تہران: امریکی صدر ڈونلڈ ٹرمپ کی جانب سے ایران کو متنبہ کرنے کے ردعمل میں ایرانی حکام نے بھی بھرپور جواب دینے کی دھمکی دی ہے۔
تفصیلات کے مطابق گذشتہ دنوں امریکی صدر ڈونلڈ ٹرمپ اور ایرانی صدر حسن روحانی کے درمیان لفظی جنگ دیکھنے میں آئی تھی جس میں دونوں ملکوں کے سربراہان نے ایک دوسرے پر سنگین اقدامات کی دھمکی دی تھی۔
غیر ملکی خبر رساں ادارے کے مطابق ایرانی وزارت خارجہ کی جانب سے جاری کردہ بیان میں کہا گیا ہے کہ ایران امریکا کی جانب سے ہر فیصلے اور اقدامات کا بھرپور اور برابری کی سطح پر جواب دے گا۔
ایران نے خبردار کیا ہے کہ اگر امریکا نے ایرانی تیل کی برآمدات کو روکنے کی کوشش کی، تو اس کا بھی برابری کی سطح پر جواب دیا جائے گا، ہر حالات سے نمٹنے کے لیے تیار ہیں۔
ایرانی صدرامریکا کودھمکیاں نہ دیں‘ ڈونلڈ ٹرمپ
خیال رہے کہ گذشتہ روز امریکی صدر ڈونلڈ ٹرمپ نے ایران کو خبردار کرتے ہوئے کہا تھا کہ وہ امریکا کے خلاف سخت زبان کے استعمال سے اجتناب کرے ورنہ اسے سنگین نتائج بھگتنا پڑیں گے۔
صدر ٹرمپ نے سماجی رابطے کی ویب سائٹ ٹویٹر پر اپنے پیغام میں یہ بھی کہا تھا کہ ایرانی صدر امریکا کو دھمکیاں نہ دیں ورنہ ایران کوایسا نقصان ہوگا تاریخ میں جس کی مثال مشکل سے ملے گی۔
یاد رہے کہ دو روز قبل ایرانی صدر حسن روحانی نے کہا تھا کہ امریکا کو اس بات کا ادارک ہونا چاہیے کہ ایران کے ساتھ جنگ تمام جنگوں کی ماں ہوسکتی ہے۔
ایرانی سفارت کاروں سے خطاب کرتے ہوئے حسن روحانی یہ بھی کہا تھا کہ مسٹرٹرمپ شیر کی دُم سے نہ کھیلیں ورنہ آپ کوصرف پچھتانا پڑے گا۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
