ARYNews.tv | Urdu – Har Lamha Bakhabar

Tag: سندھ

  • عید الاضحیٰ، سندھ حکومت نے بڑی پابندی عائد کر دی

    عید الاضحیٰ، سندھ حکومت نے بڑی پابندی عائد کر دی

    کراچی: عید الاضحیٰ پر سندھ حکومت نے گھروں کے باہر قربانی کرنے پر پابندی عائد کر دی ہے۔

    تفصیلات کے مطابق سندھ حکومت نے گھروں کے باہر قربانی کرنے پر پابندی عائد کر دی ہے، محکمہ داخلہ سندھ کی جانب سے نوٹیفکیشن جاری کر دیا گیا۔

    محکمہ داخلہ سندھ نے کہا ہے کہ کرونا وائرس میں اضافے کے باعث شہری رہائشی علاقوں میں قربانی کی اجازت نہیں ہے، جانوروں کی قربانی کے لیے کھلے میدان کا انتخاب کیا جائے، اور جانوروں کی قربانی کرتے ہوئے مجمع اکھٹا نہ ہو۔

    محکمہ داخلہ سندھ نے ایس او پیز کی خلاف ورزی کرنے والوں کے خلاف کمشنرز، ڈپٹی کمشنرز اور پولیس کو کارروائی کی ہدایت کر دی ہے، محکمے نے کہا ہے کہ نماز عید کے اجتماعات بھی کھلی جگہ میں منعقد کیے جائیں گے، اور ایک ہی مقام پر نماز عید کے ایک سے زائد اجتماعات الگ اوقات میں کیے جائیں۔

    نوٹیفکیشن کے مطابق نماز عید کے لیے آنے والوں کو تھرمل اسکینر سےگزارا جائے، نماز کے دوران سماجی فاصلہ برقرار رکھا جائے، اور عید کے اجتماعات میں بیمار افراد، بچوں اور بزرگ شہریوں شرکت نہ کرنے دی جائے۔

    محکمہ داخلہ سندھ کا کہنا ہے کہ عید کی نماز پڑھنے والے افراد فیس ماسک کا استعمال لازمی کریں، اور شہری نماز عید کے بعد ہاتھ ملانے اور گلے ملنے سے بھی گریز کریں۔

  • اسکول، ریسٹورنٹس پھر بند، نیا حکم نامہ جاری

    اسکول، ریسٹورنٹس پھر بند، نیا حکم نامہ جاری

    کراچی: محکمہ داخلہ سندھ نے کہا ہے کہ صوبے میں کرونا وائرس کے بڑھتے ہوئے کیسز کے پیش نظر 17 جولائی سے پہلی سے آٹھویں جماعت تک کے تمام اسکول بند ہوں گے۔

    اے آر وائی نیوز کے مطابق محکمہ داخلہ سندھ نے کرونا کے بڑھتے ہوئے کیسز کے پیش نظر کرونا پابندیوں کے حوالے سے نیا حکم نامہ جاری کر دیا ہے، صوبے میں 15 جولائی سے ہوٹلز، ریسٹورنٹس اور کیفیز میں اِن ڈور ڈائننگ پر پابندی ہوگی۔

    نئے حکم نامے کے مطابق 17 جولائی سے پہلی سے آٹھویں جماعت تک کے تمام اسکول بند ہوں گے، جب کہ نویں سے بارہویں جماعت تک امتحانات شیڈول کے مطابق ہوں گے۔

    پارکس، واٹر پارکس، سوئمنگ پولز 16 جولائی سے تا حکم ثانی بند رہیں گے، پبلک ٹرانسپورٹ میں 50 فی صد مسافر ایس او پیز کے ساتھ سفر کریں گے، اِن لینڈ تفریحی مقامات پر جانے پر پابندی ہوگی۔

    سی ویو، ہاکس بے، کھینجر جھیل، المنظر پر جانے پر بھی پابندی ہوگی، سنیما ہال کل 15 جولائی سے بند رہیں گے، اِن ڈور جم، ان ڈور اسپورٹس 16 جولائی سے بند ہوں گے۔

    محکمہ داخلہ سندھ کے حکم نامے میں کہا گیا ہے کہ تمام سیاحتی مراکز بھی مکمل طور پر بند رہیں گے، اور پابندی کا اطلاق 31 جولائی تک ہوگا۔

  • تھر کول بلاک 6، برطانوی کمپنی کو سرمایہ کاری کی اجازت نہ مل سکی

    تھر کول بلاک 6، برطانوی کمپنی کو سرمایہ کاری کی اجازت نہ مل سکی

    کراچی: صوبہ سندھ میں اربوں روپے کی بیرونی سرمایہ کاری کا منصوبہ روک دیا گیا، تھر کول بلاک 6 میں برطانوی کمپنی کو اجازت نہ مل سکی۔

    اے آر وائی نیوز کے مطابق برطانوی کمپنی اوریکل نے تھر کول بلاک 6 میں تھر کے کوئلے سے بجلی، گیس اور فرٹیلائزر بنانے کے لیے خطیر سرمایہ کاری کی پیش کش کی تھی، تاہم کمپنی کو اجازت نہیں دی گئی۔

    سندھ حکومت نے تھر کول بلاک 6 میں برطانوی سرمایہ کار کمپنی کو اجازت نہ دینے کا الزام وفاقی حکومت پر عائد کر دیا ہے۔

    اوریکل کمپنی کی تھر کول میں سرمایہ کاری کے ذریعے بجلی کی پیداوار میں اضافہ ہونا تھا، اس سلسلے میں سندھ اور وفاقی حکومت کے درمیان خط و کتابت بھی ہوئی، تاہم اس کے باوجود برطانوی کمپنی اوریکل کو تھر کول میں سرمایہ کاری کی اجازت نہیں مل سکی۔

    وزیر توانائی امتیاز شیخ کا کہنا ہے کہ تھر کول مائننگ اور متبادل توانائی سی پیک میں شامل ہے، انھوں نے الزام عائد کیا کہ وفاقی حکومت سندھ کے متبادل توانائی منصوبوں کو دانستہ روک رہی ہے۔

    امتیاز شیخ کے مطابق سی پیک مشترکہ تعاون کمیٹی کے اجلاس میں بھی تھر کول بلاک 6 منصوبے کو شامل نہیں کیا گیا ہے، پاک چین اقتصادی راہداری منصوبے کے سب سے بڑے فورم جے سی سی کا اجلاس 16 جولائی کو شیڈول ہے۔

    انھوں نے بتایا کہ سندھ کے ونڈ پاور پراجیکٹ کی بھی منظوری نہیں دی گئی ہے۔

  • ایم کیو ایم کا سندھ میں گورنر راج لگانے کا مطالبہ

    ایم کیو ایم کا سندھ میں گورنر راج لگانے کا مطالبہ

    کراچی: سندھ میں گورنر راج کے نفاذ کا مطالبہ زور پکڑنے لگا، پاکستان تحریک انصاف سندھ کے بعد متحدہ پاکستان نے بھی صوبے میں گورنر راج لگانے کا مطالبہ کردیا ہے۔

    تفصیلات کے مطابق کراچی میں پریس کانفرنس کرتے ہوئے متحدہ پاکستان کے کنوینئر عامر خان نے کہا کہ صوبہ بنانےکیلئےصوبائی اسمبلی سےدوتہائی اکثریت چاہیےہوتی ہے ،18ویں ترمیم میں صوبوں کو سارے اختیارات دےدیئےگئے، ایسی صورت میں18ویں ترمیم میں تبدیلی کی ضرورت ہے۔

    عامر خان نے کہا کہ ملکی سلامتی دفاعی اداروں سےجڑی ہے، دفاعی اداروں کی ضرورت صوبہ پوری کرتا ہے، ملکی سلامتی کیلئےضروری ہے کہ وفاق فوری سندھ میں گورنر راج لگائے تاکہ ان دشمن عناصر سےچھٹکارا مل سکے۔

    متحدہ پاکستان کے کنوینئر نے ایک بار پھر صوبے میں نئی مردم شماری کا مطالبہ کرتے ہوئے کہا کہ ہرفرد کہتا ہے کہ اس شہرکی آبادی تین کروڑسےزائدہے مگر اسے ٹھیک طرح سے نہیں گِنا گیا، کراچی میں زیادہ نشستیں حاصل کرنے کے لئے کم وبیش چالیس لاکھ جعلی ووٹوں کا اندراج کیا گیا، یہ 40 لاکھ ووٹ دھاندلی کیلئےاستعمال کئے جاتے ہیں، یہ پوری ایک پلاننگ ہے کوئی ماسٹرمائنڈہے۔

    عامر خان نے مزید کہا کہ جمہوریت کےلبادےمیں ملک دشمن لوگ اقتدار میں آتےہیں، ایف آئی اےکی رپورٹ میں ہمارےدعویٰ سچ ہونے کاثبوت ہے، 50سے60فیصدتک نادراکا عملہ کرپشن میں ملوث پایاگیا، نادراکےعملے کی تحقیقات ہونی چاہیے، دہشتگردوں کےبھی شناختی کارڈبنائےگئےہیں، ایف آئی اےرپورٹ کےبعدسندھ حکومت کاکرپٹ چہرہ بےنقاب ہوچکا۔

    پریس کانفرنس میں عامر خان نے مرتضیٰ وہاب کی بطور ایڈمنسٹریٹر کراچی کی مخالفت کرتے ہوئے کہا کہ کراچی میں سیاسی ایڈمنسٹریٹر اپنی پارٹی کو ہی فائدہ پہنچائے گا، سیاسی ایڈمنسٹریٹر کی تعیناتی دھاندلی کا ہی طریقہ ہے، ایک غیر جانبدار کو آدمی کو سیاسی ایڈمنسٹریٹر لگایا جائے۔

    اس موقع پر رکن سندھ اسمبلی محمد حسین کا کہنا تھا کہ مرتضی وہاب کو کراچی بہتری کیلئے نہیں بلکہ بلدیاتی اداروں میں اندرون سندھ سے لائے افسران کو مضبوط کرنے کے لئے لایا جارہا ہے۔

  • سندھ میں ان ڈور ڈائننگ، تفریحی مقامات ایک بار پھر بند

    سندھ میں ان ڈور ڈائننگ، تفریحی مقامات ایک بار پھر بند

    کراچی: وزیر اعلیٰ سندھ مراد علی شاہ کی زیر صدارت صوبائی کووڈ ٹاسک فورس کے اجلاس میں اہم فیصلے کرتے ہوئے صوبے میں ان ڈور ڈائننگ، تفریحی مقامات اور اسکول دوبارہ بند کرنے کا فیصلے کرلیے گئے۔

    تفصیلات کے مطابق وزیر اعلیٰ سندھ مراد علی شاہ کی زیر صدارت صوبائی کووڈ ٹاسک فورس کا اجلاس ہوا۔ اجلاس میں بتایا گیا کہ صوبے میں نئے کیسز کی شرح 7.4 فیصد ہوگئی ہے۔

    وزیر اعلیٰ نے کہا کہ 5 فیصد سے کووڈ کیسز بڑھے تو یہ خطرناک صورتحال ہے۔

    بریفنگ میں بتایا گیا کہ کل 16 ہزار 262 ٹیسٹ کیے گئے جن میں سے 12 سو 1 مثبت نکلے، اس وقت 837 مریض اسپتالوں میں ہیں۔

    سیکریٹری صحت کاظم جتوئی نے بتایا کہ اب زیادہ تر مریض سرکاری اسپتالوں میں ہیں، کل 13 جولائی کو کراچی میں نئے کیسز کی شرح 17.11 فیصد تھی، کراچی شرقی میں 21 فیصد، کراچی جنوبی میں 15 فیصد، کراچی وسطی میں 12 فیصد اور کورنگی میں 8 فیصد کیسز ہیں۔

    انہوں نے کہا کہ اب تک ویکسین کے 58 لاکھ 70 ہزار 991 خوراکیں موصول ہوئیں، ابھی تک 44 لاکھ 65 ہزار908 خوراکیں استعمال ہوچکی ہیں۔ سندھ میں 12 جولائی تک مختلف قسم کے 356 کیسز ظاہر ہوئے۔

    اجلاس میں ان ڈور ڈائننگ دوبارہ سے کل رات سے بند کرنے کا فیصلہ کرلیا گیا، صوبے بھر میں پہلی جماعت سے آٹھویں جماعت تک اسکو، تمام پارکس، واٹر پارکس، سی ویو، ہاکس بے اور کینجھر جھیل بھی جمعے سے بند کرنے کا فیصلہ کیا گیا ہے۔

    میٹرک اور اس سے اوپر کے تعلیمی ادارے امتحانات کے بعد بند کرنے کا فیصلہ کیا گیا ہے۔ سینما، ان ڈور جم اور انڈور کھیل بھی بند کردیے جائیں گے۔

  • خطرے کی گھنٹی ، سندھ میں بھارتی ‘ڈیلٹا وائرس کے 35 کیسز سامنے آگئے

    خطرے کی گھنٹی ، سندھ میں بھارتی ‘ڈیلٹا وائرس کے 35 کیسز سامنے آگئے

    کراچی : سندھ میں کورونا کا انڈین ویریئنٹ داخل ہوگیا ہے، لیاری کے ایک خاندان کے 5 افراد کورونا کی بھارتی قسم سے متاثر نکلے، جن کی حالت تشویشناک ہے۔

    تفصیلات کے مطابق سندھ میں کورونا کی بھارتی قسم کے 35کیسزسامنے آگئے، پارلیمانی سیکریٹری صحت سندھ قاسم سومرو کا کہنا ہے کہ لیاری کے ایک خاندان کے 5 افراد کورونا کی بھارتی قسم سے متاثر ہے ، بھارتی ویرینٹ سے متاثر 4افراد کی حالت تشویشناک ہے، اس وائرس سے متاثرہ افراد کو بچانا مشکل ہورہا ہے۔

    قاسم سومرو کا کہنا تھا کہ انڈین ویرینٹ سےمتاثرہ افراد کے کانٹیکٹ ٹریسنگ کا عمل جاری ہے ، حکومت سندھ کو کورونا کی بھارتی قسم سے بچاؤ کی تجاویزدی ہیں۔

    پارلیمانی سیکریٹری صحت سندھ نے مزید بتایا کہ ویکسین کرانے والے 9 افراد میں دوبارہ کورونا سے متاثر ہونے کے کیسز بھی سامنے آئے ہیں۔

    یاد رہے گذشتہ ہفتے راولپنڈی میں 20 افراد کورونا کی بھارتی قسم کی تشخیص ہوئی تھی۔

    خیال رہے نیشنل کمانڈ اینڈ آپریشن سینٹر (این سی او سی) کی جانب سے بیان میں کہا گیا ہے کہ پاکستان میں ڈیلٹا وائرس کے کیسز سامنے آنے لگے ، جو کورونا کی چوتھی لہر بھی ہو سکتی ہے، ڈیلٹا وائرس جو درحقیقت انڈین وائرس ہے، انتہائی خطرناک قرار دیا جارہا ہے۔

  • سندھ میں انفارمیشن اینڈ ٹیکنالوجی کے فروغ کے لیے صوبائی حکومت غیر سنجیدہ

    سندھ میں انفارمیشن اینڈ ٹیکنالوجی کے فروغ کے لیے صوبائی حکومت غیر سنجیدہ

    کراچی: صوبہ سندھ میں انفارمیشن اینڈ ٹیکنالوجی کے فروغ کے لیے صوبائی حکومت غیر سنجیدہ نظر آ رہی ہے، اس سلسلے میں وفاقی وزیر آئی ٹی کے وزیر اعلیٰ سندھ کو لکھے گئے خطوط منظر عام پر آ گئے۔

    اے آر وائی نیوز کے مطابق نوشہروفیروز، شہید بے نظیر آباد اور خیرپور ڈسٹرکٹ کے لیے آپٹک فائبر کیبل پروجیکٹ کے وفاقی حکومت کے پروگرام سے سندھ حکومت نے خود کو لا تعلق کر لیا ہے۔

    وفاقی وزیر امین الحق کی جانب سے وزیر اعلیٰ سندھ مراد علی شاہ اور صوبائی وزیر انفارمیشن ٹیکنالوجی تیمور تالپور کو پروگرام میں شرکت اور سندھ حکومت کے تعاون کے لیے خط بھی لکھا گیا تھا، تاہم وفاقی وزیر کی دعوت کے باوجود وزیر اعلیٰ سندھ اور صوبائی وزیر برائے ٹیکنالوجی نے شرکت نہیں کی۔

    اس سے قبل بھی وفاقی وزیر امین الحق متعدد منصوبوں کے حوالے سے وزیر اعلیٰ سندھ کو خط لکھ چکے ہیں، تاہم ذرائع کا کہنا ہے کہ مراد علی شاہ کی جانب سے کوئی جواب نہیں دیا گیا۔

    اس سے قبل 4 جنوری کو وزیر اعلیٰ سندھ کو کشمور، گھوٹکی، سکھر اور خیرپور میں آپٹک فائبر نیٹ ورک پراجیکٹ کی افتتاحی تقریب میں بھی مدعو کیا گیا تھا۔

    وفاقی وزیر امین الحق کا کہنا ہے کہ وزیر اعلیٰ سندھ کو صوبے کے ہر منصوبے میں شرکت کی دعوت دی لیکن وہ کبھی نہیں آئے، وزیر اعلیٰ سندھ کو صوبے اور اس کے عوام کی ترقی سے کوئی غرض نہیں، سندھ حکومت کے پاس صرف بہانے ہیں۔

    امین الحق کا کہنا تھا کہ لسانیت اور تعصب کے نام پر کراچی اور حیدرآباد کے عوام کو ترقی کے عمل سے دور رکھا گیا، گرین لائن اور کے فور کا منصوبہ اب وفاقی حکومت نے ہماری درخواست پر شروع کیا ہے۔

  • افغان ایجنسی این ڈی ایس نے ٹی ٹی پی کو نادرا شناختی کارڈز دلوائے، انکشاف

    افغان ایجنسی این ڈی ایس نے ٹی ٹی پی کو نادرا شناختی کارڈز دلوائے، انکشاف

    کراچی: ایف آئی اے نے انکشاف کیا ہے کہ نادرا کے ڈیٹا بیس میں افغان ایجنسی این ڈی ایس نے تحریک طالبان پاکستان (ٹی ٹی پی) کو شناختی کارڈز دلوائے۔

    تفصیلات کے مطابق آج جمعرات کو ڈائریکٹر ایف آئی اے سندھ زون وَن عامر فاروقی نے پریس کانفرنس میں انکشاف کیا ہے کہ نادرا سے ٹی ٹی پی کے دہشت گردوں کے لیے شناختی کارڈز بنوائے گئے ہیں۔

    عامر فاروقی کا کہنا تھا کہ نادرا سے القاعدہ کے دہشت گردوں کو بھی کارڈز بنوا کر دیے گئے، بھارتی شہری عمران علی کا شناختی کارڈ بنایا گیا، جو صفورا حملے میں ملوث تھا۔

    ڈائر یکٹر ایف آئی اے نے بتایا کہ چینی قونصل خانے پر حملے میں بھی شناخت تبدیل کی گئی تھی، نادرا سے اللہ نذر اور قوم پرست دہشت گردوں نے بھی شناختی کارڈ بنوائے، عامر فاروقی کے بیان کے مطابق نادرا سے متعدد دہشت گردوں کے شناختی کارڈ بنوائے گئے ہیں۔

    ایف آئی اے ڈائریکٹر نے مزید بتایا کہ اس سلسلے میں نادرا سندھ کے کئی ملازم ملوث ہیں۔

  • سندھ میں کورونا ویکسینیشن مہم ، کراچی بازی لے گیا

    سندھ میں کورونا ویکسینیشن مہم ، کراچی بازی لے گیا

    کراچی : سندھ میں جاری کورونا ویکسی نیشن مہم میں کراچی بازی لے گیا ، کراچی ڈویژن کی 18.74 فیصد آبادی کو ایک ڈوز لگ چکی ہے۔

    تفصیلات کے مطابق سندھ میں جاری کورونا ویکسی نیشن مہم کی تفصیلات سامنے آگئیں ، ذرائع کا کہنا ہے کہ سندھ کے چھ ڈویژنز میں کورونا ویکسی نیشن مہم جاری ہے اب تک سندھ بھر میں 1.9 ملین افراد کو ویکسین کی پہلی ڈوز جبکہ 645000 افراد کو ویکسین کی دو ڈوز لگ چکی ہیں۔

    ذرائع کا کہنا تھا کہ 24 گھنٹے میں سندھ میں 97000 افراد کو کورونا ویکسین لگائی گئی ، سندھ کی کورونا ویکسی نیشن مہم میں کراچی ڈویژن پہلے نمبر ہے، کراچی ڈویژن کی 18.74 فیصد آبادی کو ایک ڈوز لگ چکی ہے جبکہ کراچی میں 18 سال سے زائد عمر افراد کی تعداد 10.2 ملین ہے۔.

    ذرائع نے بتایا میرپورخاص ڈویژن کی 8.69 فیصد آبادی ، حیدرآباد کی 7.8 فیصد آبادی ، شہید بینظیر آباد ڈویژن کی 6.46 فیصد آبادی ، سکھر کی 5.75 فیصد آبادی اور لاڑکانہ کی 4.75 فیصد آبادی کو ویکسین کی 1 ڈوز لگ چکی ہے۔

    خیال رہے پاکستان بھر میں کورونا ویکسینیشن مہم جاری ہے جبکہ حکومت پاکستان مختلف کمپنیز کی کورونا ویکسین کی دستیابی یقینی بنانے کیلئے کوشاں ہیں۔

  • ‘رواں ماہ سے سرکاری ملازمین کو 20 فیصد اضافی تنخواہ ملے گی’

    ‘رواں ماہ سے سرکاری ملازمین کو 20 فیصد اضافی تنخواہ ملے گی’

    کراچی : سندھ حکومت نے سرکاری ملازمین کی تنخواہوں میں20 فیصد اضافے کا نوٹیفکیشن جاری کردیا ، اضافے کا اطلاق جولائی کی تنخواہ سے ہوگا۔

    تفصیلات کے مطابق سندھ حکومت نے تنخواہوں میں 20فیصد اضافے کا نوٹیفکیشن جاری کردیا ، محکمہ خزانہ سندھ نے سرکاری ملازمین کی تنخواہوں میں اضافے کا حکم نامہ جاری کیا ، جس میں کہا گیا ہے کہ ایڈہاک ریلیف الاؤنس کا اطلاق جولائی کی تنخواہ سے ہوگا۔

    خیال رہے بجٹ میں سرکاری ملازمین کی تنخواہوں میں 20 فیصداضافے کا اعلان کیا گیا تھا۔

    یاد رہے سندھ حکومت نے عید الاضحی سے پہلے سرکاری ملازمین کو تنخواہیں اور پنشن ادا کرنے کا فیصلہ کرتے ہوئے تمام متعلقہ سرکاری محکموں کو تنخواہیں اور پنشنز 16جولائی تک جاری کرنے کی ہدایت کردی ہے۔