امریکی ریاست پنسلوینیا کے شہر فلاڈیلفیا میں ایک گلی کی سڑک میں اچانک بہت بڑا گڑھا پڑ گیا، اور ایک کار اس کے اندر گر گئی۔
مقامی حکام کے مطابق منگل کی سہ پہر کو فلاڈیلفیا کے ایک محلے پورٹ رچمنڈ کی گلی کے نیچے پانی کی لائن پھٹنے سے اچانک ایک سنک ہول کھل گیا، اور اس نے ایک کار نگل لی، اور دوسری کار اس میں گرتے گرتے بچی۔
اس واقعے میں خوش قسمتی سے کوئی زخمی نہیں ہوا، حکام کا کہنا تھا کہ سنک ہول پانی کے 6 انچ کے ٹوٹے ہوئے پائپ کی وجہ سے کھلا تھا، پائپ پھٹنے کے باعث درجنوں گھروں تک پانی کی سروس بند ہو گئی تھی۔
گلی کے ایک رہائشی کا کہنا تھا کہ انھوں نے ایک بڑا دھماکا سنا تھا، جس سے انھیں ایسا لگا جیسے ان کا پورا گھر کسی غار میں گرنے والا ہے، رہائشی کے مطابق سنک ہول میں گرنے والی ایس یو وی کار فلاڈیلفیا کے پولیس افسر اسٹیو ولیمز کی اہلیہ کی تھی۔
واقعے کے بعد حکام نے نقصان کا جائزہ لینے کے لیے سڑک کو دونوں سمتوں سے بند کر دیا، جب کہ واقعے کی وجہ سے تقریباً 30 گھر پانی سے محروم ہو گئے، جب کہ پائپ لائن کی مرمت کے لیے عملے کو طلب کیا گیا۔
