کراچی: سندھ حکومت نے قیدیوں کے بچوں کی تعلیم کے حوالے سے پاکستان کا پہلا پروگرام شروع کر دیا۔

تفصیلات کے مطابق سندھ حکومت کی طرف سے سزا یافتہ قیدیوں کے بچوں کو تعلیم حاصل کرنے میں مدد کے لیے پاکستان کا پہلا پروگرام شروع کر دیا گیا۔

پیغام پاکستان کے اشتراک سے قیدیوں کے 10 ہزار سے زائد بچوں کو پرائمری سے یونیورسٹی تک کی تعلیم میں مدد کی جائے گی، اس ضمن میں سینٹرل جیل کراچی میں منعقد ہونے والی تقریب میں وزیر تعلیم سندھ سردار علی شاہ اور وزیر جیل خانہ جات حسن علی زرداری نے شرکت کی۔

پرائمری سے یونیورسٹی تک مفت تعلیم دینے کے حوالے سے یہ پروگرام محکمہ تعلیم سندھ، محکمہ جیل خانہ جات اور پیغام پاکستان کی مشترکہ کاوش سے شروع کیا گیا ہے، جس کے تحت سندھ کی جیلوں میں قید 4684 سزا یافتہ قیدیوں کے بچوں کو پرائمری سے لے کر یونیورسٹی تک تعلیم حاصل کرنے میں مدد کی جائے گی۔

پہلے مرحلے میں 100 بچوں کے اسکول ایڈمیشن لیٹرز جاری کر دیے گئے ہیں، جب کہ 2638 بچوں کا ڈیٹا بھی جمع کر لیا گیا ہے، جس کے تحت ان کے خاندان کی مشاورت سے ان کو داخلہ لیٹرز دیے جائیں گے۔ صوبائی وزیر تعلیم کے مطابق قیدیوں کے بچوں کو اسکول سے یونیورسٹی تک تعلیم دلوانے میں مدد کرنے والا یہ دنیا کا پہلا ماڈل ہے۔

اس پروگرام کے تحت قیدیوں کے بچوں کا ڈیٹا لیا جا رہا ہے، جس کی بنیاد پر خاندان کی مرضی کے مطابق اسکول اور یونیورسٹی تک تعلیم میں 10 ہزار سے زائد بچوں کی مدد کی جائے گی، قیدیوں کے بچے سرکاری یا نجی اسکول یا یونیورسٹی کا انتخاب اپنی اپنی مرضی سے کر سکیں گے۔

وزیر جیل خانہ جات سندھ علی حسن زرداری کے مطابق اس پروگرام کی مدد سے بچہ جیل میں قید بچوں کی تعلیم اور ہنر سیکھنے میں بھی مدد کی جائے گی، اس وقت سندھ میں 14 سزا یافتہ بچے قیدی ہیں جب کہ 56 بچے اپنے ماؤں کے ساتھ جیل میں رہ رہے ہیں، ان کی تعلیم کے لیے بھی اقدامات جاری ہیں۔

پیغام پاکستان کے آرگنائزر پروفیسر محمد معراج صدیقی کے مطابق پروگرام کے تحت قیدیوں کے بچوں کو کاروبار کرنے کے لیے 5 لاکھ روپے تک کی مائکرو فنانسنگ اور سزا یافتہ قیدیوں کے خاندان کو ماہانہ 12 ہزار روپے تک کی معاونت فراہم کی جائے گی۔

واضح رہے کہ سندھ کے جیلوں میں 24 ہزار قیدی ہیں، جس میں سے 4102 سزا یافتہ قیدی ہیں، جب کہ 582 سزائے موت کے قیدی ہیں۔ ضمیر نامی قیدی نے اپنے تاثرات میں کہا آج ان کے لیے یہ بے حد خوشی اور اطمینان کا دن ہے جب ان کی غیر موجودگی میں ان کے بچے اسکول جائیں گے۔

کراچی: پی اے سی نے سندھ میں ساتوں تعلیمی بورڈز میں مالی بے ضابطگی، نمبر دینے کے طریقہ کار کا اسپیشل آڈٹ کرانے کا حکم دیا ہے۔

تفصیلات کے مطابق پی اے سی اجلاس میں سندھ اسمبلی کی پبلک اکاؤنٹس کمیٹی نے تعلیمی بورڈز کی کارکردگی پر عدم اعتماد کا اظہار کرتے ہوئے ساتوں تعلیمی بورڈز میں مالی بے ضابطگی، مارکس کے طریقہ کار، اور مالی اخراجات کا اسپیشل آڈٹ کرانے کا حکم دے دیا ہے۔

ڈی جی آڈٹ کو 2022 سے 24 تک 3 سالہ اسپیشل آڈٹ کر کے 4 ماہ میں رپورٹ دینے کی ہدایت کر دی گئی، اور محکمہ یونیورسٹیز اینڈ بورڈز کو اسپیشل آڈٹ کے لیے ٹی او آرز بنا کر ڈی جی آڈٹ کو ایک ہفتے میں فراہم کرنے کی ہدایت کی گئی ہے۔

سندھ اسمبلی کی پبلک اکاؤنٹس کمیٹی کا اجلاس چیئرمین نثار کھوڑو کی صدارت میں ہوا، جس میں سندھ کے تعلیمی بورڈز کے 2016 سے 2017 تک آڈٹ پیراز کا جائزہ لیا گیا۔

میڈیکل اور ڈینٹل کالجز کے طلبا اور والدین کیلئے اچھی خبر

نثار کھوڑو نے کہا تعلیمی بورڈز کا معیار یہ ہے کہ الزام لگ رہے ہیں پیسے دو مارکس لو، پیسے دے کر اے پلس مارکس دیے جائیں گے تو بچے پھر انٹری ٹیسٹ میں فیل ہی ہوں گے۔

کمیٹی رکن خرم سومرو نے استفسار کیا کہ انٹر بورڈ کے چیئرمین امیر قادری کو ہٹایا گیا تھا، اس کی تحقیقات کہاں تک پہنچی؟ تعلیمی بورڈز کا مارکس دینے کا کیا نظام ہے، آگاہ کریں؟ نتائج میں ہیرا پھیری کی شکایات کیوں آ رہی ہیں؟

چیئرمین انٹر و میٹرک بورڈ شرف علی شاہ نے کہا امیدواروں کو مارکس کم دیتے ہیں تو بھی ایشو ہو جاتا ہے، مارکس زیادہ دیتے ہیں تو بھی الزام لگ جاتا ہے، نتائج شفافیت سے متعلق حکمت عملی تبدیل کر رہے ہیں، اور نتائج سے متعلق کمیٹی کی رپورٹ جلد منظر عام پر آ جائے گی۔

کمیٹی رکن سعدیہ جاوید نے کہا تعلیمی بورڈز کا اسپیشل آڈٹ کرایا جائے، نثار کھوڑو نے کہا تعلیمی بورڈز میں نتائج کی شفافیت ہوگی تو بچے دنیا سے مقابلہ کر کے آگے جائیں گے۔