کراچی: سیکیورٹی خدشات کے باوجود پیپلزپارٹی نے بلاول ہاؤس اور اطراف سے بیریئرز ہٹانے کا فیصلہ کرلیا۔

پیپلزپارٹی کے شریک چیئرمین آصف علی زرداری نے اپنی ہی صوبائی حکومت کو ہدایت کی ہے کہ وہ بلاول ہاؤس اور اس کے اطراف میں لگے ہوئے تمام بیریئرز کو ہٹادیں۔

پیپلزپارٹی پارلیمنٹرین کی نائب صدر شیریں رحمان کے مطابق بلاول ہاؤس اورا س کے اطراف کے بیریئرز پیپلزپارٹی کے شریک چیئرمین آصف علی زرداری کی ہدایت پر ہٹائے جارہے ہیں۔

 واضح رہے کہ اس سے قبل جب ڈی جی رینجرز نے شہر بھر سے بیریئرز ہٹانے کی ہدایت کی تھیں تو اس دوران صوبائی حکومت نے بلاول ہاؤس کے اطراف لگے ہوئے بیریئرز کا دفاع کرتے ہوئے اپنے ہی ماتحت محکمہ داخلہ کے ذریعے ڈی جی رینجرز کو ایک خط لکھا تھا جس میں بیریئرز نہ ہٹانے کا کہا گیا تھا۔

تاہم ذرائع کے مطابق ڈی جی رینجرز نے بیریئرز ہٹانے کے معاملے پر کسی بھی تفریق کو ملحوظ خاطر نہ رکھنے کی ہدایت کی جس کے بعد اب پیپلزپارٹی نے بلاول ہاؤس اور اس کے اطراف رضاکارانہ طور پر بیریئرز ہٹانے کا فیصلہ کیا ہے ۔

 وزیراعلیٰ سندھ سید قائم علی شاہ یہ بھی کہہ چکے ہیں کہ بلاول ہاؤس کے اطراف بیریئرز نہیں سیکیورٹی کیلئے پولیس چیک پوسٹ قائم ہیں۔

کراچی: رینجرز نے کراچی کو رکاوٹوں سے پاک کرنے کا عزم کرلیا، بلاول ہاوس کے اطراف سے بھی رکاوٹیں ہٹائی جائیں گی رینجرز نے ہوم ڈپارٹمنٹ کو آگاہ کردیا۔

بدھ کو کراچی کے شہریوں کو از خود رکاوٹیں ہٹانے کی مہلت ختم ہوئی تو رینجرز ایم کیوایم کے مرکز نائن زیروکے اطراف رکاوٹوں کا جائزہ لینے پہنچی اور وہاں سے رخ کیا کراچی کی جنرل کالونی میں واقع سابق صدر پرویز مشرف کی رہائش گاہ کا اور سابق صدر پرویز مشرف کی سیکیورٹی پر لگائے گئے بیریئر ہٹادیئے۔

 اب خبر ہے کہ رینجرز نے سابق صدر آصف علی زرداری کی رہائش گاہ بلاول ہاوس کے اطراف لگے بیرئرز ہٹانے کا بھی فیصلہ کرلیا ہے۔

 ہوم ڈپارٹمنٹ کے لیے جواب تیار کرلیا گیا ہے،رینجرزکے جواب میں لکھا گیا ہے کہ کسی کو بھی رکاوٹیں کھڑی کرنے یا اہم شاہرائیں یا گلیاں بندکرنے کی اجازت نہیں دے سکتے، ہوم ڈیپارٹمنٹ نے ڈی جی رینجرزکو خط لکھا تھا جس میں کہا گیا تھا کہ بلاول ہاؤس کے باہر سے رکاوٹیں نہ ہٹھائی جائیں۔

رینجرز زرائع کا کہنا تھا کہ بلاول ہاؤس کی سیکیورٹی کیلئے پورے روڈ کو بند رکھنا غیر قانونی ہےلہذا ان راستوں کو کھول دیا جائے۔