اسلام آباد : انتخابی اصلاحات پر ہونے والے پارلیمانی کمیٹی کے پہلے اجلاس کی تفصیلات اے آر وائی نیوز کو موصول ہوگئیں، اجلاس میں مجموعی طور پر 73 انتخابی تجاویز پیش کی گئیں۔
قومی اسمبلی کے سابق اسپیکر سردار ایاز صادق کی سربراہی میں قائم کمیٹی کا منگل کو پہلا اجلاس ہوا اور اس مشق کو جنگی بنیادوں پر مکمل کرنے کا فیصلہ کیا گیا۔
اس حوالے سے ذرائع کا کہنا ہے کہ سیاسی جماعت پر پابندی کا اختیار سپریم کورٹ کے بجائے پارلیمنٹ کو دینے کی تجویز پیش کی گئی۔ مجوزہ ترمیم میں کہا گیا ہے کہ پارلیمنٹ اس بات کا جائزہ لے کہ سیاسی جماعت پر پابندی لگنی چاہیے یا نہیں، اگر پارلیمنٹ پابندی لگانے پر متفق ہو تو وہ یہ معاملہ سپریم کورٹ کو بھجوائے۔
اس کے علاوہ پریزائیڈنگ افسر کو انتخابی نتیجہ مرتب کرنے کیلئے مخصوص وقت دینے کی تجویز بھی دی گئی جس میں کہا گیا کہ نتائج مرتب کرنے میں تاخیر پر پریزائیڈنگ افسر سے جواب طلبی کی جائے۔
تجویز میں کہا گیا کہ پریزائیڈنگ افسر انتخابی نتائج کی تاخیر پر ٹھوس وجہ بتانے کا پابند ہوگا، پری زائیڈنگ افسر دستخط شدہ نتیجے کی تصویر ریٹرننگ افسر کو بھیجے گا، پریزائیڈنگ افسر کو تیز ترین انٹرنیٹ اور اسمارٹ فون دینے کی بھی تجویز پیش کی گئی۔
اجلاس میں تجویز دی گئی کہ پولنگ ایجنٹس کو کیمرے والا فون ساتھ لے جانے کی اجازت دی جائے
اس کے علاوہ پولنگ اسٹیشن کے ہر بوتھ پر سی سی ٹی وی کیمرے لگائے جائیں، ان کیمروں سے پولنگ کے جائزے، گنتی اور نتیجہ مرتب کرنے میں مدد ملے گی۔
تجویز میں کہا گیا ہے کہ شکایت کی صورت میں سی سی ٹی وی کیمروں کی ریکارڈنگ بطور ثبوت پیش کی جاسکے گی، امیدوار بھی قیمت ادا کرکے کسی بھی پولنگ اسٹیشن کی ویڈیو حاصل کرسکے گا۔
اس کے علاوہ قومی و صوبائی امیدوار کیلئے انتخابی اخراجات کی حد بڑھانے کیلیے قومی اسمبلی کی نشست کیلئے 40 لاکھ سے ایک کروڑ روپے تک خرچ کرنے کی تجویز پیش کی گئی تجویز کے مطابق صوبائی نشست کیلئے انتخابی مہم پر 20 سے 40 لاکھ خرچ کئے جاسکیں گے۔
غفلت برتنے پر پریزائیڈنگ اور ریٹرننگ افسر کیخلاف فوجداری کارروائی کی جائے، دھاندلی میں ملوث انتخابی عملے کی سزا 6 ماہ سے بڑھا کر 3 سال کرنے کی تجویز دی گئی ہے، ضابطہ اخلاق کی خلاف ورزی کا فیصلہ 15 کے بجائے 7 روز میں کرنے کی تجویز دی گئی۔
تجویز میں کہا گیا ہے کہ پولنگ عملے کی حتمی فہرست الیکشن کمیشن کی ویب سائٹ پر اپ لوڈ کی جائے، امیدوار10 روز کے اندر حلقے میں پولنگ عملے کی تعیناتی چیلنج کرسکے گا۔
اجلاس میں ہر پولنگ اسٹیشن کے باہر ووٹر کی مکمل فہرست آویزاں کرنے کی بھی تجویز دی گئی، سیکورٹی اہلکار پولنگ اسٹیشن کے باہر ڈیوٹی دیں گے، ہنگامی صورتحال میں پرائیڈنگ افسر کی اجازت سے پولنگ اسٹیشن کے اندرآسکیں گے۔
