لندن: برطانیہ میں ریل کا پہیہ جام ہو گیا ہے، لیکن صورت حال جس رخ پر جا رہی ہے، اس میں یہ پریشان کن سوال بھی اٹھ کھڑا ہوا ہے کہ کیا اب ہوائی جہازوں کی بھی ہڑتال ہوگی؟
برطانوی میڈیا کے مطابق ملک میں ریل کا پہیہ جام ہو چکا ہے، 40 ہزار ریلوے ملازمین کی ہڑتال کا آج تیسرا روز ہے، ریلوے اسٹیشنز سنسان ہو گئے ہیں۔
لندن میں انڈر گراؤنڈ ریل سروس بھی جزوی طور پر تعطل کا شکار ہے، جس کی وجہ سے لاکھوں افراد کو مشکلات کا سامنا کرنا پڑ رہا ہے، ہڑتالی ملازمین کا مطالبہ ہے کہ تنخواہوں میں اضافہ اور برطرف ملازمین کو بحال کیا جائے۔
دوسری طرف ریلوے کے بعد فضائی کمپنیوں نے بھی ہڑتال کا اشارہ دے دیا ہے، عالمی مہنگائی کے سبب برطانیہ میں بھی افراطِ زر کی شرح 9 فی صد تک جا پہنچی۔
ادھر بیلجیم میں پائلٹس اور کریو ممبران کی ہڑتال کے باعث تین سو سے زائد فلائٹس منسوخ ہو چکی ہیں، اور اس کے نتیجے میں ہزاروں مسافر ایئر پورٹس پر پھنس گئے۔
ریلوے، میری ٹائم اینڈ ٹرانسپورٹ (RMT) یونین نے اپنی ہڑتال کو کامیاب قرار دیتے ہوئے کہا ہے کہ 40 ہزار سے زائد اراکین ایک بار پھر واک آؤٹ کر گئے۔
یونین کے جنرل سیکریٹری مک لنچ نے کہا ہمارے ارکان تمام ورکرز کی تنخواہوں میں اضافے اور ملازمتوں کی حفاظت کے لیے کھڑے ہوئے ہیں، جدید معیشت میں ورکرز کو ان کی محنت کے لیے مناسب معاوضہ ملنے، اچھے حالات سے لطف اندوز ہونے اور اس ذہنی سکون کی ضرورت ہے کہ ان کی ملازمت ان سے نہیں چھینی جائے گی۔
