Tag: سندھ

کراچی: الیکٹرک بسوں کے بعد حکومت سندھ نے ماحول دوست بائیوگیس پر مبنی بسیں بھی لانے کا فیصلہ کر لیا ہے۔

تفصیلات کے مطابق آج چیف سیکریٹری سندھ سید ممتاز علی شاہ کی زیر صدارت بی آر ٹی ریڈ لائن کے متعلق اجلاس منعقد ہوا، جس میں سیکریٹری ٹرانسپورٹ، سی ای او کراچی ماس ٹرانز سمیت دیگر افسران شریک ہوئے۔

اجلاس میں حکومت سندھ نے الیکٹرک بسوں کے بعد ماحول دوست بائیوگیس پر مبنی بسیں لانے کا فیصلہ کیا۔

چیف سیکریٹری سندھ سید ممتاز علی شاہ نے کہا ریڈ لائن بی آر ٹی بس منصوبے پر 250 بسیں ماحول دوست توانائی بائیو گیس پر بھی چلیں گی۔

کراچی میں پاکستان کی پہلی الیکٹرک بس کا افتتاح کردیا گیا

انھوں نے منصوبے کی تفصیلات بتاتے ہوئے کہا اس سلسلے میں لانڈھی کیٹل کالونی میں بائیوگیس پلانٹ بنایا جائے گا، جہاں سے بسوں کے لیے 11 ٹن کمپریسرڈ بائیو گیس فراہم کی جائے گی۔

ممتاز علی شاہ کا کہنا تھا کہ ریڈ لائن بی آر ٹی ملیر ہالٹ سے براستہ یونی ورسٹی روڈ نمائش تک چلے گی۔

یاد رہے کہ گزشتہ روز سندھ حکومت نے کراچی میں پاکستان کی پہلی الیکٹرک بس کا باقاعدہ افتتاح کیا تھا، وزیر ٹرانسپورٹ سید اویس شاہ نے کہا تھا کہ نجی شعبے کے تعاون سے مزید الیکٹرک بسیں شہر کی سڑکوں پر لائی جائیں گی، اور اس سال کے آخر تک 100 سے زیادہ برقی بسیں سڑکوں پر آئیں گی۔

کراچی: کرونا وائرس کے پھیلاؤ میں تیزی آنے کے بعد چند دن قبل کھلنے والی درگاہیں اور مزارات دوبارہ بند کرنے کے احکامات جاری کر دیے گئے۔

تفصیلات کے مطابق سندھ حکومت نے پھر اپنے فیصلے میں رد و بدل کر دیا، اور چند دن قبل صوبے بھر کی تمام کھلنے والی درگاہوں اور مزارات کو دوبارہ بند کرنے کے احکامات جاری کر دیے۔

یہ فیصلہ وزیر اوقاف سہیل انور سیال کی صدارت میں منعقدہ اجلاس میں کیا گیا، اجلاس کے بعد محکمہ اوقاف نے تمام مزارات اور درگاہیں دوبارہ بند کرنے کے احکامات جاری کر دیے۔

28 مارچ سے 8 اپریل تک سندھ بھر کی درگاہیں اور مزارات بند رہیں گے، محکمہ اوقاف سندھ کا کہنا ہے کہ درگاہیں اور مزارات زائرین کے لیے بند کرنے کا فیصلہ کرونا وائرس کے پھیلاؤ کے پیش نظر کیا گیا ہے۔

یاد رہے کہ منگل کو محکمہ اوقاف نے کراچی، سکھر، حیدر آباد کے ایڈمنسٹریٹر اوقاف کو مراسلہ لکھ کر حکم دیا تھا کہ سندھ بھر میں تمام مزارات اور درگاہیں کھول دی جائیں۔

درگاہوں اور مزارات کھولنے کے لیے 18 نکاتی ایس او پیز بھی جاری کیے گئے تھے، محکمہ اوقاف نے ہدایت کی تھی کہ درگاہوں اور مزارات پر ایس او پیز کا مکمل خیال رکھا جائے۔

محکمہ اوقاف کے مراسلے کے بعد کراچی میں عبداللہ شاہ غازی کے مزار کو کھول دیا گیا، زائرین کو ماسک لازمی پہننے اور سماجی فاصلوں کو یقینی بنانے کی سخت ہدایت کی گئی تھی۔

کراچی: محکمہ اطلاعات سندھ میں ڈمی اخبارات کو اشتہارات دینے اور مبینہ کرپشن کے معاملے میں جاری تحقیقات میں پیش رفت ہوئی ہے۔

اے آر وائی نیوز کے مطابق پانچ مارچ کو سیکریٹری اطلاعات رفیق احمد برڑو کی جانب سے ڈائریکٹر اطلاعات سلیم خان کو 20 دن میں انکوائری رپورٹ مرتب کرنے کی ہدایت کی گئی تھی، جس پر انھوں نے تحقیقات شروع کر دی ہیں۔

ذرائع کا کہنا ہے کہ جنوری کے پہلے 15 دن کے اشتہارات کا ریکارڈ انکوائری افسر نے حاصل کر لیا ہے۔

ذرائع کے مطابق اس کیس میں بڑے پیمانے پر ذاتی مفادات حاصل کرنے اور کرپشن کے ذریعے پیسا کما کر قومی خزانے کو اربوں کا نقصان پہنچایا گیا ہے۔

رواں سال جاری اشتہارات پر سندھ حکومت کا بڑا قدم

واضح رہے کہ سیکریٹری محکمہ اطلاعات رفیق برڑو نے رواں سال کے جنوری تا مارچ کے دوران غیر قانونی اشتہارات دینے کے معاملے کی تحقیقات کا حکم دیا تھا، محکمے کو ڈمی اخبارات کو اشتہارات جاری کر کے مبینہ کرپشن کی شکایات موصول ہوئی تھیں۔

یاد رہے کہ جنوری میں ضلع غربی کے محکمہ اشتہارات کو بغیر نیلامی غیر قانونی ٹھیکے پر دینے کا منصوبہ ناکام بنایا گیا تھا، ذرائع کا کہنا تھا کہ 50 لاکھ کے آفر ریٹ پر ڈی ایم سی کا پورا محکمہ ٹھیکے پر دے دیا گیا تھا، تاہم ڈی سی غربی نے ڈی ایم سی کے کرپٹ افسران کا منصوبہ ناکام بنا کر ٹھیکے کو منسوخ کر دیا، اس معاملے پر محکمہ لوکل گورنمنٹ سندھ نے بھی ایکشن لے لیا تھا۔

کراچی: کمیشن پر اشتہارات کے سلسلے میں حکومت سندھ نے بڑے پیمانے پر تحقیقات کا حکم دے دیا۔

اے آر وائی نیوز کے مطابق محکمہ اطلاعات سندھ میں کمیشن پر اشتہارات دینے کے معاملے پر حکومت سندھ نے بڑے پیمانے پر تحقیقات کا حکم دے دیا ہے۔

محکمہ اطلاعات سندھ نے جنوری، فروری اور مارچ 2021 میں جاری کیے جانے والے اشتہا رات کی تحقیقات کا فیصلہ کیا ہے۔

کمیشن پر اشتہارات دینے کے متعلق میڈیا پر چلنے والی خبر کا نوٹس لیتے ہوئے سیکریٹری اطلاعات رفیق احمد برڑو نے انکوائری کے احکامات دے دیے۔

ڈائریکٹر اطلاعات سلیم خان کو 20 دن میں انکوائری رپورٹ مرتب کرنے کی ہدایت کر دی گئی۔

سیکریٹری اطلاعات رفیق احمد برڑو کا کہنا ہے کہ اخبارات کو اشتہار پالیسی کے تحت دیے جائیں گے، جنوری، فروری اور مارچ 2021 میں جاری کیے جانے والے اشتہارات کی بھی تحقیقات کی جائے گی۔

ضلع غربی کراچی کا پورا محکمہ غیر قانونی ٹھیکے پر دے دیا گیا، تحقیقات شروع

یاد رہے کہ جنوری میں ضلع غربی کے محکمہ اشتہارات کو بغیر نیلامی غیر قانونی ٹھیکے پر دینے کا منصوبہ ناکام بنایا گیا تھا، ذرائع کا کہنا تھا کہ 50 لاکھ کے آفر ریٹ پر ڈی ایم سی کا پورا محکمہ ٹھیکے پر دے دیا گیا تھا، تاہم ڈی سی غربی نے ڈی ایم سی کے کرپٹ افسران کا منصوبہ ناکام بنا کر ٹھیکے کو منسوخ کر دیا، اس معاملے پر محکمہ لوکل گورنمنٹ سندھ نے بھی ایکشن لے لیا تھا۔