Tag: skin care

خواتین بے حد محنت اور وقت صرف کر کے خود کو سنوارتی ہیں ان کی تمام ترمحنت کا مقصد خوبصورت اور پرکشش نظرآنا ہوتا ہے۔ یہ ایک حقیقت ہے کہ قدرت نے صنفِ نازک کو حسن عطا کیا تو ساتھ ہی اس حسن کی حفاظت اور تزئین و آرائش کا شعور بھی عطا کیا ہے۔ یہ شعور وقت، حالات اورزمانے کی تیزرفتارترقی کے اعتبار سے تبدیل ہوتا رہتا ہے جو فیشن کہلاتا ہے اورپھرموسم بھی اثرانداز ہوتے ہیں یوں تو سبھی موسم اچھے ہوتے ہیں لیکن گرمیوں کے موسم میں حبس اور تیزگرمی ہونے سے جلد پر بھی اثرات مرتب ہوتے ہیں۔

موسمِ گرما میں جلد کے اپنے مسائل ہیں خاص طور پرجلد اگرچکنی ہو تو تیل پونچھ پونچھ کرتنگ آجاتے ہیں سورج کی حدت جلد کو نہ صرف جھلسا دیتی ہے بلکہ رنگت بھی سیاہ ہو جاتی ہے۔

گرمیوں کے موسم میں چہرے پر سے شادابی ختم ہوجاتی ہے جو کافی بدنما معلوم ہوتی ہے اسے نکھارنے اور تر و تازہ کرنے کے لئے پانی کا استعمال زیادہ سے زیادہ کریں ٹھنڈی تاثیر والی چیزیں کھائیں، گرمی کے موسم میں درجہ حرارت زیادہ ہونے کی وجہ سے پسینہ زیادہ آتا ہے تا کہ جسم کا اندرونی درجہ حرارت نارمل رہ سکے اس کی وجہ سے جلد کو بہت زیادہ کام کرنا پڑتا ہے اس کے مسام کھل جاتے ہین ان میں میل کچیل جمع ہو کربد نما دانے بناتے ہیں اس سے بچنے کےلئے کم از کم تین سے چار مرتبہ چہرہ دھوئیں گھر سے باہر نکلیں تو کوشش کریں کہ چھتری کا استعمال کریں۔

اگر حجاب یا اسکارف پہنیں تو ہلکے یا سفید رنگ کا استعمال کریں کیونکہ سیاہ رنگ گرمی جذب کرتا ہے گلاسز اور سن بلاک لگانا نہ بھولیں۔ یاد رکھیں ایک بارلگایا ہوا سن بلاک پورے دن کےلئے کافی نہیں ہوتا بلکہ بارباراستعمال کرنا پڑتا ہے۔

آپ کو معلوم ہونا چاہیئے کہ آپ کی جلد کیسی ساخت کی حامل ہے چکنی، خشک، نارمل، یا ملی جلی ہرجلد کے اپنے مسائل ہوتے ہیں جو بھی پروڈکٹ خریدیں وہ جلد کی مناسبت سے خریدیں اور خریدتے وقت اس پرپروڈکٹ بننے کی تاریخ اورمدت ختم ہونے کی تاریخ ضرور دیکھیں عام طور پر میک اپ کی اشیاء ایک سال تک قابلِ استعمال رہ سکتی ہیں۔

چکنی جلد

---

اس کی نشانی یہ ہے کہ ماتھا، ناک، ٹھوڑی چکنی باقی چہرہ خشک ہوتا ہے چکنی جلد کی حامل خواتین کو عموما، دانے کیل مہاسے، کی شکایت رہتی ہے گرمیوں میں تو ان میں اضافہ ہوجاتا ہے ان کےلئے ملتانی مٹی کا ماسک بہترین حل ہے اسکے علاوہ نیم کے پتوں کو ابال کرپانی ٹھنڈا کرکے منہ دھوئیں تو مہاسوں میں کمی آسکتی ہے۔

خشک جلد

---

خشک جلد والی کواتین کی جلد گرمیوں میں نارمل رہتی ہے سردیوں میں اکڑجاتی ہے داغ دھبے جھائیاں اور جھرئیاں ہونے لگتی ہیں ان خواتین کے لئے مشورہ ہے کہ شہد، زیتون کا تیل، عرق گلاب ملا کرلگائیں تو جلد کی خوبصورتی برقرار رہتی ہے۔

نارمل جلد

---

یہ نہ زیادہ خشک نہ چکنی اس قسم کی جلد کےلئے زیادہ محنت نہیں کرنی پڑتی ذرا سی توجہ اور احتیاط سے بھی خواتین اپنی خوبصورتی برقرار رکھ سکتی ہیں گرمیوں میں جب دھوپ میں سے آئیں تو عرق گلاب کا چھڑکاؤ چہرے پرکرلیں۔ اسپرے والے عرق گلاب بازار میں دستیاب ہیں اس کے علاوہ کلیزنگ کریم استعمال کر سکتی ہیں۔

کلینزنگ کریم گھر پربنانے کی آسان ترکیب

---

قابلِ اعتبار کلینزنگ کریم گھرپربنانے کے لئے ایک کھانے کا چمچ سوکھا دودھ اور چند قطرے عرق گلاب لے کر مکس کرلیں اورچہرے کے ساتھ ساتھ گردن پربھی لگائیں کیونکہ کچھ خواتین گردن کی طرف توجہ نہیں دیتی جس کی وجہ سے گردن کالی اور بری لگتی ہے چہرے سے ہم رنگ کرنے کےلئے یہ نسخہ بہت کارآمد ہے۔

جھائیاں دور کرنے کا آسان طریقہ

---

ان سب باتوں کے علاوہ اگر چاہتی ہیں کہ آپ کی جلد پر جھائیاں نہ ہوں اورجلد تروتازہ رہے تو آپ متوازن غذا کا استعمال کریں اور سمندری جھاگ تھوڑے سے لیمن جوس میں ملا کرلگائیں یا پھربنفشہ کی پتیاں روغن بادام میں پیس کرلگائیں ہلکے ہاتھوں سے مساج کریں، پانی خوب پئیں، موسم کے پھل کھائیں، نیند پوری کریں اورکام کے ساتھ ساتھ اپنا خیال بھی رکھیں خود کو وقت دیں تو گرمیوں کے موسم میں بھی تر و تازہ اور فریش نظر آسکتی ہیں۔