ARYNews.tv | Urdu – Har Lamha Bakhabar

Tag: STREET CRIME

  • اسٹریٹ کرائم : کراچی میں ایک ماہ کے دوران 5 ہزار سے زائد وارداتیں

    اسٹریٹ کرائم : کراچی میں ایک ماہ کے دوران 5 ہزار سے زائد وارداتیں

    کراچی پولیس نے ماہ جون میں ہونے والے جرائم کے اعداد و شمار جاری کر دیے، شہر میں اسٹریٹ کرائم کی مجموعی طور پر 5 ہزار 300 وارداتیں رپورٹ ہوئیں۔

    اے آر وائی نیوز کی رپورٹ کے مطابق کراچی میں اسٹریٹ کرائم کی وارداتیں کم نہ ہوسکیں، ماہ جون میں مجموعی طور پر 5ہزار 300سے زائد شہری گاڑیوں، موٹرسائیکل اور موبائل فون سے محروم ہوئے۔

    اسٹریٹ کرائم کی وارداتوں کے دوران گزشتہ ماہ جون میں 138شہریوں سے گاڑیاں چوری اور چھینی گئیں جبکہ شہریوں سے3883موٹرسائیکلیں چھینی گئیں۔

    رپورٹ کے مطابق 1436شہری موبائل فون سے محروم ہوئے، اس کے علاوہ جون میں اغوا برائے تاوان کے 2 کیسز اور بھتہ خوری کے کیسز رپورٹ ہوئے۔

    مزید پڑھیں : کراچی میں اسٹریٹ کرائم ، 10 ہزار سے زائد واقعات ریکارڈ

    یاد رہے کہ کراچی میں رواں سال 2025 کے پہلے دو ماہ کے دوران وارداتوں کے 10,356 واقعات ریکارڈ کئے گئے تھے۔

    اس حوالے سے پولیس حکام کا کہنا تھا کہ شہر قائد میں 2 ماہ کے دوران 10 ہزار سے زائد واقعات رپورٹ ہوئے، 2024 کے پہلے 2 ماہ کے مقابلے رواں برس ان جرائم کی شرح 28.18 فیصد کم ہے۔

  • اسٹریٹ کرائم میں ملوث ’چنوں گینگ‘ کے 7 ملزمان گرفتار

    اسٹریٹ کرائم میں ملوث ’چنوں گینگ‘ کے 7 ملزمان گرفتار

    کراچی: پولیس نے اسٹریٹ کرائم میں ملوث چنوں گینگ کے 7 ملزمان کو گرفتار کرلیا۔

    تفصیلات کے مطابق ایس ایس پی ویسٹ نے بتایا کہ کراچی میں اسٹریٹ کرائم میں ملوث ’چنوں گینگ‘ کے 7 ملزمان کو گرفتار کرلیا گیا، گرفتار ملزمان میں 5 عادی جرائم پیشہ ڈکیت ہیں۔

    ایس ایس پی حفیظ الرحمان کے مطابق گرفتار ملزمان کی شناخت عبداللہ، ساجد، زاہد، انس، شان، یوسف اور اکرم کے ناموں سے ہوئی ہے، ایک ملزم مسروقہ موبائل فون، اشیا اور اسلحہ ذخیرہ کرنے والا ہے۔

    حفیظ الرحمان نے بتایا کہ ایک ملزم چھینے گئے موبائل فون کے بدلے منشیات فراہم کرنے والا ہے، ملزمان اورنگی سے متصل مختلف علاقوں میں شہریوں کو لوٹتے تھے، ان سے استعمال ہونے والا 5 مختلف اقسام کا غیر قانونی اسلحہ برآمد ہوا۔

    ایس ایس پی کے مطابق ملزمان سے 16 موبائل فون اور 4 موٹر سائیکلیں بھی برآمد کرلی گئی، برآمد موٹر سائیکلیں پاکستان بازار، مدینہ کالونی، پیر آباد سے چھینی گئی تھی۔

    ایس پی حفیظ الرحمان نے مزید بتایا کہ ملزمان نے اتحاد ٹاؤن، مومن آباد اور مختلف علاقوں میں واردات کرنے کا انکشاف کیا ہے، ملزمان کی وارداتوں کی سی سی ٹی وی فوٹیجز بھی موجود ہیں۔

  • ویڈیو: پیدل لٹیروں نے موٹر سائیکل سوار کو لوٹ لیا

    ویڈیو: پیدل لٹیروں نے موٹر سائیکل سوار کو لوٹ لیا

    کراچی: شہر قائد کے علاقے میٹروول سائٹ ایریا میں فاطمہ مسجد کے قریب واردات میں پیدل چلتے مسلح لٹیروں نے موٹر سائیکل سوار شہری کو لوٹ لیا۔

    اس واردات کی سی سی ٹی وی فوٹیج اے آر وائی نیوز نے حاصل کر لی ہے، سی سی ٹی وی فوٹیج میں ویران سڑک پر 2 مسلح لٹیروں کو ٹہلتے ہوئے دیکھا جا سکتا ہے۔

    لٹیروں نے عقب سے آنے والے موٹر سائیکل سوار شہری پر اسلحہ تان لیا، اور شہری سے نقدی، موبائل فون اور قیمتی اشیا چھین لیں۔ لٹیرے جاتے جاتے شہری کی موٹر سائیکل بھی چھین کر لے گئے۔

    ویڈیو: کراچی پولیس کا چوکی انچارج منظم جرائم کی سرپرستی کرنے لگا

    سی سی ٹی وی فوٹیج میں بے بس شہری کو فرار ہوتے لٹیروں کے پیچھے دوڑ لگاتے دیکھا جا سکتا ہے۔

  • کراچی میں 24 گھنٹے کے دوران کتنی وارداتیں ہوئیں؟ رپورٹ تیار

    کراچی میں 24 گھنٹے کے دوران کتنی وارداتیں ہوئیں؟ رپورٹ تیار

    کراچی : ایڈیشنل آئی جی کراچی جاوید عالم اوڈھو نے وزیراعلیٰ سندھ سید مراد علی شاہ کو کراچی پولیس کی دن بھرکی ورکنگ رپورٹ روانہ کی ہے جو انہیں موصول ہوگئی۔

    اس حوالے سے ذرائع کا کہنا ہے کہ وزیراعلیٰ کو 24گھنٹوں کے دوران کراچی میں اسٹریٹ کرائم کی ہوانے والی واردارتوں سے متعلق آگاہی فراہم کی گئی ہے۔

    ایڈیشنل آئی جی کراچی جاوید عالم اوڈھو کی رپورٹ کے مطابق گزشتہ 24گھنٹے میں شہر بھر میں136اسٹریٹ کرائم کی وارداتیں رپورٹ ہوئیں۔

    ان136وارداتوں میں شہریوں سے42موبائل فون اور نقدی چھیننے کی واردتیں شامل ہیں، 7کاریں چوری ،5موٹرسائیکلیں چھیننے82چوری ہونے کی وارداتیں رپورٹ ہوئیں۔

    رپورٹ کے مطابق پولیس اور جرائم پیشہ افراد کے درمیان دو مقابلے ہوئے، ان مقابلوں میں2جرائم پیشہ افراد کو زخمی حالت میں گرفتار کیا گیا، مختلف چھاپوں میں 18جرائم پیشہ افراد کو رنگےہاتھوں گرفتار کیا گیا۔

    اس کے علاوہ ایڈیشنل آئی جی کراچی نے آگاہ کیا کہ 24گھنٹے میں147ملزمان کی گرفتاری عمل میں لائی گئی اور 22دیگرجرائم میں ملوث ملزمان گرفتار کئے گئے۔

  • فوٹیج: لٹیروں نے مسجد سے گھر جانے والے نمازی کو لوٹ لیا

    کراچی: ایک سی سی ٹی وی فوٹیج سامنے آئی ہے جس میں دیکھا جا سکتا ہے کہ لٹیروں نے مسجد سے گھر جانے والے نمازی کو لوٹ لیا۔

    تفصیلات کے مطابق ماڈل کالونی میں ایک شہری اسٹریٹ کرمنلز کو دیکھ کر دوڑا تو ملزمان نے مسجد سے گھر جانے والے نمازی کو ہی لوٹ لیا۔

    اسٹریٹ کرائم کی یہ واردات گزشتہ روز صبح سویرے ماڈل کالونی میں ہاشم رضا روڈ پر کی گئی، واردات کی سی سی ٹی وی فوٹیج اے آر وائی نیوز نے حاصل کی ہے، جس میں دیکھا جا سکتا ہے کہ دو موٹرسائیکلوں پر 4 ملزمان گلی کا چکر لگا رہے ہیں۔

    فوٹیج کے مطابق موبائل فون پر بات کرتے شہری کو لوٹنے کے لیے 2 لٹیرے پیدل آئے، لیکن پینٹ شرٹ میں ملبوس شخص نے اسلحہ دیکھتے ہی گلی میں دوڑ لگا دی۔

    اس دوران سڑک پر جاتے نمازی نے بھی لٹیروں کو دیکھ کر نکلنے کی کوشش کی، لیکن بدقسمتی سے سامنے سے آتے اسٹریٹ کرمنلز نے موٹر سائیکل آگے لگا کر انھیں روک لیا۔

    لٹیرے نمازی کو بازو سے پکڑ کر گلی کے کونے میں لے گئے، اور پھر اس کے ہاتھ اوپر کروا کر مکمل جامہ تلاشی لی اور سب کچھ نکال لیا۔ فوٹیج میں دیکھا جا سکتا ہے کہ شہری کو لوٹنے کے بعد لٹیرے اطمینان سے فرار ہو گئے۔

  • لاہور میں چوری اور ڈکیتی کی وارداتوں میں 200 گنا اضافہ

    لاہور میں چوری اور ڈکیتی کی وارداتوں میں 200 گنا اضافہ

    لاہور: صوبہ پنجاب کے دارالحکومت لاہور میں اسٹریٹ کرائم کا جن بے قابو ہوگیا، شہر میں روزانہ کی بنیاد پر 100 سے زائد وارداتیں ہورہی ہیں۔

    تفصیلات کے مطابق صوبہ پنجاب کے دارالحکومت لاہور میں چوری، ڈکیتی اور راہزنی کی وارداتوں میں 200 گنا اضافہ ہوگیا۔

    ذرائع کے مطابق شہر میں راہزنی کی روزانہ کی بنیاد پر وارداتیں 100 سے تجاوز کر گئیں۔

    سب سے زیادہ وارداتیں اقبال ٹاؤن ڈویژن میں ریکارڈ کی گئیں، شہر میں سب سے زیادہ موٹر سائیکل چوری کی وارداتیں ہورہی ہیں۔

    اس سے قبل رواں برس مارچ میں لاہور پولیس نے بتایا تھا کہ شہر میں ڈکیتی کی وارداتوں میں 282 فیصد جبکہ شاہراؤں پر لوٹ مار کی وارداتوں میں 123 فیصد اضافہ ہوگیا۔

    سال 2022 کے 2 ماہ 10 دن میں ہونے والے جرائم کی رپورٹ جاری کرتے ہوئے بتایا گیا تھا کہ مذکورہ عرصے میں 36 ہزار 993 مقدمات درج کیے گئے۔

    رپورٹ میں کہا گیا کہ اس عرصے میں 4 افراد ڈکیتی مزاحمت پر قتل ہوئے، ڈکیتی کی 5 ہزار کے لگ بھگ وارداتیں ہوئیں جن میں 21 گھروں میں وارداتیں کر کے کروڑوں لوٹ لیے گئے۔

    علاوہ ازیں مختلف واقعات میں 63 افراد قتل ہوئے، موٹر سائیکل و وہیکل چوری کے 4 ہزار سے زائد مقدمات درج کیے گئے جبکہ دکانوں میں ہونے والی ڈکیتیوں میں ڈاکوؤں نے متعدد تاجروں کی جمع پونجی لوٹ لی۔

  • ایم کیو ایم کا وزیر اعلیٰ سے اسٹریٹ کرائم روکنے کے لیے مربوط حکمت عملی بنانے کا مطالبہ

    ایم کیو ایم کا وزیر اعلیٰ سے اسٹریٹ کرائم روکنے کے لیے مربوط حکمت عملی بنانے کا مطالبہ

    کراچی: ایم کیو ایم نے وزیر اعلیٰ سندھ مراد علی شاہ سے شہر میں اسٹریٹ کرائمز روکنے کے لیے مربوط حکمت عملی بنانے کا مطالبہ کیا ہے۔

    تفصیلات کے مطابق کراچی میں بڑھتے ہوئے اسٹریٹ کرائمز سے متعلق پولیس چیف جاوید عالم اوڈھو کے بیان کے سلسلے میں ایم کیو ایم نے پیپلز پارٹی قیادت سے رابطہ کیا ہے۔

    ذرائع کا کہنا ہے کہ ایم کیو ایم کے ڈپٹی کنوینر خواجہ اظہار الحسن، کامران ٹسوری اور دیگر نے وزیر اعلیٰ سندھ مراد علی شاہ سے ملاقات کی ہے، جس میں سعید غنی اور ایڈمنسٹریٹر کراچی مرتضیٰ وہاب بھی موجود تھے۔

    ’کراچی پولیس چیف کےبیان کی سخت مذمت کرتے ہیں‘

    ذرائع کے مطابق ملاقات میں ایم کیو ایم کے وفد کی جانب سے کراچی میں بڑھتے ہوئے اسٹریٹ کرائم پر تشویش کا اظہار کیا گیا، ایم کیو ایم وفد نے اسٹریٹ کرائم کو روکنے کے لیے مربوط حکمت عملی بنانے کا مطالبہ کیا۔

    ایم کیو ایم کے وفد نے ملاقات میں گفتگو کرتے ہوئے کہا کہ جرائم میں ملوث افراد کو کڑی سزائیں دینا ہوں گی، جس کے لیے ماڈل کورٹس اور دہشت گردی کی دفعات بحال کی جائیں، وفد نے الیکشن کمیٹی کی بحالی کا بھی مطالبہ کیا۔

    یاد رہے کہ کراچی پولیس چیف جاوید عالم اوڈھو نے اسٹریٹ کرائم اور لوٹ مار کی وارداتوں پر قابو پانے کی بجائے اس کا ذمہ دار تاجروں کو قرار دیتے ہوئے کہا تھا کہ کراچی کی بزنس کمیونٹی سب سے زیادہ اپنی دشمن خود ہے، یہ واویلا کرتے ہیں، میڈیا پر لے آتے ہیں اورپھر کہتے ہیں ان کے پاس انوسمنٹ نہیں آ رہی، جب کہ لاہور میں کرائم یہاں سے زیادہ ہے وہ میڈیا پر نہیں آتا۔

  • کراچی کے شہری ڈکیتوں کے رحم و کرم پر، ڈکیتی مزاحمت پر سینکڑوں افراد قتل

    کراچی کے شہری ڈکیتوں کے رحم و کرم پر، ڈکیتی مزاحمت پر سینکڑوں افراد قتل

    کراچی: صوبہ سندھ کے دارالحکومت کراچی کے شہری جرائم پیشہ عناصر کے رحم و کرم پر آگئے، لوٹ مار کی وارداتوں کے دوران مزاحمت پر 350 افراد کو قتل کردیا گیا۔

    تفصیلات کے مطابق کراچی کے شہری گلی، محلوں، شاہراہوں اور گھر کے دروازوں پر لٹنے لگے۔ سٹیزن پولیس لیژن کمیٹی اور کراچی پولیس آفس نے شہر میں لوٹ مار کی وارداتوں کے اعداد و شمار جاری کردیے۔

    رپورٹ میں بتایا گیا کہ رواں سال کے 8 ماہ کے دوران 350 کے قریب شہری قتل ہوئے۔

    ڈکیتی مزاحمت پر 58 شہری جانوں سے ہاتھ دھو بیٹھے، یکم سے 5 ستمبر تک 8 شہری ڈکیتی مزاحمت پر جان سے گئے، جبکہ صرف 4 ستمبر اتوار کے روز کئی شہریوں کو خون میں نہلایا گیا۔

    رپورٹ کے مطابق اپنا مال بچانے کی کوشش میں 270 شہری زخمی ہوئے۔

    رپورٹ کے مطابق جنوری تا اگست 8 ماہ میں 32 ہزار سے زائد موٹر سائیکلیں چوری یا چھینی گئی، اس عرصے میں 13 سو کے قریب کاریں چوری یا چھینی گئیں۔

    17 ہزار سے زائد موبائل فون چھینے گئے، اغوا برائے تاوان کے 7 اور بھتہ خوری کے 3 کیسز ہوئے اور بینک ڈکیتی کی 2 وارداتیں ہوئی۔

    رپورٹ کے مطابق 31 جولائی تک گھروں میں 173 اور دکانوں میں 251 ڈکیتی کی وارداتیں ہوئیں، شہر میں 2 ہزار 725 مختلف ڈکیتی کی وارداتیں ہوئیں۔

  • شہر میں جرائم کی وارداتوں میں کمی آئی ہے: کراچی پولیس کا دعویٰ

    شہر میں جرائم کی وارداتوں میں کمی آئی ہے: کراچی پولیس کا دعویٰ

    کراچی: صوبہ سندھ کے دارالحکومت کراچی کی پولیس کا کہنا ہے کہ شہر میں جرائم کی وارداتوں میں کمی آئی ہے۔ 2 روز قبل ہی لوٹ مار کی واردات کے دوران حاملہ خاتون پر فائرنگ کی گئی ہے۔

    تفصیلات کے مطابق کراچی پولیس نے شہر قائد میں جرائم کے حوالے سے رپورٹ جاری کردی، رپورٹ میں کراچی کے آٹھوں ڈسٹرکٹس کا ڈیٹا شامل ہے۔

    رپورٹ میں کہا گیا کہ شہر میں موبائل فون چھیننے کی وارداتوں میں کمی واقع ہوئی، مارچ میں تمام ڈسٹرکٹس سے 2 ہزار 416 موبائل فون چھینے گئے جبکہ اپریل میں یہ تعداد 2 ہزار 118 رہی۔

    رپورٹ کے مطابق مارچ میں 206 جبکہ اپریل میں 183 کاریں چوری ہوئیں، مارچ میں 408 اور اپریل میں 346 موٹر سائیکلیں چھینی گئی۔

    مجموعی طور پر مارچ میں 7 ہزار 316 شہریوں سے چھینا جھپٹی ہوئی جبکہ اپریل میں لٹنے والے شہریوں کی تعداد 6 ہزار 628 رہی۔ مارچ کی نسبت اپریل میں 700 کم وارداتیں ہوئیں۔

    کراچی پولیس کا کہنا ہے کہ جرائم پیشہ عناصر کے خلاف کارروائیاں جاری ہیں۔

    خیال رہے کہ کراچی پولیس کی رپورٹ کے برعکس شہر میں عید الفطر کی تعطیلات کے دوران چور ڈاکو بے لگام رہے۔

    عید کے تیسرے روز نیو کراچی میں ڈاکوؤں نے ڈکیتی کے دوران حاملہ خاتون پر فائرنگ کردی، فائرنگ سے بچہ پیٹ میں ہی دم توڑ گیا جبکہ خاتون کی حالت نازک ہے۔

  • کراچی: ڈکیتی کے دوران حاملہ خاتون پر فائرنگ

    کراچی: ڈکیتی کے دوران حاملہ خاتون پر فائرنگ

    کراچی: صوبہ سندھ کے دارالحکومت کراچی میں عید الفطر کی تعطیلات کے دوران چور ڈاکو بے لگام ہوگئے، ڈکیتی کی واردات کے دوران 7 ماہ کی حاملہ خاتون پر فائرنگ کردی گئی۔

    تفصیلات کے مطابق عید الفطر کی 3 روزہ تعطیلات کے دوران شہر قائد میں چور ڈاکوؤں کو کھلی چھوٹ مل گئی، شہر میں چھینا جھپٹی کے بے شمار واقعات پیش آئے۔

    نیو کراچی میں ڈاکوؤں نے ڈکیتی کے دوران حاملہ خاتون پر فائرنگ کردی، خاتون کے شوہر کا کہنا ہے کہ وہ اہلیہ کے ساتھ کہیں جارہے تھے جب راستے میں ڈاکوؤں نے روکا۔

    ان کے مطابق ملزمان نے گاڑی روکنے کی کوشش کی، نہ رکنے پر 7 ماہ کی حاملہ خاتون کے پیٹ پر گولیاں برسا دیں، زخمی خاتون کو فوری طور پر عباسی شہید اسپتال منتقل کردیا گیا۔

    خاتون کے شوہر کا کہنا ہے کہ بچہ پیٹ میں ہی دم توڑ چکا ہے جبکہ خاتون کی حالت نازک ہے۔

    دوسری جانب نارتھ کراچی سیکٹر 7 ڈی میں ڈکیتی کی واردات ناکام بنا دی گئی، سی سی ٹی وی فوٹیج میں دیکھا جاسکتا ہے کہ عید کے نئے کپڑے پہنے 2 ملزمان موٹر سائیکل پر آئے، کم عمر ملزمان نے اسلحہ نکالا اور شہری سے موبائل چھین کر فرار ہونے لگے۔

    اس دوران شہری نے مزاحمت کی تو ملزم کا موبائل فون زمین پر گر گیا، دوسری جانب سیکیورٹی گارڈ نے بھی ہوائی فائرنگ کی۔ ملزم پلٹ کر واپس آیا اور زمین پر گرا ہوا اپنا موبائل فون اٹھایا۔

    دونوں ملزمان ناکام واردات کے بعد موقع سے فرار ہوگئے۔

    ایک اور واقعے میں ڈیفنس کے علاقے میں پولیس نے 2 ڈاکوؤں کو زخمی حالت میں گرفتار کرلیا۔ دونوں ملزمان سے پستول اور گولیاں برآمد ہوئیں، ملزمان کے 4 ساتھی فرار ہوگئے جن کی تلاش جاری ہے۔

    پولیس کا کہنا ہے کہ ملزمان کی فائرنگ سے پولیس موبائل کو بھی نقصان پہنچا، دونوں ملزمان کو اسپتال منتقل کر دیا گیا ہے۔