Tag: South Carolina

فلوریڈا: طوفان ایان نے ریاست فلوریڈا اور جنوبی کیرولائنا میں تباہی مچا دی، مختلف حادثات کے دوران ہلاکتوں کی تعداد 66 ہو گئی، جب کہ مختلف علاقوں میں ایمرجنسی نافذ ہے۔

تفصیلات کے مطابق سمندری طوفان ایان کے باعث امریکی ریاستوں جنوبی کیرولائنا اور فلوریڈا کے مختلف علاقوں میں نظام زندگی مفلوج ہو چکا ہے، ہزاروں افراد بے گھر ہو چکے ہیں، اور لاکھوں افراد بجلی سے محروم ہیں۔

فلوریڈا میں ہر طرف پانی ہی پانی ہے، ریسکیو کا کام بھی جاری ہے، لوگوں کو ہیلی کاپٹر کے ذریعے نکالا جا رہا ہے۔ ہفتے تک، صرف فلوریڈا کے جنوب مغربی ساحل کے ساتھ سیلاب زدہ علاقوں سے ایک ہزار سے زیادہ لوگوں کو بچایا گیا۔

تباہی اور کاروبار بند ہونے سے امریکی معیشت کو اربوں ڈالر کا نقصان ہوا، جس کا ابتدائی تخمینہ 40 ارب ڈالر لگایا گیا ہے، امریکی صدر جو بائیڈن کل سے متاثرہ علاقوں کا دورہ کریں گے۔

فلوریڈا کے درجنوں باشندے ہفتے کے روز کشتیوں اور ہوائی جہاز کے ذریعے اپنے سیلاب زدہ اور بکھرے ہوئے گھروں کو چھوڑ کر چلے گئے، جب کہ ریسکیو ٹیمیں زندہ بچ جانے والوں کی تلاش جاری رکھے ہوئے ہیں۔

جنوبی کیرولائنا اور شمالی کیرولائنا میں حکام نے طوفان کے نقصانات کا جائزہ لینا شروع کر دیا ہے۔

طوفان ایان ہفتے کے روز کمزور پڑ گیا ہے، جب یہ بحر اوقیانوس کے وسط میں داخل ہوا تھا، تاہم ساحلوں پر طوفان نے بڑا نقصان پہنچایا، بڑی کشتیاں ساحل پر عمارتوں میں گھس گئیں اور گھروں کی چھتیں اکھڑ گئیں۔

فلوریڈا میں تصدیق شدہ زیادہ تر اموات طوفانی پانی میں ڈوبنے سے ہوئیں، دیگر ایان کے المناک اثرات سے ہلاک ہوئے، حکام نے بتایا کہ ایک بوڑھے جوڑے کی موت اس وقت ہوئی جب وہ بجلی سے محروم ہو گئے اور ان کی آکسیجن مشینیں بند ہو گئیں۔

جنوبی کیرولائنا: سمندری طوفان ایان امریکی ریاست جنوبی کیرولائنا سے ٹکرا گیا، جس سے ریاست میں سیکڑوں گھر تباہ ہو گئے۔

امریکی میڈیا کے مطابق سمندری طوفان ایان کیوبا اور فلوریڈا میں تباہی مچانے کے بعد ریاست جنوبی کیرولائنا سے بھی ٹکرا گیا ہے، سمندری طوفان کے باعث سی این این کے مطابق مختلف حادثات میں ہلاکتوں کی تعداد 45 ہو گئی ہے۔

ایان نے جمعہ کو کیٹگری 1 کے سمندری طوفان کے طور پر جارج ٹاؤن، جنوبی کیرولائنا کے قریب لینڈ فال کیا، دو دن قبل یہ سمندری طوفان فلوریڈا کے جنوب مغربی ساحل سے کیٹیگری 4 کے ہریکن کے طور پر ٹکرایا تھا۔

ایان اب ایک پوسٹ ٹراپیکل سائیکلون ہے جو شمالی کیرولائنا اور ورجینیا میں داخل ہو گیا ہے، بی بی سی کے مطابق سمندری طوفان کی قوت میں کمی آ گئی ہے، تاہم خطرہ ٹلا نہیں ہے، فلوریڈا سمیت پورے خطے میں کئی دنوں تک سیلاب جاری رہنے کا امکان ہے۔

سمندری طوفان کی زد میں آنے والے بوڑھے امریکی کی ویڈیو وائرل

اس سمندری طوفان سے کئی علاقوں میں سیکڑوں گھر تباہ ہو چکے ہیں، سیلابی ریلے کئی گاڑیوں کو بہا لے گئے، سڑکیں، پُل اور ریلوے لائنز ٹوٹ پھوٹ کا شکار ہو چکی ہیں۔

درخت جڑوں سے اکھڑ گئے، مواصلات کا نظام بھی درہم برہم ہو گیا ہے، 25 لاکھ افراد بجلی سے محروم ہیں۔ طوفان کے جنوبی کیرولائنا سے ٹکرانے کے بعد سے ساحلی علاقوں میں تیز ہواؤں کے ساتھ بارش کا سلسلہ جاری ہے۔