اسلام آباد : سوشل میڈیا پر منفی پروپیگنڈا پھیلانے کے الزام میں پی ٹی آئی کے 16 افراد جے آئی ٹی میں دوبارہ طلب کرلیے گئے۔
اس حوالے سے جے آئی ٹی ذرائع کا کہنا ہے کہ پی ٹی آئی کے 16 افراد کو طلبی کے نوٹس جاری کر دیے گئے ہیں، تمام افراد کو18 مارچ کو جے آئی ٹی کے سامنے پیش ہونے کی ہدایت کی گئی ہے۔
ذرائع کے مطابق طلبی کے نوٹس وصول کرنے والوں میں تحریک انصاف کے رہنما فردوس شمیم نقوی، محمد خالد خورشید خان، میاں محمد اسلم اقبال، محمد حماد اظہر، عون عباس، محمد شہباز شبیر شامل ہیں۔
اس کے علاوہ طلبی کے نوٹس وصول کرنے والوں میں وقاص اکرم اور تیمور سلیم خان صبغت اللہ ورک، اظہر مشوانی، محمد نعمان افضل، جبران الیاس، سلمان رضا کا نام بھی شامل ہے۔
جے آئی ٹی ذرائع کا کہنا ہے کہ زلفی بخاری، موسیٰ ورک اور علی ملک کو بھی طلبی کا نوٹس جاری کیے گئے ہیں، جبکہ بیرسٹرگوہر، رؤف حسن اور شاہ فرمان جے آئی ٹی کے سامنے پیش ہو چکے ہیں۔
ذرائع کے مطابق 14 مارچ کو بانی پی ٹی آئی کی بہن علیمہ خانم طلبی کے باوجود پیش نہیں ہوئی تھیں، جنہیں اب 19 مارچ کو طلبی کا نوٹس جاری کر دیا گیا ہے۔
ذرائع کا مزید کہنا ہے کہ جے آئی ٹی ان تمام افراد سے شواہد کی روشنی میں تحقیقات کر رہی ہے، مذکورہ تحقیقات ریاست مخالف پروپیگنڈے کے حوالے سے کی جارہی ہیں۔
