Tag: Southern Punjab

اسلام آباد : وزیراعظم عمران خان کے مشیر شہزاد ارباب نے کہا ہے کہ50لاکھ گھروں کے منصوبے کو ہرصورت مکمل کیا جائے گا، جنوبی پنجاب کو الگ صوبہ بنانے پر کام جاری ہے۔

یہ بات انہوں نے میڈیا سے گفتگو کرتے ہوئے کہی، انہوں نے کہا کہ حکومت کی کارکردگی رپورٹ ویب سائٹ پراپ لوڈ کی ہے، اس رپورٹ پرعوام اپنے رائے سے ہمیں ضرور آگاہ کریں، وفاقی حکومت نے18نکات کو مکمل کیا اب14پر تیزی سے کام جاری ہے۔

اس کے علاوہ خیبرپختونخوا، بلوچستان، پنجاب کی حکومتیں بھی عوام کو اپنی کارکردگی سے آگاہ کریں گی، شہزادارباب کا کہنا تھا کہ بیرون ملک چھپائے گئےاثاثوں کا سراغ لگایا گیا، سوئٹزرلینڈ اوربرطانیہ کے ساتھ معاہدے بھی نکات میں شامل ہیں، معاہدوں سے غیرقانونی جائیداد اور اثاثوں کی تفصیلات فراہم کی جائیں گی۔

وزیراعظم کے مشیر نے مزید کہا کہ50لاکھ گھروں کے منصوبے کو ہرصورت مکمل کیا جائے گا، مکانات کی تعمیر سے روزگار کے لاکھوں مواقع پیدا ہوں گے، سماجی اقتصادی پروگرام پر وزیراعظم خصوصی توجہ دے رہے ہیں ۔

ہم نے درست سمت کا تعین کردیا ہے اور آئندہ ماہ پہلی قومی صحت پالیسی کا اعلان بھی کردیا جائے گا، صحت انصاف کارڈ کا دائرہ وسیع کیا جارہا ہے،اس کا اطلاق دو ماہ میں ہوگا۔

انہوں نے کہا کہ تعلیم تک رسائی اور معیار پر کوئی سمجھوتہ نہیں کیا جائے گا، ملک بھرمیں یکساں نصاب تعلیم کیلئے قومی نصابی کونسل تشکیل اور وزیراعظم ہاؤس کو یونیورسٹی میں تبدیل کیا جارہا ہے۔

شہزاد ارباب نے کہا کہ جنوبی پنجاب کو الگ صوبہ بنانے پر کام جاری ہے، اس کیلئے سالانہ ترقیاتی پروگرام الگ ہوگا، جنوبی پنجاب کیلئے الگ ایڈیشنل چیف سیکریٹری اورآئی جی پی ہوگا،30جون2019سے پہلے جنوبی پنجاب کیلئے الگ سیکریٹریٹ بنادیا جائے گا، این ایف سی کا3فیصد قبائلی اضلاع کو دینے کا فیصلہ کیا گیا ہے۔