حیدرآباد : کوٹری سائٹ ایریا میں سی ٹی ڈی اور دہشت گردوں کے درمیان مقابلے میں 2مبینہ دہشت گردوں کو زخمی حالت میں گرفتار جبکہ ایک فرار ہونے میں کامیاب ہوگیا۔
کاؤنٹر ٹیرر ازم ڈیپارٹمنٹ (سی ٹی ڈی) کے مطابق دو دہشت گردوں کو زخمی حالت میں گرفتار کرلیا گیا جبکہ ایک دہشت گرد فرار ہوگیا۔
گرفتار ملزمان سے بھاری تعداد میں بارودی مواد سمیت دیگرسامان بھی برآمد کرلیا گیا، دہشت گردوں کی گرفتاری کے بعد بی ڈی ایس عملہ طلب کرلیا گیا، پولیس کے مطابق مقابلے کے دوران ایس ایچ او آصف حیات کو دو گولیاں لگیں جو بلٹ پروف جیکٹ پر لگی جس کی وجہ سے وہ محفوظ رہے۔
ڈی آئی جی سی ٹی ڈی آصف اعجازشیخ نے بتایا کہ کوٹری میں کارروائی کیلئے جانے والی سی ٹی ڈی حیدرآباد کی ٹیم پر فائرنگ کی گئی، اس دوران ایس ایچ او آصف حیات کو ماری جانے والی دو گولیاں بلٹ پروف جیکٹ پرجالگیں۔
ڈی آئی جی سی ٹی ڈی کے مطابق دھماکا خیز مواد کے معائنہ کیلئے بم ڈسپوزل اسکواڈ کو فوری طور پر طلب کیا گیا ہے، گرفتار دہشت گردوں کا تعلق کالعدم ایس آر اے سے ہے۔
