پشاور : امیر جماعت اسلامی سراج الحق نے کہا ہے کہ ہمارا اصل سرمایہ اور قوت ایٹم بم نہیں بلکہ نوجوان ہیں، ملک کو اسلامی انقلاب کی ضرورت ہے۔
ان خیالات کا اظہار انہوں نے پشاور میں یوتھ کنونشن سے خطاب کرتے ہوئے کیا۔ امیر جماعت اسلامی سراج الحق کا کہنا تھا کہ ہم پاکستان کو ایک اسلامی اور نظریاتی پاکستان بنائیں گے، تبدیلی کا آغاز اپنی ذات سے کریں گے، ملک کو اسلامی انقلاب کی ضرورت ہے۔
انہوں نے کہا کہ پاکستان میں 65 فیصد سے زائد نوجوان ہیں، ہمارا اصل سرمایہ اور قوت ایٹم بم نہیں بلکہ یہی نوجوان ہیں، پاکستان کے نوجوان کسی فرد، ظالم لٹیرے یا کرپٹ لیڈر کے پیچھے نہ جائیں، علامہ اقبالؒ کے خواب کی تعبیر صرف نوجوان ہی پوری کر سکتے ہیں۔
سراج الحق نے کہا کہ ڈالر کے مقابلے میں روپے کی قدر انتہائی کم ہو چکی ہے، حکومت کے پاس سنجیدہ پروگرام نہیں ہے اور آج بھی حکمران ورلڈ بینک اور آئی ایم ایف کی جانب دیکھ رہے ہیں۔
انہوں نے کہا کہ ہر5سال بعد حکومت تو تبدیل ہوجاتی ہے مگر عوام کی قسمت نہیں بدلتی، پورے خطے میں صرف پاکستان کو ہی کیوں معاشی تباہی کا سامنا کرنا پڑرہا ہے۔
