کراچی : سہراب گوٹھ انڈر پاس کے قریب نامعلوم افراد کی فائرنگ سے 2پولیس اہلکار جاں بحق ہوگئے۔
اس حوالے سے پولیس حکام کا کہنا ہے کہ مقامی گراؤنڈ میں کچھ مشتبہ افراد بیٹھے تھے جنہیں یہ اہلکار چیک کرنے گئے۔
پولیس کو اپنی جانب آتا دیکھ کر ملزمان نے اہلکاروں پر فائرنگ کردی، جس کے نتیجے میں دونوں اہلکار موقع پر ہی دم توڑ گئے، شبہ ہے کہ فائرنگ کرنے والے ملزمان اہلکاروں کا اسلحہ بھی ساتھ لے گئے۔
ذرائع کے مطاق شہید ہونے والے اہلکاروں کی شناخت رحمت اور حکیم کے ناموں سے ہوئی ہے، مقتولین کی لاشوں کو پوسٹ مارٹم کیلئے اسپتال روانہ کردیا گیا۔
ڈی آئی جی ایسٹ کے مطابق جائے وقوعہ سے شواہد اکٹھے کیے جا رہے ہیں، پولیس اور رینجرز کی بھاری نفری نے موقع پر پہنچ کر جائے وقوعہ کو گھیرے میں لے لیا، علاقے میں ملزمان کی تلاش شروع کردی گئی ہے۔
تازہ ترین اطلاعات کے مطابق ایس ایچ او سہراب گوٹھ مظہراعوان نے اے آر وائی نیوز کو بتایا کہ مذکورہ اہلکار پنجاب اڈے کے قریب ہوٹل پر موجود تھے، اہلکاروں کا ڈکیتوں سے مقابلہ ہوا، جائے وقوعہ سے ڈکیتوں کا پستول اور گولیوں کے خول بھی ملے ہیں۔
