اکثر گھروں کی دیواروں پر بچوں کی شرارتوں یا کسی اور وجہ سے داغ دھبے پڑجاتے ہیں جو عام طریقوں سے صاف نہیں ہوپاتے، جس کی وجہ سے صاف ستھرا گھر بھی میلا سا نظر آتا ہے۔
آج ہم آپ کو ایک ایسی آسان سی ترکیب بتائیں گے جو آپ کی یہ مشکل آسان کردے گی اور دیواریں صاف ستھری اور چمک دار نظر آئیں گی۔
اے آر وائی ڈیجیٹل کے پروگرام گڈ مارننگ پاکستان میں حنا انیس نے خواتین کو اس مشکل سے چھٹکارے کیلیے ایک نسخہ بتایا جس پر عمل کرکے گھر کی دیواریں ٹائلز اور وال پیپر خراب ہونے سے بچائے جاسکتے ہیں۔
انہوں نے بتایا کہ ایک پیالی کے اندر ایک چمچ شیمپو، ایک چوتھائی چمچ بلیچ پاؤڈر اور دو گھونٹ پانی شامل کرکے اچھی طرح ملا لیں جس کے بعد وہ پیسٹ کی شکل میں تیار ہوجائے گا۔
اب اس پیسٹ میں دیوار صاف کرنے والے اسپنچ کو لگا کر متاثرہ حصوں پر لگائیں اور تھوڑی دیر بعد سادہ کپڑے سے صاف کرلیں دیوار لگے تمام داغ دھبے بالکل غائب ہوجائیں گے۔
حنا انیس نے کہا کہ یہ آسان سا طریقہ آپ کی زندگی میں بھی آسانی لاسکتا ہے اور آپ اپنے گھر کو چمکا بھی سکتے ہیں۔
