Tag: Special Investment Facilitation Council

اسلام آباد: ملکی معاشی ترقی کا ایک اور تابناک باب رقم ہونے کے قریب ہے، پاکستان کے روشن مستقبل کی جانب سفر کو تیز تر کرنے کے لیے کل اسلام آباد میں بڑا آئی ٹی سیمینار منعقد ہوگا۔

تفصیلات کے مطابق ایس آئی ایف سی کا اہم جز آئی ٹی ملکی معاشی انقلاب کی جانب تیزی سے کوشاں ہے، اس سلسلے میں اسلام آباد میں 20 جولائی کو ایک بڑے آئی ٹی سیمینار کا انعقاد کیا جائے گا۔

سیمینار میں بین الاقوامی مندوبین اور سرمایہ کار بھی شرکت کریں گے، گورنر اسٹیٹ بینک، چیئرمین ایف بی آر اور خلیجی ممالک، چین اور یورپی یونین کے سفارت کار اور آئی ٹی کے شعبے سے تعلق رکھنے والی کاروباری شخصیات کی شرکت بھی متوقع ہے۔

سیمینار کا بنیادی مقصد پاکستان میں آئی ٹی شعبے کی استعداد اور صلاحیتوں کو عالمی سطح پر اجاگر کرنا ہے، تاکہ ملکی سرمایہ کاری کو دوام بخشا جا سکے، سیمینار کا انعقاد اسپیشل انوسٹمنٹ فیسیلیٹیشن کونسل کے زیر اہتمام معاشی ترقی کے بحالی منصوبے کی ایک کڑی ہے۔

6 لاکھ سے زائد آئی ٹی ملازمین، 30 سے زائد آئی ٹی پارک اور 190 ممالک میں آئی ٹی برآمدات کی بدولت پاکستان آئی ٹی شعبے میں نمایاں ابھرنے والے ممالک کا درجہ رکھتا ہے، پاکستان میں آئی ٹی شعبے سے منسلک برآمدات کی پیداواری قیمت دیگر ممالک کے مقابلے میں 70 فی صد کم ہے۔

آئی ٹی شعبے میں انقلاب ملکی معیشت کے دیگر شعبوں میں بھی ترقی کا باعث بنے گا، سیمینار کے اختتام پر چند اسٹارٹ اپس منصوبوں کا افتتاح بھی کیا جائے گا۔