فیصل آباد : امیرجماعت اسلامی سراج الحق نے کہا ہے کہ شہباز شریف اور زرداری ایک دوسرے کو بلیک میل کررہے ہیں، ان دونوں کو عوام کی کوئی فکر نہیں۔
فیصل آباد میں ورکرزکنونشن سے خطاب کرتے ہوئے انہوں نے کہا کہ تاجر رہنماؤں کی جماعت اسلامی میں شمولیت پر شکرگزارہوں، عدل وانصاف کا نظام اور کلین گرین پاکستان بنائیں گے۔
امیر جماعت اسلامی نے کہا کہ شہباز شریف اور زرداری چاہتے ہیں کہ ان کے خلاف تمام کیسزختم ہوجائیں، انہوں نے قرضے لے کرپوری قوم کو مقروض بنادیا۔
ان کا کہنا تھا کہ شہباز، عمران، زرداری، اسحاق ڈار اور پرویزالٰہی کی جائیدادیں بیچ کر ملک کا قرض اتارا جائے، اب آپ کی جگہ اقتدارنہیں بلکہ جیل میں ہے۔
سراج الحق نے کہا کہ 16 دسمبر ملکی تاریخ کا سیاہ ترین دن ہے، اے پی ایس پر حملے میں150سے زائد طلبا شہید ہوئے، ان کا کہنا تھا کہ یہ ملک کلمے کی بنیاد پر بنایا گیا تھا،سیاسی قیادت، اسٹیبلشمنٹ اور بیورو کریسی کی وجہ سے ملک دو ٹکڑے ہوا۔
سراج الحق نے کہا کہ ان سیاستدانوں کے اثاثے اربوں ڈالر کے ہیں، بلاول نے اپنےگھر کی قیمت 50لاکھ روپے بتائی ہے، میں بلاول ہاؤس 2کروڑ روپے میں خریدنے کو تیار ہوں، ان لوگوں کی سیاست کی بنیاد جھوٹ اور فراڈ پر مبنی ہے، یہ امریکی غلام ورلڈبینک اورآئی ایم ایف کے ایجنڈے پر ہیں، یہ تمام سیاستدان کرپشن اور سودی نظام پر ایک ہیں۔
