سکھر: صوبہ سندھ کے اہم شہر سکھر میں سال 2021 میں پولیس کی کارکردگی بہتر رہی، اور بہت ساری کارروائیوں میں 19 ڈاکو مارے گئے۔
تفصیلات کے مطابق سال 2021 سکھر پولیس کی جانب سے جرائم پیشہ عناصر کے خلاف تابڑ توڑ کاروائیوں کے نتیجے میں شہریوں کے لیے پُر سکون رہا، سال کے دوران انیس ڈاکو اپنے انجام کو پہنچے، تو سیکڑوں کی تعداد میں گرفتار بھی ہوئے۔
اے آر وائی نیوز کے نمائندے علی محمد شر کی رپورٹ کے مطابق محکمہ پولیس سکھر کی سالانہ کارکردگی قابل دید نظر آئی، 2021 کی رپورٹ کے مطابق پولیس کی بہتر حکمت عملی کے نتیجے میں یہ سال جرائم پیشہ عناصر کے لیے خاصا بھاری گزرا۔
174 پولیس مقابلوں کے بعد 19 ڈاکو ہلاک جب کہ 38 زخمیوں سمیت 274 نہ صرف گرفتار ہوئے بلکہ ان کے قبضے سے 10 کلاشنکوف 103 پسٹل، 16 بندوقیں اور بڑی تعداد میں گولیاں بھی برآمد کی گئیں۔
2021: لاہور میں جنسی زیادتی کے 747 واقعات
ایس ایس پی سکھر پولیس نے اپنے فرائض سر انجام دیتے ہوئے اس دوران بھاری مقدار میں منشیات بھی برآمد کی۔
شہریوں کا کہنا ہے کہ رواں سال میں سکھر شہر سمیت ضلع بھر میں امن و امان کی فضا بہتر رہی اور جرائم کی کوئی بڑی واردات دیکھنے میں نہیں آئی، جس پر وہ سکھر پولیس کو خوب سراہتے ہیں۔
شہری کا کہنا تھا کہ ہم نے دیکھا کہ 2021 میں ہونے والے مذہبی تہواروں سمیت سیاسی اجتماعات بھی پولیس کی نگرانی میں مکمل حفاظتی اقدامات کے سبب محفوظ رہے۔
ایس ایس پی سکھر عرفان سموں کے مطابق تیغانی گروہ کے خلاف آپریشن نو مغویوں کی بازیابی کے لئے کیا گیا، ان مغویوں میں پنوعاقل تعلقہ اسپتال کا ملازم مختیار کلوڑ بھی شامل ہے، جسے گذشتہ ماہ اغوا کیا گیا تھا، اطلاعات ہیں کہ مختیار کلوڑ تیغانی گروہ کے قبضے میں ہے۔
