راولپنڈی: آرمی چیف آف اسٹاف جنرل قمر جاوید باجوہ نے اولمپئن منصور احمد کے انتقال پر افسوس کا اظہار کرتے ہوئے اہل خانہ سے تعزیت کی۔
پاک فوج کےشعبہ تعلقاتِ عامہ (آئی ایس پی آر) سے جاری بیان کے مطابق آرمی چیف نے پاکستانی اولمپئن کے انتقال پر افسوس کا اظہار کیا اور اہل خانہ سے دلی تعزیت بھی کی۔
واضح رہے کہ این آئی سی وی ڈی میں زیر علاج قومی ہاکی ٹیم کے سابق گول کیپر منصور احمد گزشتہ روز کراچی میں طویل علالت کے بعد انتقال کرگئے تھے وہ عارضہ قلب میں مبتلا تھے۔
ایک روز قبل منصور احمد کی اچانک طبیعت خراب ہوئی جس کے بعد ڈاکٹرز نے انہیں انتہائی نگہداشت وارڈ میں داخل کیا اور جان بچانے کی ہر ممکن کوشش کی مگر وہ جانبر نہ ہوسکے۔
مزید پڑھیں: ہاکی لیجنڈ اولمپیئن منصور احمد انتقال کر گئے
اولمپئن کو کچھ دنوں قبل دل میں تکلیف محسوس ہوئی تھی، معاشی تنگدستی کے باعث انہیں کراچی کے جناح اسپتال میں داخل کیا گیا تھا جس کے بعد قومی کرکٹ ٹیم کے سابق کپتان اور آل راؤنڈر شاہد آفریدی نے اُن کے تمام علاج و معالجے کے اخراجات اٹھانے کا اعلان کیا تھا۔
خیال رہے کہ سنہ 1994 کے ہاکی ورلڈ کپ فائنل میں منصور احمد نے پینلٹی اسٹروک پر گول روک کر پاکستان کو عالمی چیمپئن کا اعزاز دلوایا تھا، انہوں نے دل کی تکلیف کے بعد بھارت جاکر علاج جانے کی خواہش کا اظہار بھی کیا تھا۔
قبل ازیں منصور احمد کا جون 2016 میں آپریشن ہوا تھا، جس میں ان کے دل میں پیس میکر لگا یا گیا تھا اور پھر وہ عارضی طور پر صحت یاب ہوگئے تھے۔ البتہ 2018 میں ان کی صحت تیزی سے بگڑی اور اپریل کے اوائل میں یہ رپورٹ سامنے آئی کہ ان کے دل میں خون پمپ کرنے کی صلاحیت محض 20 فیصد باقی رہ گئی۔
لیجنڈ گول کیپر کے کیریر پر ایک نظر
آپ نے 1986 سے 2000 تک قومی ہاکی ٹیم میں بحیثیت گول کیپر بہترین کارکردگی کا مظاہرہ کیا، اپنے کیریئر میں منصوراحمد نے 338 عالمی میچز کھیلے اور ایک وقت میں منصور احمد کو ایشیاء کے نمبر ون گول کیپر ہونے کا اعزاز بھی حاصل رہا، اولمپکس کھیلتے ہوئے آپ نے متعدد سلور اور گولڈ میڈلز اپنے نام کئے۔
