کراچی: سکھر جیل میں گزشتہ روز ہونے والے سرچ آپریشن کے دوران قیدیوں سے بڑی تعداد میں ممنوعہ سامان برآمد کر لیا گیا ہے۔
تفصیلات کے مطابق اے آر وائی نیوز کی جانب سے سندھ کی جیلوں میں موبائل فون سمیت دیگر چیزوں کے استعمال کا سوال درست ثابت ہو گیا۔
وزیر جیل نے ایک سوال کے جواب میں کہا تھا کہ جیلوں میں انگریزوں کے دور کا طریقہ کار رائج ہے، اگر منسٹر جیل اچانک دورہ بھی کرے تو اس کی آمد سے قبل سیٹی بجا دی جاتی ہے، تو کیا واقعی ایسا ہوتا ہے؟ جیل میں کیے گئے سرچ آپریشن نے جیل سیکیورٹی کا پول کھول کر رکھ دیا ہے۔
اس سرچ آپریشن میں قانون نافذ کرنے والے دیگر اداروں نے بھی حصہ لیا تھا، آپریشن میں بیرکس کی تلاشی کے دوران بڑی تعداد میں ممنوعہ اشیا برآمد ہوئیں۔
قیدیوں کے قبضے سے متعدد موبائل فونز اور متعدد چاقو برآمد ہوئے، ہیٹر، کٹر، قینچی، ایم پی تھری ڈیوائسز اور چھوٹے اسپیکر، یو ایس بیز، چارجر اور دیگر اشیا بھی برآمد ہوئیں۔
اس آپریشن کے بعد آئی جی جیل خانہ جات سندھ کی کارکردگی پر سوالیہ نشان اٹھ گئے ہیں، برآمد ہتھیار جیل اسٹاف اور قیدی دونوں کے لیے خطرہ ہو سکتے تھے، یہ اہم سوال بھی اٹھا ہے کہ جیل سے سامان برآمد تو کر لیا گیا ہے لیکن یہ اندر کیسے گیا؟
واضح رہے کہ سکھر جیل سے 68 شرپسندوں کو دوسری جیلوں میں منتقل کیا گیا ہے۔
