائب اہل بیت بیان کرے۔
حفاظتی اقدامات
جلوس اور مجالس کی سیکورٹی کے لیے 22 ہزار سے زائد پولیس اہلکار تعینات کیے گئے جن میں 389 خاتون پولیس افسران بھی شامل تھیں جبکہ 275 مقامات پر کیمرے نصب کیے گئے۔
خیال رہے کہ گزشتہ روز آئی جی اے ڈی خواجہ نے وزیراعلیٰ سندھ مراد علی شاہ کو وزیر اعلیٰ ہاؤس میں یوم عاشور کی سیکیورٹی کے حوالے سے بریفنگ دی۔
شہر کے مختلف مقامات سے برآمد ہونے والے جلوس نشتر پارک کے مرکزی جلوس میں شامل ہوں گے،یوم عاشور کے موقع پر ہزاروں مقامات پر شہدائے کربلا کو خراج عقیدت پیش کرنے کے لیے مجالس برپا کی گئیں ، علمائے کرام ، ذاکرین نے شہدائے کربلا کی عظیم قربانیوں اور فلسفہ شہادت پر روشنی ڈالی۔
یاد رہے کہ کراچی میں جلوس کی سیکیورٹی کو فول پروف بنانے کے لیے ایم اے جناح روڈ اور اطراف کی سڑکیں بھی کنٹینر لگا کر سیل کی گئی ہیں جبکہ بلند عمارتوں پر ماہر نشانے باز بھی تعینات رہے ۔
واضح رہےکہ جلوس کے راستوں پر اسکینرز نصب کیے گئے،مرکزی جلوس میں شریک ہونے والے زائرین کو چیکنگ کے بعد شرکت کی اجازت دی گئی۔
دریں اثنا جلوس کے آغاز سے قبل وزیر اعلیٰ سندھ مراد علی شاہ جلوس کے روٹ کی سیکیورٹی کا جائزہ لینے کے لیے نکلے ان کے ہمراہ ڈی جی رینجرز میجر جنرل بلال اکبر، آئی جی سندھ اے ڈی خواجہ بھی موجود تھے۔
اس موقع پر وزیر اعلیٰ سندھ نے سیکیورٹی انتظامات پر مکمل اطمینان کا اظہار کرتے ہوئے کہا کہ کراچی سمیت پورے سندھ میں سیکیورٹی خدشات ہیں تاہم پولیس اور رینجرز نے بہترین انتظامات کیے گئے تھے۔
انہوں نے بتایا کہ اس سلسلے میں مجالس اور جلوس کے منتظمین نے پولیس، رینجرز اور ضلعی انتطامیہ سے مکمل تعاون کیا۔
کراچی : محکمہ داخلہ سندھ کا کہنا ہے کہ یوم عاشور کے دن سیکورٹی خدشات کے پیش نظرسندھ کے مختلف شہروں میں موبائل سروس بند رہے گی۔
محمکہ داخلہ سندھ کے مطابق یوم عاشورہ کے دن سندھ کے مختلف شہروں میں موبائل سروس ساڑھے بارہ بجے سے شام ساڑھے سات بجے تک بند رہے گی۔
سندھ حکومت نے اس سے قبل نو اور دس محرم الحرام کے دن سندھ کے مختلف شہروں میں موبائل سروس بندکرنے کی وفاقی حکومت سےسفارش کی تھی تاہم نو محرم کو موبائل سروس بند نہیں کی گئی لیکن آج سندھ حکومت کی سفارش پر موبائل سروس بند کرنے کا فیصلہ کیا گیا ہے۔
وزارت داخلہ پاکستان کی جانب سے محکمہ داخلہ سندھ کو موبائل سروس بندکرنے کے حوالے سے باضابطہ طور پر آگاہ کردیا گیا ہے۔
محکمہ داخلہ سندھ کا کہنا ہے کہ ہم نے جو سفارش کی تھی اس بنیاد پر کراچی سمیت سندھ کے مختلف شہروں میں موبائل سروس بندکرنے کا فیصلہ کیا گیا اور جلوس کے اختتام پذیز ہونے تک مختلف شہروں میں موبائل سروس معطل رہے گی۔
دوسری جانب لاہور سمیت پنجاب کے کئی شہروں میں بھی موبائل فون سروس بند کرنے کا فیصلہ کیا گیا ہے۔صوبہ پنجاب کے دارالحکومت لاہور میں جلوس کے روٹ اور اس کے گردونواح میں موبائل سروس جلوس کے اختتام تک بند رہے گی۔
یاد رہے کہ گزشتہ روز وزارت داخلہ کی جانب سے وفاقی دارالحکومت میں موبائل سروس بند نہ کرنے کافیصلہ کیا گیا تھااور ساتھ ہی جلوس کے راستوں پر سیکورٹی کے فول پروف انتظامات کرنے کی ہدایات کی گئی تھیں۔
واضح رہے کہ چاروں صوبوں، گلگت،فاٹا اور اسلام آباد انتظامیہ نے نو اور دس محرم کو موبائل فون سروس بند کرنے کے لیے وفاقی حکومت کو درخواست دی تھی جبکہ کراچی، لاہور،راولپنڈی ،پشاور اور کوئٹہ سمیت کئی شہروں میں ڈبل سواری پربھی پابندی ہے۔
کراچی:شہر قائد کے علاقےگلشن اقبال اور کے ایم سی ورک شاپ کے قریب نامعلوم موٹرسائیکل سوار ملزمان کی فائرنگ سے دو افراد جان کی بازی ہار گئے۔
تفصیلات کے مطابق گذشہ ہفتے نامعلوم افراد کی فائرنگ سے زخمی ہونے والا شخص دوران علاج جاں بحق ہوگیا،پولیس حکام کا کہنا ہے کہ مرنے والے شخص کا نام جاوید رضا ہے اور فائرنگ کے وقت وہ مجلس میں شرکت کے لیے جارہاتھا۔
پولیس کے مطابق فائرنگ کے واقعے میں مقتول جاوید رضا کا بہنوئی بھی زخمی ہوا تھا جسے اسپتال منتقل کردیا گیا تھا۔
خیال رہے اسی روز نامعلوم موٹر سائیکل سواروں نے امام بارگاہ کے ٹرسٹی منصور زیدی کو فائرنگ کرکےجاں بحق کردیا تھا،اس واقع میں منصور زیدی کا بیٹا بھی زخمی ہوا تھا۔
پولیس حکام کی جانب سے کی جانے والی ابتدائی تحقیقات کے مطابق دونوں واقعات میں ملنے والے گولیوں کے خول کی فرانزک کے بعد تفتیشی افسر کا کہنا تھا کہ دونوں فائرنگ کے واقعات میں استعمال ہونے والا اسلحہ ایک ہی ہے۔
کراچی: گورنر سندھ نے کہا کہ صوبے میں تمام مذاہب و مسالک کو آئین و قانون کے تحت مذہبی و مسالکی عبادات کی ادائیگی کی مکمل آزادی حاصل ہے مذہبی و مسالکی ایام میں پر امن عبادتوں کی ادائیگی کے لئے صوبہ میں فول پروف سیکیورٹی کے انتظامات حکومت کی اہم ذمہ داری ہے۔
تفصیلات کے مطابق گورنر سندھ ڈاکٹر عشرت العباد خان نے چیف سیکریٹری سندھ محمد صدیق میمن،ڈائریکٹر جنرل رینجرز میجر جنرل بلال اکبر،ڈپٹی مئیر کراچی ارشد وہرہ ،انسپکٹر جنرل پولیس سندھ اے ڈی خواجہ ، ایڈیشنل آئی جی مشتاق مہر اور مجالس و جلوسوں کے منتظمین سے رابطہ کرکے ان سے محرم الحرام کی مجالس ،جلوسوں کی سکیورٹی اور صفائی ستھرائی کے حوالہ سے معلومات حاصل کیں ۔
گورنر سندھ نے تمام متعلقہ حکام کو ہدایت کی کہ فول پروف سیکیورٹی کو ہر حال میں یقینی بنایا جائے اس ضمن میں جلوسوں کے راستوں پر نگراں کیمروں کو مکمل طور پر فعال رکھا جائے تاکہ آغاز سے اختتام تک تمام جلوسوں کی مکمل نگرانی کی جاسکے۔
انہوں نے ڈپٹی میئر ارشد وہرہ کو ہدایت کی کہ امام بارگاہوں ،مساجد اور مجالس کے مقامات کے باہر اور جلوسوں کے راستوں پر صفائی ستھرائی کو بھی یقینی بنایا جائے۔ گورنر سندھ نے چیف سیکریٹری کو ہدایت کی کہ صوبہ کے کمشنروں اور ڈپٹی کمشنروں سے صورتحال کے بارے میں مسلسل آگاہی حاصل کی جائے۔
ڈاکٹر عشرت العباد نے قانون نافذ کرنے والے اداروں کی ہدایت کی کہ وہ اپنی ڈیوٹی کے دوران مکمل چوکس رہے، صوبے میں امن و امان کا قیام ہم سب کی ذمہ داری ہے جس کے لیے ادارے بہت اہم کردار ادا کررہے ہیں۔
انہوں نے عوام سے اپیل کی کہ تمام افراد قانون فافذ کرنے والے اداروں کے ساتھ مکمل تعاون کریں اور کسی بھی مشکوک شخص کی اطلاع قانون نافذ کرنے والے اداروں کو دیں تاکہ بروقت کارروائی سے کسی بھی خوش گوار واقعے سے محفوظ رہا جا سکے۔
آپریشن ضرب عضب پر تبصرہ کرتے ہوئے گورنر سندھ نے کہا کہ ملک بھر میں جاری آپریشن سے امن و امان کی صورتحال بہت بہتر ہوئی ہے ضرورت اس امر کی ہے کہ اسے مزید مستحکم کیا جائے جس کے لیے قانون نافذ کرنے والے ادارے شب و روز مصروفِ عمل ہیں۔
کراچی : شہر قائد کراچی کےعلاقے پاک کالونی اور اولڈسٹی ایریا میں فائرنگ سے 2 افراد جاں بحق اور 3 زخمی ہوگئے۔
تفصیلات کےمطابق کراچی کے علاقے پاک کالونی کی حدود میں نامعلوم افراد کی فائرنگ سے ایک شخص جاں بحق اور دوسرا زخمی ہوگیا۔پولیس کے مطابق مقتول کی شناخت شیر باز کے نام سے کرلی گئی ہے جبکہ اس کا بھائی اویس زخمی ہوا۔
ادھر اولڈ سٹی ایریا میں کے ایم سی ورک شاپ کے قریب موٹر سائکل سوار افراد کی فائرنگ سے اسلم نامی شخص جاں بحق ہوا۔پولیس حکام کے مطابق واقعہ ڈکیتی کے دوران مزاحمت پر پیش آیا۔
ادھر کراچی کے علاقے گارڈن فوارہ چوک اور میرا ناکہ کے قریب فائرنگ کے واقعات میں دو افراد زخمی ہوئے جنہیں قریبی اسپتال منقتل کردیاگیا۔
سجاول: ضلع سجاول سے تعلق رکھنے والے 8 ماہ کے بچے میں پولیو وائرس کی تصدیق ہوگئی جس کے بعد رواں سال سندھ میں متاثرہ بچوں کی تعداد 5 اور پاکستان بھر میں وائرس سے متاثرہ بچوں کی گنتی 15 ہوگئی۔
تفصیلات کے مطابق ایمرجنسی آپریشن سینٹر پولیو سندھ کے سربراہ فیاض جتوئی نے ضلع سجاول کے 8 سالہ بچے میں پولیو وائرس کی تصدیق کرتے ہوئے افسوس کا اظہار کیا ہے اور کہا کہ متاثرہ بچے کو پولیو کی دو خوراکیں فراہم کی جاچکی تھیں تاہم بچہ معمول کی خوراک پینے سے محروم رہا۔
فیاض جتوئی نے کہا کہ ’’ایمرجنسی آپریشن پولیو سینٹر کے علاوہ یونیسیف اور عالمی ادارہ صحت نے ضلع سجاول میں پولیو کا کیس سامنے آنے کے بعد ہنگامی اجلاس طلب کیا جس میں کمشنر حیدرآباد اور محکمہ صحت بھی شریک ہوئے۔
کمشنر حیدرآباد نے محکمہ صحت کے افسران سے پولیو کیس رپورٹ ہونے کی تفصیلات طلب کی اور ہدایت جاری کیں کہ ’’معمول کی مہم نہ ہونے کی اصل وجوہات سامنے لائی جائیں تاکہ متعلقہ افسران کے خلاف کارروائی عمل میں لائی جائے‘‘۔
کمشنر حیدر آباد نے افسران پر واضح کیا کہ ’’وزیر اعلیٰ سندھ کے احکامات کی روشنی میں پولیو مہم کے دوران کسی قسم کی لاپروائی برداشت نہیں کی جائے گی‘‘۔ پولیو حکام کے مطابق ’’والدین معمول کی پولیو مہم کو نظر انداز کردیتے ہیں جو بچوں میں قوتِ مدافعت کی کمی کا سبب بنتا ہے۔
کراچی : سابق مشیر پٹرولیم ڈاکٹرعاصم کا کہناہے کہ رہا ہونے کے بعد سیاست نہیں ڈاکٹری کروں گا۔
تفصیلات کےمطابق 462 ارب روپے کی کرپشن کیس میں ڈاکٹرعاصم کی آج احستاب عدالت میں پیشی کے موقع پر میڈیا نمائندوں سے غیررسمی گفتگوکرتے ہوئے ڈاکٹر عاصم کا کہنا تھا کہ وہ رہائی کےبعد سیاست نہیں ڈاکٹری کرنے کا ارادہ رکھتے ہیں۔
عدالت کے احاطے میں صحافی کی جانب سے سوال کیا گیا کہ اگر آپ کو گورنرشپ کی پیشکش کی جائے تواسے قبول کریں گے جس پر انہوں نےکہا کہ رہائی کے بعد صرف ڈاکٹری کروں گا۔
ڈاکٹر عاصم سےغیررسمی گفتگو کے دوران سوال کیا گیا کہ گورنزسندھ بھی تو ڈاکٹرہیں تواس پر سابق مشیر پٹرولیم کا کہناتھا کہ وہ پریکٹسنگ ڈاکٹر نہیں لیکن میں رہائی کے بعد پریکٹس کروں گا۔
یاد رہےکہ ڈاکٹر عاصم حسین 2009 میں پیپلز پارٹی کے ٹکٹ پر سندھ سے سینیٹر منتخب ہوئے،انہوں نے 2012 تک وزیر پیٹرولیم وقدرتی وسائل اور وزیراعظم کے مشیر برائے پیٹرولیم کے فرائض انجام دیے تھے۔
واضح رہےکہ پیپلز پارٹی نے 2013 کے عام انتخابات کے بعد انہیں سندھ کے ہائیر ایجوکیشن کمیشن کا چیئرمین مقرر کیا تھا۔
نیو یارک : سابق صدرپرویزمشرف ریڑھ کی ہڈی میں تکلیف کی شکایت پراسپتال میں داخل ہوگئے ہیں ماہر معالجین نے معائنہ کیا اور سی ٹی اسکین کروایا۔
تفصیلات کے مطابق امریکہ مقیم سابق صدرِ پاکستان پرویزمشرف کی ریڑھ کی ہڈی میں تکلیف کے باعث مقامی اسپتال میں داخل ہو گئے ہیں۔
امریکی اسپتال میں سابق صدر کا تفصیلی میڈ یکل چیک اپ اور سی ٹی اسکین سمیت مختلف ٹیسٹ بھی ہوئے جن کی رپورٹ کی روشنی میں دوائیں اورعلاج تجویزکیا جائے گا۔
واضح رہے کہ کچھ دنوں قبل سوشل میڈ یا پر ایک ویڈ یوجاری کی گئی تھی جس میں سابق صدر کو اپنی اہلیہ کے ساتھ ایک نجی شادی کی محفل میں رقص کرتے ہوئے دیکھا جا سکتا۔
اس ویڈیو کے جاری ہونے کے بعد میڈیا پر پرویز مشرف کو شدید تنقید کا سامنا تھا کہ کمر کے درد کے علاج کے غرض سے ملک سے باہر جانے والے پرویز مشرف رقص کی محفل سجا رہے ہیں اور درد سے بے نیاز محو رقص ہیں۔
تاہم سابق صدر کی جماعت آل پاکستان مسلم لیگ کے ترجمان نے ایک نجی محفل میں معمولی تفریح کی ویڈیو کو بڑھا چڑھا کر پیش کرنے کی سخت الفاظ میں مذمت کرتے ہوئے کہا تھا کہ کسی کی گھریلو ویڈیوکا تماشہ بنانا اخلاقیات کا جنازہ ہے۔
کراچی : شہر قائد میں عزیزآباد سے پکڑا جانے والے جدید اسلحہ پاک فوج کے سپرد کردیا گیا،برآمد شدہ اسلحے کا فرانزک ٹیسٹ کروایا جائے گا۔
تفصیلات کےمطابق عزیز آباد کے مکان سے ملنے والے اسلحے کو ڈی آنی جی ویسٹ کے دفتر سے 2 ٹرکوں کے ذریعے آج صبح پولیس کی سخت نگرانی میں پاک فوج کےآرڈیننس ڈپومنتقل کردیاگیا۔
ذرائع کاکہناہےسندھ پولیس کےپاس جدیدسہولیات نہ ہونے کےباعث اسلحے کی جانچ پڑتال کےلیےفوج کی مددلی گئی ہے۔سندھ پولیس ایس ایم جیز،راکٹ لانچر،بزوکا،جی تھری رائفل،ایل ایم جیز اوراینٹی ایئرکرافٹ گنزکی فارنزک نہیں کرسکتی۔
یاد رہے کہ گزشتہ روز کراچی پولیس چیف مشتاق مہرکاپریس کانفرنس کے دوران کہنا تھا کہ برآمد شدہ اسلحے کا فرانزک ٹیسٹ کروایا جائے گا جبکہ پولیس نے مہلک ہتھیاروں کو محفوظ کرنے اور دھماکہ خیز مواد کو ناکارہ بنانے کے لیے پاک فوج کے سپرد کر دیاگیا۔
واضح رہے کہ گزشتہ روز رینجرز نے گرفتار ملزمان کی نشاندہی پر کراچی کے علاقے عزیز آباد میں واقع مکان پر چھاپہ مار کر پانی کے ٹینک میں چھپایا گیا اسلحہ بھاری مقدارمیں برآمد کیا تھا۔
