ممبئی: بھارتی ایئرلائن اسپائس جیٹ نے سیکڑوں ملازمین فارغ کرنے کا منصوبہ بنا لیا ہے۔
بھارتی میڈیا رپورٹس کے مطابق بھارت کی سستی ایئرلائن اسپائس جیٹ بحران کی شکار ہو گئی ہے، جس سے نکلنے کے لیے اس نے 1400 ملازمین کو فارغ کرنے کا منصوبہ بنایا ہے۔
اطلاعات کے مطابق ایئرلائن آنے والے دنوں میں اپنے ملازمین کو گلابی سلپس (ملازمتوں سے برطرفی کا پروانہ) حوالے کر سکتی ہے، ایئرلائن کا کہنا ہے کہ ملازمتوں میں اس کٹوتی کا مقصد اخراجات گھٹانا اور فضائی بیڑے کی سرگرمیوں کو معمول پر لانا ہے۔
اسپائس جیٹ اس وقت مالی پریشانیوں، قانونی جنگوں اور دیگر مشکلات کا سامنا کر رہی ہے، کمپنی کا کہنا تھا کہ اس کے طیاروں کی تعداد گھٹ چکی ہے اور ان کے مقابلے میں افرادی قوت زیادہ ہے، جس پر قابو پانے کے لیے ملازمین کو نوکری سے فارغ کرنے کا قطعی فیصلہ اس ہفتہ متوقع ہے۔
واضح رہے کہ ایئرلائن میں اس وقت 9 ہزار ملازمین کام کر رہے ہیں، جس میں دس سے پندرہ فی صد تخفیف کی جائے گی، کمپنی کے مطابق اس اقدام سے اسے سالانہ 100 کروڑ روپے تک کی بچت ہوگی۔
