مٹیاری : امیر جماعت اسلامی سراج الحق نے کہا ہے کہ حماس نے اسرائیل کا غرور خاک میں ملادیا، امت مسلمہ حماس مجاہدین کی پشت پر ہے۔
ہالہ منصورہ میں کنونشن سے خطاب کرتے ہوئے امیر جماعت اسلامی کا کہنا تھا کہ گریٹر اسرائیل کا خواب چکنا چور ہوچکا ہے، اب مسلم حکمران بھی ہمت جرات کا مظاہرہ کریں۔
انہوں نے کہا کہ اگر آج ملک میں جماعت اسلامی کی حکومت ہوتی تو اسرائیلی فوج غزہ کے نہتے فلسطینیوں پرکبھی حملہ آور نہیں ہوتی۔
پیپلز پارٹی کی گزشتہ حکومت پر شدید الفاظ میں تنقید کرتے ہوئے سراج الحق نے کہا کہ سندھ میں بدترین حکمرانی نے صوبے کو کھنڈرات میں تبدیل کردیا ہے۔
قدرتی وسائل سے مالا مال صوبے میں مہنگائی، غربت اور بیروزگاری ہے، ہم غلام قوم ہیں غلامی کی زندگی گزار رہے ہیں، امریکا کے غلاموں کو باری باری ہم پر مسلط کیا جاتا ہے۔
امیرجماعت اسلامی نے کہا کہ پٹرول کی قیمت ورلڈ بینک طے کرتا ہے، دوائی بھی عالمی ادارہ صحت کی تجویز پر خریدتے ہیں اور نوازشریف کا بھی بیانیہ وہی ہے جو پہلے تھا اس سے عوام کو کوئی فائدہ نہیں۔
