Tag: Suez Canal

قاہرہ: نہر سوئز میں ایک ہفتے تک پھنسے رہنے والے جہاز کے مالک نے کنٹینرز مالکان سے نقصان میں شراکت کا مطالبہ کیا ہے۔

تفصیلات کے مطابق نہر سوئز میں ایک ہفتے تک پھنسے رہنے والے جاپانی بحری جہاز ایور گیون (Ever Given) کے مالک شوئی کیسن نے جہاز پر لدے کنٹیرز کے مالکان سے نقصان میں شامل ہونے کا مطالبہ کر دیا ہے۔

واضح رہے کہ مصری حکام نے جاپانی کمپنی سے مطالبہ کیا تھا کہ بحری جہاز کے باعث راستہ بند ہونے پر جو نقصان ہوا اس کا ازالہ کیا جائے، اس نقصان کے ازالے کے لیے بحری جہاز ایورگیون کے جاپانی مالک نے کارگو مالکان سے کہا ہے کہ وہ اس میں حصہ بٹائیں۔

یاد رہے کہ دی ایورگیون 23 مارچ کو ہالینڈ کی روٹرڈم بندرگاہ جا رہا تھا جب وہ نہر سوئز کے کنارے سے جا ٹکرایا تھا، جاپان کے اس بحری جہاز نے نہر سوئز میں ایک ہفتے تک دیگر بحری جہازوں کی آمد و رفت روک رکھی تھی جس کے باعث اربوں ڈالر کی سمندری تجارت رک گئی تھی۔

مصری حکام کی جانب سے مطالبے پر شوئی کیسن کائشا لمیٹڈ نے کنٹینرز مالکان سے عمومی اوسط معاہدے میں ہرجانے میں حصہ ڈالنے کا کہہ دیا ہے، ایسے نقصان کی شیئرنگ اسکیم اکثر سمندری حادثات میں استعمال ہوتی ہے جو انشورنس کے ذریعے پوری کی جاتی ہے۔

شپنگ کمپنی کے مطابق حادثے کے وقت بحری جہاز پر لگ بھگ 18 ہزار کنٹینرز لدے ہوئے تھے، جب کہ نقصان کا تخمینہ قریباً 916 ملین ڈالر لگایا گیا ہے۔ پھنسنے والے بحری جہاز کو تاحال نہر سوئز میں روک کر رکھا گیا ہے، نقصان کے ازالے کا معاملہ حل ہونے تک اس جہاز کو جانے کی اجازت نہیں۔

قاہرہ: مصر نے دنیا کی مصروف ترین تجارتی گزرگاہ نہر سوئز کو چوڑا کرنے پر غور شروع کر دیا ہے۔

تفصیلات کے مطابق نہر سوئز میں بحری جہاز پھنسنے کے واقعے کے بعد مصر نے اس شپنگ چینل کو وسعت دینے پر غور شروع کر دیا ہے۔

اس سلسلے میں سوئز کینال اتھارٹی کے چیئرمین اسامہ ربی نے کہا ہے کہ نہر کے شپنگ چینل کو چوڑا کرنے پر غور ہو رہا ہے، انھوں نے کہا کہ چینل کی بندش سے ہونے والے نقصانات اور ہرجانے کی مالیت ایک بلین ڈالرز تک پہنچ سکتی ہے۔

ادھر کینال اتھارٹی کے ریسکیو آپریشن میں کام کرنے والے اہل کاروں کا کہنا تھا کہ نہر میں پھنسنے والے ایور گرین جہاز کے کپتان نے غلطی کی تھی جس کے بعد جہاز اپنے راستے سے ہٹ گیا اور کنارے میں پھنس گیا، اس سے قبل یہاں سے اسی موسمی حالات میں 12 جہاز گزر گئے تھے اور انھیں تیز ہوا اور طوفان سے کوئی مسئلہ نہیں ہوا۔

نہر سوئز : راستہ کھلنے کے باوجود ڈھائی سو جہاز اپنی باری کے منتظر

خیال رہے کہ نہر سوئز میں پھنسے دیو ہیکل کنٹینر شپ کو پیر کو نکالا گیا تھا، تاہم اب بھی اس راستے سے گزرنے کے لیے جہازوں کی لمبی قطاریں لگی ہوئی ہیں، اب تک 281 مال بردار جہاز اپنی منزل کی جانب روانہ ہو چکے ہیں، جب کہ 249 بحری جہازوں کا نکلنا باقی ہے۔

ماہرین کا کہنا ہے کہ اس ٹریفک جام کو ختم ہونے کے باوجود تمام تجارتی جہازوں کو یہاں سے گزرنے میں مزید 10 دن لگ سکتے ہیں، جب کہ منگل کے روز مصر کے صدر نے کہا تھا کہ اس میں محض 3 دن لگیں گے۔

قاہرہ: دنیا کے اہم ترین سمندری راستے کی بندش سے متعلق بڑی خبر آ گئی، کوششیں رنگ لے آئیں اور سوئز کینال میں پھنسے تائیوان کے بحری جہاز کو نکال لیا گیا۔

تفصیلات کے مطابق نہر سوئز میں پھنسے ایور گرین نامی بحری جہاز کو نکالنے کا آپریشن کامیابی سے ہم کنار ہو گیا ہے، بحری جہاز نکال لیا گیا، سوئز کینال میں بحری جہاز پھنسنے سے اربوں ڈالر کا نقصان ہوا ہے۔

رپورٹس کے مطابق دنیا کی اہم تجارتی گزرگاہ بند ہونے سے یومیہ 9 ارب ڈالر مالیت کی تجارت متاثر ہوئی، تجارتی نقل و حمل کے نقصان کا تخمینہ 400 ملین ڈالر فی گھنٹہ لگایا گیا ہے۔

سوئز کینال کی بندش سے دونوں طرف 300 سے زائد جہاز پھنس گئے تھے، یہاں سے یومیہ 18 لاکھ بیرل تیل کی ترسیل کی جاتی ہے۔

عالمی بحری تجارت کا 12 فی صد حصہ سوئز نہر سے گزرتا ہے، سوئز کینال 193 کلو میٹر طویل، اور اس کی چوڑائی 205 میٹر ہے، کینال بند ہونے سے تیل کی ترسیل اورگاڑیوں کی فراہمی زیادہ متاثر ہوئی۔

ایور گرین نامی مال بردار بحری جہاز تائیوان سے تعلق رکھنے والی کمپنی ایور گرین کی ملکیت ہے، کارگو جہاز کی لمبائی فٹ بال کے 4 میدانوں کے برابر ہے اور اس کا شمار دنیا کے سب سے بڑے کنٹینر بردار جہازوں میں ہوتا ہے، 2 لاکھ ٹن وزنی اس مال بردار جہاز پر 20 ہزار کنٹینر لادے جا سکتے ہیں۔

یہ دیو ہیکل بحری جہاز منگل 23 مارچ کو نہر سوئز میں واقع بندرگاہ کے شمال میں پھنسا تھا، جہاز ایور گرین چین سے نیدرلینڈز کے شہر راٹرڈیم جا رہا تھا۔ بحیرہ روم کی جانب گامزن جہاز مقامی وقت کے مطابق صبح 7.40 پر تکنیکی خرابی کے باعث توازن اور سمت برقرار نہ رکھ سکا اور نہر میں آڑھا ترچھا پھنس گیا۔ کمپنی کا کہنا تھا کہ جہاز ہوا کے تیز جھکڑ کی وجہ سے پھنس۔