سجاول: صوبہ سندھ کے شہر سجاول کی سب جیل کی سیکیورٹی پر مامور تمام عملے کو غفلت برتنے پر معطل کر دیا گیا ہے۔
تفصیلات کے مطابق سجاول میں جیوڈیشل سب جیل سے مختلف جرائم میں ملوث 3 خطرناک قیدی فرار ہونے میں کامیاب ہو گئے تھے، جس پر محکمہ جیل خانہ جات نے کارروائی کرتے ہوئے سیکیورٹی پر مامور تمام عملے کو غفلت برتنے پر معطل کر دیا۔
سب جیلر مشتاق سعید کا کہنا ہے کہ قیدی جوڈیشل سب جیل کے بیرک نمبر 3 سے فرار ہوئے ہیں، ان میں رفیق مینگل، بلاول چانڈیو، ستار منگنہار شامل ہیں، جن کے فرار کی خبر آے آر وائی نیوز پر نشر ہونے کے بعد ایس ایس پی شہلا قریشی نے نوٹس لیا۔
شہلا قریشی کے مطابق قیدیوں کے فرار پر محکمانہ انکوائری کی جا رہی ہے، انکوائری رپورٹ کے بعد عملے کے خلاف کارروائی ہوگی، اور فرار قیدیوں کی گرفتاری کے لیے بھی مختلف مقامات پر کارروائیاں جاری ہیں۔
ایس ایس پی کا کہنا تھا کہ تینوں مفرور قیدی چوری اور منشیات سمیت دیگر جرائم میں ملوث تھے۔