Tag: Smuggling attempt failed

ریاض : سعودی عرب کی بحری افواج نے سمندری حدود میں کامیاب کارروائی کرتے ہوئے منشیات کی بہت بڑی کھیپ اسمگل کرنے کی کوشش ناکام بنادی۔

سعودی ذرائع ابلاغ کے مطابق سعودی بحریہ نے تاریخ میں پہلی بار ریکارڈ مقدار میں نشہ آور میتھا فیٹامن (کرسٹل میتھ) ضبط کرلی جس کی مالیت سو ملین ڈالر سے زیادہ ہے۔

سعودی بحریہ نے اپنی تاریخ میں اتنی بڑی مقدار میں کرسٹل میتھ ضبط نہیں کی تھی، ذرائع کے مطابق پکڑی گئی میتھا فیٹامن ( کرسٹل میتھ) کا وزن 450کلو گرام سے زیادہ ہے۔

اس حوالے سے بحریہ فورس کے کمانڈر بریگیڈیئر سلیمان الفقیہ نے میڈیا کو بتایا کہ سعودی بحریہ نے اپنی تاریخ میں اتنی بڑی کامیابی کبھی حاصل نہیں کی، کامیاب آپریشن میں مونٹروز جہاز بھی شامل رہا۔

فورس کے ڈپٹی کمانڈر دین باسیت نے بتایا کہ اس آپریشن میں کئی ٹیموں نے حصہ لیا، ایک ٹیم ایسی بھی تھی جو سمندر میں پھنسے ہوئے لوگوں کو نکالنے میں مدد دیتی ہے۔

انہوں نے بتایا کہ مشترکہ فورس کی اس کارروائی میں دہشت گردی، اسمگلنگ اور قذاقی جیسی سرگرمیوں کے لیے سمندری ماحول سے ناجائز فائدہ اٹھانے والے عناصر کی تلاش پر مامور ٹیم سے بھی تعاون لیا گیا، بحریہ کی مشترکہ فورس نے تمام ٹیموں کے تعاون سے یہ آپریشن کرکے بڑی کامیابی حاصل کرلی۔

یاد رہے کہ مشترکہ سمندری فورس بحر احمر، خلیج عدن، بحر عرب، خلیج عمان اور بحرہند میں 303 ملین میل کے دائرے میں کام کررہی ہے، یہ منشیات اور اسلحہ کی سمگلنگ کے انسداد، جہاز رانی کی سلامتی اور بین الاقوامی تجارتی جہازوں کے لیے سمندری راستوں کی سلامتی پر مامور ہے۔