ARYNews.tv | Urdu – Har Lamha Bakhabar

Tag: Social media

  • ثانیہ مرزا کی گود میں اپنے نومولود بیٹے کے ساتھ تصاویر سوشل میڈیا پر وائرل

    ثانیہ مرزا کی گود میں اپنے نومولود بیٹے کے ساتھ تصاویر سوشل میڈیا پر وائرل

    حیدرآباد : ثانیہ مرزا کی اپنے شیرخوار بیٹے کو گود میں لے کر اسپتال سے باہر آتے ہوئے تصویریں سوشل میڈیا پر وائرل ہوگئیں۔

    تفصیلات کے مطابق قومی ٹیم کے کرکٹر شعیب ملک کی اہلیہ اور بھارتی ٹینس اسٹار ثانیہ مرزا کی حیدرآباد دکن کے مقامی اسپتال سے ڈسچارج ہونے کے بعد باہر آنے کی تصویریں سوشل میڈیا پر وائرل ہوگئیں۔

    تصویروں میں وہ اپنے شیرخوار بیٹے اذہان کو گود میں لیے اسپتال سے باہر آرہی ہیں۔ شعیب ملک بیٹے کی ولادت کےبعد واپس یو اے ای چلے گئے ہیں جہاں نیوزی لینڈ سے سیریز جاری ہے۔

    مزید پڑھیں : شعیب ملک اور ثانیہ مرزا کے ہاں بیٹے کی ولادت

    واضح رہے کہ قومی کرکٹ ٹیم کے اسٹار کھلاڑی شعیب ملک اور ان کی بیوی ثانیہ مرزا کے ہاں30اکتوبر کو بیٹے کی پیدائش ہوئی تھی، شعیب ملک نے بیٹے کی پیدائش پرخوشی کا اظہار کرتے ہوئے سماجی رابطے کی ویب سائٹ ٹویٹر پر اپنے فینز کواس خبر کی اطلاع دی تھی۔

     

  • فیس بک میسنجر ایپ میں بڑی تبدیلیوں کا فیصلہ

    فیس بک میسنجر ایپ میں بڑی تبدیلیوں کا فیصلہ

    سانس فرانسسکو: سماجی رابطے کی سب سے بڑی ویب سائٹ فیس بک نے میسنجر ایپ میں بڑی تبدیلیوں کا فیصلہ کرلیا۔

    اطلاعات کے مطابق فیس بک کی جانب سے میسنجر ایپ کے ڈیزائن میں تبدیلی کی جائے گی جس کے تحت ٹیبز Tabs کو کم کر کے صارفین کے لیے اسے مزید آسان بنانے کی کوشش کی جائے گی تاکہ دورانِ استعمال دشواری کا سامنا نہ ہو۔

    ٹیکنالوجی پر نظر رکھنی والی ویب سائٹ کے مطابق فیس بک میسنجر ایپ میں تبدیلی کرتے ہوئے 9 کے بجائے صارفین کو تین ٹیبز مہیا کرے گی جن میں چیٹ ، لوگ (دوست)، ڈسکور شامل ہوں گے۔

    میسنجر کے نئے ورژن میں ممکنہ طور پر پیش کیے جانے والے تین Tabs میں سے ایک کی مدد سے دوسرے صارف سے چیٹ جبکہ دوسرے سے پہلے سے منسلک دوست اور تیسرے ٹیب سے گیمز تک رسائی حاصل کی جاسکے گی۔

    مزید پڑھیں: فیس بک میسج واپس لینے کا فیچر متعارف

    ماہرین کا یہ بھی مانناہے کہ فیس بک میسنجر کا ڈارک موڈ فیچر سمیت دیگر اور سہولیات بھی متعارف کروانے کا ارادہ رکھتی ہے تاکہ فارم کی ساکھ کو بحال رکھا جاسکے۔

    حال ہی میں فیس بک کے نائب صدر اسٹان کا کہنا تھاکہ ’گزشتہ کئی برسوں میں ہماری ٹیم نے میسنجر کے حوالے سے کافی مہارت حاصل کرلی، ایپ میں تبدیلیاں آسان نہیں تھیں البتہ اب ایسا ممکن ہے‘۔

    یاد رہے کہ فیس بک نے صارفین کی شکایات کو مدنظر رکھتے ہوئے مسینجر سے بھیجے جانے والے پیغام کو واپس لینے کے فیچر پر بھی کام شروع کردیا۔

    ٹیکنالوجی پر نظر رکھنے والی صحافی نے حال ہی میں ایک تصویر ٹویٹ کرتے ہوئے صارفین کو مطلع کیا کہ فیس بک نے ان سینڈ فیچر پر آزمائشی کام شروع کردیا جس کی سہولت صرف میسنجر پر دستیاب ہے۔

    یہ بھی پڑھیں: نوجوانوں کے نزدیک فیس بک قابل بھروسہ نہیں رہا، رپورٹ

    ان سینڈ فیچر کے تحت صارف غلطی سے بھیجے جانے والے پیغام کو واپس لے سکے گا۔ سماجی رابطے کی ویب سائٹ کے ترجمان نے اعلان کیا کہ کمپنی نے نئے فیچر پر کام شروع کردیا جسے پہلے آزمائشی طور پر محدود صارفین کے لیے متعارف کرایا گیا ہے۔

    قبل ازیں فیس بک صارفین کا دیرینہ شکوہ تھا کہ بعض اوقات غلطی سے اگر وہ کسی دوسرے صارف کو ان باکس پر میسج کردیتے ہیں تو اسے واپس نہیں لے سکتے۔

  • گوگل کا سوشل نیٹ ورک بند کرنے کا اعلان

    گوگل کا سوشل نیٹ ورک بند کرنے کا اعلان

    نیویارک: سماجی رابطے کی سب سے بڑی ویب سائٹ گوگل نے اپنے سوشل میڈیا پلیٹ فارم گوگل پلس کو بند کرنے کا حتمی اعلان کردیا۔

    تفصیلات کے مطابق گزشتہ روز کمپنی نے اعتراف کیا کہ فیس بک کے مد مقابل متعارف کرایا جانے والا سوشل میڈیا پلیٹ فارم گوگل پلس صارفین کو متاثر کرنے میں ناکام رہا۔

    کمپنی ترجمان کا کہنا تھا کہ ہیکرز نے نہ صرف ہمارے سسٹم تک رسائی حاصل کی بلکہ ہمارے صارفین کی معلومات کو دوسروں تک پہنچایا جس کے باعث اسے بند کرنے کا فیصلہ کیا گیا۔

    مزید پڑھیں: خدا حافظ ! گوگل پلس

    گوگل نے ساتھ میں یہ بھی اعلان کیا کہ وہ ہیکرز سے متاثر ہونے والے صارفین کا ڈیٹا یا اُن کی شناخت سامنے نہیں لائے گا البتہ مستقبل میں ان تمام اقدامات کو روکنے کے لیے گوگل پلس کو فوری بند کردیا گیا۔

    واضح رہے کہ امریکی اخبار نے گزشتہ دنوں ایک رپورٹ جاری کی تھی جس میں انکشاف کیا گیا تھا کہ ہیکرز نے 50 لاکھ سے زائد گوگل صارفین کے ڈیٹا تک رسائی حاصل کی اور وہ ان کے ای میلز بھی چیک کرتے ہیں۔

    یاد رہے کہ گوگل نے 2011 میں فیس بک کے مد مقابل گوگل پلس کے نام سے سوشل میڈیا کا پلیٹ فارم متعارف کرایا تھا، سن 2015 میں کمپنی نے اسے بند کرنے کا فیصلہ بھی کیا تھا۔

  • کھانے کے مضر صحت ہونے کی افواہیں، سوشل میڈیا صارفین کو حکومت نے متنبہ کردیا

    کھانے کے مضر صحت ہونے کی افواہیں، سوشل میڈیا صارفین کو حکومت نے متنبہ کردیا

    ابوظہبی: متحدہ عرب امارات کے حکام نے شہریوں کو متنبہ کیا ہے کہ وہ سوشل میڈیا پر کھانے کے مضرِ صحت ہونے کی افواہیں پھیلانے سے گریز کریں۔

    تفصیلات کے مطابق فوڈ کنٹرول اتھارٹی نے عوام کو خبردار کیا ہے کہ وہ کھانے کے مضر صحت ہونے یا کوالٹی پر کوئی بھی تبصرہ کرنے سے گریز کریں بالخصوص ایسی اشیا جن کے بارے میں انہیں معلوم نہیں اُس پر قیاس آرائیاں مہنگی پڑھ سکتی ہیں۔

    اے ڈی ایف سی اے کی جانب سے جاری رپورٹ کے مطابق سنہ 2013 سے 2018 تک کھانے کے مضر صحت ہونے کے حوالے سے مختلف لوگوں نے 49 افواہیں سوشل میڈیا پر پھیلائیں۔

    سرکاری محکمے نے شہریوں سے اپیل کی ہے کہ وہ کسی بھی شہ کے بارے افواہ پھیلانے سے اجتناب برتیں کیونکہ مخالف کمپنیاں اپنی پروڈکٹ کی مشہوری کے لیے دوسرے کے خلاف پروپیگنڈے سے کام لیتی ہیں۔

    ابوظہبی فوڈ کنٹرول اتھارٹی نے کھانے کی کوالٹی کی تصدیق کے حوالے سے بھی شہریوں کے لیے ٹیلی فون نمبر ، ٹوئٹر اکاؤنٹ اور ای میل سروس فراہم کردی۔ حکام کا کہنا ہے کہ شہری 800555 ، ای میل [email protected] یا ٹویٹر ایڈرس @adfca پر رابطہ کر کے کسی بھی افواہ کی تصدیق کریں۔

    واضح رہے کہ سوشل میڈیا صارفین کسی بھی خبر یا میسج کو بغیر تصدیق کے اپنے دوسرے دوستوں تک بھیج دیتے ہیں جس کے بعد لوگ اُس پر یقین کرنا شروع کردیتے ہیں۔

  • وزیر اطلاعات فواد چوہدری کا سوشل میڈیا پر جھوٹی خبروں کے خلاف ایکشن لینے کا عندیہ

    وزیر اطلاعات فواد چوہدری کا سوشل میڈیا پر جھوٹی خبروں کے خلاف ایکشن لینے کا عندیہ

    اسلام آباد : وزیر اطلاعات فواد چوہدری نے سوشل میڈیا پر جھوٹی خبروں کیخلاف ایکشن لینے کا عندیہ دے دیا اور کہا سوشل میڈیا پر جھوٹے نوٹی فکیشن اور خبریں پھیلائی جارہی ہیں۔

    تفصیلات کے مطابق وزیر اطلاعات فواد چوہدری نے سماجی رابطے کی ویب سائٹ ٹوئٹر پر سوشل میڈیا پر جھوٹی خبروں کیخلاف ایکشن لینے کا عندیہ دے دیا۔

    فواد چوہدری کا کہنا تھا کہ منصوبہ بندی کے تحت سوشل میڈیا پر جھوٹے نوٹیفیکیشن اور خبریں پھیلائی جارہی ہیں، ، یہ سب ایک میڈیا ڈنر میں لی جانے والی ایک تصویر سے شروع ہوا اور پھر ایک لائن لگ گئی ہے، سوشل میڈیا پر آزادی کو متاثر کئے بغیر جھوٹی خبروں کے خلاف سخت ایکشن لینے کی ضرورت ہے۔

    خیال رہے کہ گزشتہ چند روز سے سوشل میڈیا پر حکومت سے متعلق کچھ خبریں اور نوٹیفکیشن گردش کر رہے ہیں۔

    اس سے قبل بھی سوشل میڈیا پر تحریک انصاف کی کابینہ کی جعلی فہرستیں جاری کی گئی تھیں، جس کے بعد نعیم الحق نے تردید کرتے ہوئے کہا تھا کہ یہ فہرستیں پارٹی کے دشمنوں کی جانب سے پھیلائی جارہی ہیں۔

  • واٹس ایپ صارفین کے لیے خوشخبری

    واٹس ایپ صارفین کے لیے خوشخبری

    کیلی فورنیا: پیغام رسانی کی سب سے بڑی موبائل ایپلیکشن واٹس ایپ نے صارفین کی خواہش کو مدنظر رکھتے ہوئے ’ڈارک موڈ‘ کے نام سے نیا فیچر متعارف کرنے کا فیصلہ کرلیا۔

    تفصیلات کے مطابق موبائل فون کی معروف مسیجنگ ایپلیکشن واٹس ایپ کے دنیا بھر میں کروڑوں صارفین موجود ہیں جن کو سہولیات اور آسانیاں فراہم کرنے کے لیے کمپنی مختلف اوقات میں نت نئے فیچرز متعارف کرواتی ہے۔

    واٹس ایپ پر نظر رکھنے والے ادارے نے صارفین کو خوشخبری دی ہے کہ انتظامیہ کی جانب سے جلد ’ڈارک موڈ‘ فیچر متعارف کرایا جائے گا جس کے بعد صارفین موبائل اسکرین کی ہلکی روشنی میں بھی چیٹ کرسکیں گے۔

    ‘ویب بیٹا انفو’ کی جانب سے جاری کردہ ٹویٹ میں بتایا گیا کہ واٹس ایپ ’ڈارک موڈ‘ فیچر سمیت بہت سی خفیہ اپ ڈیٹس پر کام کررہا ہے جس کے لیے صارفین کو انتظار کرنا پڑے گا۔

    مزید پڑھیں: واٹس ایپ کا وہ فیچر آگیا جس کا صارفین کو انتظار تھا

    ٹویٹ میں یہ بھی بتایا گیا ہے کہ تمام آئی او ایس اور اینڈرائیڈ ورژن پر ڈارک موڈ فیچر کی سہولت فراہم کردی جائے گی۔ اس فیچر کے بعد واٹس ایپ استعمال کرنے والے صارفین کی آنکھوں پر زور کم پڑے گا اور اُسے اپنے پیغامات منفرد رنگ میں نظر آئیں گے۔

    اس فیچر کو کب متعارف کرایا جائے گا اس حوالے سے مزید تفصیلات سامنے نہیں آسکیں۔

    واضح رہے کہ واٹس ایپ انتظامیہ صارفین کی توجہ حاصل کرنے کے لیے مختلف اوقات میں جدید فیچرز متعارف کرواتی ہے تاکہ سماجی رابطے کی دنیا میں اس کا شمار صف اول میں ہی ہو۔ قبل ازیں واٹس ایپ نے رواں ماہ فروری میں گروپ آڈیو کالنگ کا فیچر متعارف کرایا تھا جسے صارفین نے بے حد پسند کیا تھا۔

    یہ بھی پڑھیں: فیس بک اور واٹس ایپ کے استعمال پر ٹیکس عائد

    فیس بک کے بانی اور واٹس ایپ کے مالک مارک زکر برگ نے دو ماہ قبل سال 2017 کی سالانہ رپورٹ جاری کی تھی جس کے مطابق دنیا بھر میں واٹس ایپ استعمال کرنے والے لوگوں کی تعداد ڈیڑھ ارب سے تجاوز کرگئی اور صارفین یومیہ 60 ارب سے زائد ایک دوسرے کو میسجز کرتے ہیں۔

  • کمرے میں سانپوں کی لڑائی، خاتون نے بہادری کی نئی مثال قائم کردی

    کمرے میں سانپوں کی لڑائی، خاتون نے بہادری کی نئی مثال قائم کردی

    کینبیرا: آسٹریلیا کے شہر برسبین میں واقع رہائشی گھر کے کمرے میں خطرناک سانپوں کی لڑائی کو براہ راست نشر کرنے والی خاتون نے بہادری کی نئی مثال قائم کر کے سب کو ورطہ حیرات میں ڈال دیا۔

    اگر کسی شخص کو سانپ کی موجودگی کا علم  ہوجائے تو وہ اُس مقام سے ہٹ جانے میں ہی عافیت سمجھتا ہے کیونکہ اُسے یہ اندیشہ ہوتا ہے کہ اگر اس نے ڈس لیا تو اُس کی جان جاسکتی ہے۔

    خواتین جو عام طور پر کمزور اعصاب کی مالک ہوتی ہیں وہ معمولی کیڑوں جیسے چھپکلی، لال بیگ کو دیکھ لیں تو خوف کے مارے اُس مقام سے دور بھاگتی ہیں مگر آسٹریلوی خاتون نے اپنی بہادری سے سب کو متاثر کردیا۔

    آسٹریلیا کے شہر برسبین میں واقع کین مور  کی رہائشی خاتون لانا فیلڈ جب کمرے میں واپس آئیں تو انہوں نے قالین پر دو بڑے سانپوں کو لڑتے ہوئے دیکھا جو ایک دوسرے سے بری طرح لپٹے ہوئے تھے۔

    خاتون سانپوں کو دیکھ کر خوف زدہ نہیں ہوئیں بلکہ اس لڑائی کو غور سے دیکھنے لگیں اسی دوران اُن کے دماغ میں ویڈیو بنانے کا خیال آیا تاہم انہوں نے بجائے ریکارڈ کرنے کے اس لڑائی کو فیس بک پر لائیو کردیا۔

    لانا کا کہنا ہے کہ ’مجھے کمرے میں سانپوں کو دیکھ کر ڈر لگا مگر پھر خوف کی زنجیروں کو توڑتے ہوئے ویڈیو بنائی جبکہ دونوں میرے قریب موجود تھے اور انہیں میری موجودگی کا علم بھی ہوگیا تھا‘۔

    بہادر خاتون کی ویڈیو سوشل میڈیا پر دیکھ کر صارفین نے اُن کی ہمت کو داد دی تو کچھ نے اس حرکت کو بہت بڑی حماقت قرار بھی دیا۔

    لانا فیلڈ نے ویڈیو بنانے کے بعد سانپ پکڑنے والوں کو فون کر کے اطلاع دی تو کچھ دیر بعد وہ کمرے میں پہنچے اور کافی دیر کی محنت کے بعد دونوں سانپوں کو پکڑا۔

  • شاہی خاندان پر تنقید، سوشل میڈیا صارفین پر سزا اور جرمانے کا اعلان

    شاہی خاندان پر تنقید، سوشل میڈیا صارفین پر سزا اور جرمانے کا اعلان

    ریاض : سعودی حکام نے سوشل میڈیا پر  شاہی خاندان پر تنقید اور اشتعال انگیز مواد کی تشہیر کرنے پر قید اور 8 لاکھ ریال جرمانہ عائد کرنے کا عندیہ دے دیا۔

    تفصیلات کے مطابق سعودی عرب کے حکام کی جانب سے نیا قانون نافذ کیا گیا ہے جس کے تحت سوشل میڈیا ویب سایٹس پر سعودی شاہی خاندان پر تنقید کرنے اور مذہبی اقدار کا تمسخر اڑانے یا اشتعال انگیز مواد کے ذریعے عوامی جذبات کو اُبھارنے والے کو سزا دینے کا عندیہ دے دیا۔

    غیر ملکی خبر رساں ادارے کا کہنا تھا کہ سعودی حکومت کی جانب سے اعلان کیا گیا ہے کہ جو بھی شہری ریاست کے امن و استحکام کو سبوتاژ کرنے والے اور نا مناسب مواد کی تشہیر کرنے والے سوشل میڈیا صارفین کو 5 برس قید اور 8 لاکھ ریال جرمانے کا سامان کرنا ہوگا۔

    عرب میڈیا کے مطابق سعودی عرب کے حکمرانوں نے مذکورہ اقدامات سماجی رابطوں کی ویب سایٹس پر ملک و مذہب کے خلاف ہونے والے منفی پروپیگنڈے کو روکنے کےلیے اٹھائے گئے ہیں۔

    غیر ملکی خبر رساں ادارے کا کہنا ہے کہ سعودی عرب کی مذہبی شخصیت سلمان العودۃ کو قطر سے اچھے تعلقات استوار کرنے کے حق میں ٹویٹ کرنے پر گرفتار کرکے جیل منتقل کردیا گیا ہے۔

    عرب میڈیا کا کہنا ہے کہ سلمان العودۃ کے ٹویٹر پر ایک کروڑ چالیس لاکھ سے زائد فالوورز ہیں، سعودی حکومت کی جانب سے عدالت سے درخواست کی گئی ہے سلمان العودۃ کو سزائے موت کی سزا سنائی جائے۔

    یاد رہے کہ اس پہلے بھی سعودی حکومت شاہی خاندان پر تنقید کرنے والے سعودی مبلغ اور خواتین کے حقوق کے لیے آواز اٹھانے والے 7 سرگرم سماجی کارکن خواتین وکلاء کو گرفتار کرچکی ہے۔

  • ڈیجیٹل نشے سے چھٹکارے کے لیے نوجوانوں نے کوششیں شروع کردیں

    ڈیجیٹل نشے سے چھٹکارے کے لیے نوجوانوں نے کوششیں شروع کردیں

    سوشل میڈیا اور اسمارٹ فونز کا استعمال بہت سی پیچیدگیوں کا سبب بنتا ہے اور والدین پریشان رہتے ہیں کہ کس طرح اپنے بچوں کو اس لت سے دور رکھیں، حال ہی میں ایک ریسرچ میں پتہ چلا کہ امریکا میں خود نوجوان بھی اسمارٹ فون سے دور رہنے کی کوشش کر رہے ہیں۔

    ایک امریکی یونیورسٹی میں کی گئی تحقیق میں شامل زیادہ تر نوجوانوں نے بتایا کہ وہ اسمارٹ فون کا بہت زیادہ استعمال کرتے ہیں، تاہم ایک بڑی تعداد نے یہ بھی کہا کہ وہ اس استعمال کو کم کرنے کی کوشش کر رہے ہیں۔

    ماہرین کا کہنا ہے کہ سوشل میڈیا کے اس خطرناک پھیلاؤ کا سبب وہ اس کاروبار سے وابستہ افراد کو بھی سمجھتے ہیں۔ ان کے مطابق ایسی ایپس بنائی جارہی ہیں جو مستقل اپنے یوزر کو نوٹیفیکیشن بھیجتی رہتی ہیں جس کی وجہ سے یوزر ہر تھوڑی دیر بعد انہیں چیک کرنے پر مجبور ہوتا ہے۔

    مزید پڑھیں:  ڈیجیٹل دور میں ڈیجیٹل بیماریوں کو خوش آمدید کہیئے

    ریسرچ میں شامل ماہرین کے مطابق یہ صورتحال اس کاروبار سے وابستہ افراد کے لیے نہایت فائدہ مند ہے لہٰذا وہ مختلف ایپس کی صارف تک رسائی کو نہایت آسان بناتی ہیں تاکہ ان کی ڈیوائسز کی خریداری میں بھی اضافہ ہو۔

    تاہم اب ان کمپنیوں نے ہوش کے ناخن لیے ہیں اور گوگل اور ایپل اسکرین پر گزارے جانے والے وقت کو مانیٹر کر رہی ہیں۔ اسی طرح فیس بک، انسٹا گرام اور یوٹیوب نے بھی اسکرین پر گزارے جانے والے وقت کا حساب رکھنے کا فیچر متعارف کروایا ہے۔

    خیال رہے کہ کچھ عرصہ قبل کی جانے والی تحقیق میں خوفناک انکشاف ہوا تھا کہ جدید دور کی یہ اشیا یعنی کمپیوٹر، اسمارٹ فون اور ٹیبلیٹ وغیرہ نوجوانوں اور بچوں کو ڈیجیٹل نشے کا شکار بنا رہی ہیں۔

    ماہرین کے مطابق یہ ڈیجیٹل لت دماغ کو ایسے ہی متاثر کر رہی ہے جیسے کوکین یا کوئی اور نشہ کرتا ہے۔

    طبی بنیادوں پر کی جانے والی تحقیق سے پتہ چلا کہ اس لت کا شکار بچے اور نوجوان جب اپنی لت پوری کرتے ہیں تو ان کا دماغ جسم کو راحت اور خوشی پہنچانے والے ڈوپامائن عناصر خارج کرتا ہے۔

    اس کے برعکس جب وہ اپنی اس لت سے دور رہتے ہیں تو وہ بیزار، اداس اور بوریت کا شکار ہوجاتے ہیں۔ بعض بچے چڑچڑاہٹ، ڈپریشن، بے چینی اور شدت پسندی کا شکار بھی ہوگئے۔

  • ماں کے انتظار میں نڈھال ننھے پانڈا کی تصاویر وائرل

    ماں کے انتظار میں نڈھال ننھے پانڈا کی تصاویر وائرل

    چین میں اپنی ماں کے انتظار میں نڈھال ننھے پانڈے کی تصاویر سوشل میڈیا پر وائرل ہوگئیں۔

    چین کے وولونگ پانڈا کلب کی جانب سے سماجی رابطوں کی ویب سائٹ پر پوسٹ کی جانے والی تصاویر میں ایک ننھا پانڈا دکھائی دے رہا ہے جو اپنی ماں کا انتظار کر رہا ہے۔

    پانڈا کی ماں کھانا کھانے کی غرض سے دور ہے اور پانڈا اس کا انتظار کرتا ہوا نہایت نڈھال اور نیند میں اونگھتا معلوم ہورہا ہے۔

    سماجی رابطوں کی ویب سائٹ پر مقبول ہونے کے بعد لوگوں نے اس ننھے پانڈے سے ہمدردی کا اظہار کیا اور اس کی تنہائی پر افسوس بھی کیا۔