کراچی : فلسطینی عوام سے اظہار یکجہتی اور اسرائیلی فوج کی بربریت کیخلاف کراچی کی تمام مارکیٹیں اور تجارتی مراکز آج بند رہیں گے، شہر کی تاجر برادری نے عوام سے اپیل کردی۔
اے آر وائی نیوز کی رپورٹ کے مطابق تاجر رہنما رضوان عرفان نے تاجروں سے درخواست کی ہے کہ آج مارکیٹیں بند کرکے مظلوم فلسطینی بھائیوں سے مکمل یکجہتی کا مظاہرہ کریں۔
کراچی تاجر اتحاد کے رہنما جمیل پراچہ کا کہنا ہے کہ کراچی کے تاجر غزہ کے لوگوں کے ساتھ ہیں، جبکہ تاجر رہنما شاکر فینسی نے کہا کہ میٹھادر اولڈ سٹی ایریا اور صرافہ بازار بھی بند رہے گا۔
رپورٹ کے مطابق غزہ میں اسرائیل کی بربریت اور بدترین ظلم کیخلاف کراچی کی ہول سیل مارکیٹیں بھی بند رہیں گی۔
تاجر رہنما عبدالرؤف ابراہیم نے کہا کہ ملک کی سب سے بڑی ہول سیل مارکیٹ جوڑیا بازار آج بند رہے گی۔
اس کے علاوہ آرام باغ ٹریڈرز ایسوسی ایشن نے کراچی کے تاجروں کی اس ہڑتال کی مکمل حمایت کا اعلان کیا ہے، جوڑیا بازار کی تمام میڈیسن مارکیٹ کے جنرل سیکریٹری اسلم پولانی نے کہا کہ میڈیسن مارکیٹس بھی بند رہیں گی۔
مزید پڑھیں : اسرائیل کیخلاف عالمی سطح پر ہڑتال کا اعلان
واضح رہے کہ فلسطینی قومی اور اسلامی افواج کے گروپ نے غزہ پر اسرائیل کی جنگ کے خلاف آج بروز پیر کو عالمی سطح پر ہڑتال کا اعلان کیا ہے۔
ایک بیان میں انہوں نے غزہ کے ہولناک مناظر اور اسرائیلی حملوں سے ہونے والی اموات کی بڑھتی ہوئی تعداد کو اجاگر کرنے کی ضرورت پر زور دینے کے لیے ہڑتال کا مطالبہ کیا۔
بیان میں جنگ کے خاتمے کے لیے مقامی اور بین الاقوامی کوششوں کو متحد کرنے کی اہمیت پر زور دیا گیا اور غزہ میں اسرائیلی جرائم اور فلسطینیوں کے حقوق کی خلاف ورزیوں کا احتساب کرنے پر زور دیا۔
اسرائیل نے ماہ رمضان کے دوران جنگ بندی کی خلاف ورزی کرتے ہوئے 18 مارچ کو غزہ کی پٹی میں اپنی فوجی کارروائیاں دوبارہ شروع کی تھیں۔
اسرائیلی فوج نے حالیہ جنگ بندی کے بعد زمینی اور فضائی حملوں میں سینکڑوں بچوں سمیت ہزار سے زائد فلسطینیوں کو شہید کر دیا جب کہ سات اکتوبر 2023 سے جاری صہیونی ریاست کی بربریت اب تک 50 ہزار سے زائد فلسطینیوں کی زندگیاں نگل چکی ہے۔
