لاہور : پنجاب کی نگراں حکومت نے شہر میں نافذ دفعہ 144 کی خلاف ورزی کرنے والے افراد کیخلاف سخت قانونی کارروائی کا حکم دے دیا، پولیس نے پی ٹی آئی کارکنان کو حراست میں لے کر تھانے منتقل کردیا۔
احکامات کے بعد لاہور پولیس نے چیئرنگ کراس سے تحریک انصاف کے درجن سے زائد کارکنان کو گرفتار کرلیا، پولیس کی قیدی وین کارکنوں کو لے کر تھانے روانہ ہوگئی۔
پولیس حکام کا کہنا ہے کہ سیاسی جماعت کے کارکنوں نے دفعہ 144 اور ایم پی او کی خلاف ورزی کی، پابندی کے باوجود احتجاج اور ریلی نکالی اور قانون کو ہاتھ میں لیا گیا۔
اس حوالے سے ترجمان حکومت پنجاب نے کہا ہے کہ لاہور شہر کے مختلف مقامات پر دفعہ 144نافذ کی گئی ہے۔ ترجمان کا کہنا ہے کہ پاکستان سپر لیگ (پی ایس ایل) میں شامل کرکٹ ٹیموں کی لاہور آمد کی وجہ سے مال روڈ پر خصوصی اقدامات کیے گئے تھے۔ حکومت پنجاب نے کہا ہے کہ لاہور کے معروف مال روڈ پر ایک سیاسی جماعت کے کارکنان نے دفعہ 144 کی خلاف ورزی کی۔
ترجمان کے مطابق دفعہ144کی خلاف ورزی کرکے مظاہرین زبردستی پولیس وین میں سوار ہوئے، صوبے بھر میں امن وامان کو ہر قیمت پر یقینی بنایا جائے گا۔
واضح رہے کہ گزشتہ روز محکمہ داخلہ پنجاب نے پی ایس ایل میچز کی سیکیورٹی کے حوالے سے لاہور کے تین علاقوں میں دفعہ 144 نافذ کی تھی جس کا اطلاق 7روز کیلئے کیا گیا ہے۔
محکمہ داخلہ پنجاب کے نوٹیفکیشن میں کہا گیا تھا کہ اس دوران احتجاجی مظاہرے، ریلی، جلسہ جلوس اور دھرنوں پر مکمل پابندی عائد ہوگی۔
یاد رہے کہ پاکستان سپر لیگ 8 کے لاہور میں ہونے والے میچز کا آغاز 26 فروری کو لاہور قلندرز اور پشاور زلمی کے مقابلے سے ہوگا۔
