سکھر: مشن روڈ پر سونیا بیوٹی پارلر کے واش روم میں خفیہ کیمروں کا انکشاف ہوا ہے، خفیہ کیمروں سے خواتین کی ویڈیو بناکر انہیں بلیک میل کیا جاتا تھا۔
تفصیلات کے مطابق سکھر کے علاقے مشن روڈ پر قائم ایک بیوٹی پارلر کا مالک خفیہ کیمرے سے خواتین کی نازیبا ویڈیو بنا کر انہیں کافی عرصے سے بلیک میل کررہا تھا، سونیا بیوٹی پارلر کے مالک کامران نے بیوٹی پارلر کے واش روم میں خفیہ کیمرے نصب کیے ہوئے تھے۔
متاثرہ خواتین نے اے آر وائی نیوز کے توسط سے بلیک میل کرنیوالے سونیا بیوٹی پارلر کے مالک کیخلاف ایکشن لینے کا مطالبہ کیا۔ اے آر وائی نیوز کی خبر پر کارروائی کرتے ہوئے پولیس نے بیوٹی پارلر پر چھاپہ مارا۔
پولیس اہلکاروں نے بیوٹی پارلر کے واش روم میں خفیہ کیمرے برآمد کرکے بیوٹی پارلرکے مالک کامران کو گرفتار کرلیا، پولیس نے مزید کارروائی کرتے ہوئے بیوٹی پارلر اور کاسمیٹکس کی دکانیں سیل کردیں۔
پولیس کے مطابق چھاپے کے دوران پولیس نے واش روم سے خفیہ کیمروں سمیت شراب کی بوتلیں ودیگرممنوعہ اشیاء بھی برآمد کی ہیں۔
سکھر : تحریک انصاف کے چیئرمین عمران خان نے کہا ہے کہ اب سندھ کے عوام کو آصف زرداری سے جان چھڑانے کا موقع ملا ہے، کچھ بھی ہو جائے پیپلزپارٹی کی حکومت نہیں آنے دیں گے۔
ان خیالات کا اظہار انہوں نے سکھر میں انتخابی جلسے سے خطاب کرتے ہوئے کیا، عمران خان نے کہا کہ ن لیگ اور پیپلزپارٹی نے باریاں لے لیں، اب سندھ کے عوام کو آصف زرداری سے جان چھڑانے کا موقع ملا ہے، عوام پچیس جولائی کو خوف کی زنجیریں توڑ دیں۔
انہوں نے کہا کہ ایف آئی اے نے35ارب کی منی لانڈرنگ پکڑی ہے، اس منی لانڈرنگ کے پیچھے آصف زرداری اوران کی بہن فریال تالپور ہیں، سندھ میں کوئی منصوبہ ایسا نہیں جس میں فریال تالپور کا حصہ نہ ہو۔
سکھر میں سونامی سے خطاب کرتے ہوئے کپتان کا کہنا تھا کہ ظالموں کو شکست دینے کا وقت آگیا ہے، سندھ کے حکمران یہاں کے لوگوں کو انسان نہیں سمجھتے، سندھ میں جتنی لوٹ مار ہے اتنی کسی اور صوبے میں نہیں، کچھ بھی ہو جائے زرداری کی حکومت نہیں آنے دیں گے۔
سربراہ پاکستان تحریک انصاف کا مزید کہنا تھا کہ60سال کی تاریخ میں پاکستان پر قرضہ 6ہزار ارب تھا، گزشتہ10سال میں قرضہ6ہزارسے27ہزارارب پرپہنچ گیا،آج بھی پاکستان کا بچہ بچہ آئی ایم ایف کا مقروض ہے، ان دس سالوں میں ن لیگ اور پیپلزپارٹی نے باریاں لیں اورفرینڈلی اپوزیشن کی۔
چیئرمین پی ٹی آئی کا کہنا تھا کہ جب یہ دونوں اکٹھے ہوتے ہیں تو ایک ہی بات بولتے ہیں کہ جمہوریت بچاؤ، نوازشریف خود ایئرپورٹ جا کر آصف زرداری کو رائیونڈ لے کر آیا، ملک کو لوٹنا ن لیگ اور پیپلزپارٹی کا مک مکا تھا، دس سال پہلے ڈالر60روپے کا تھا اور آج125روپے کا ہوگیا، ڈالر کے مقابلے میں روپے کی قدرآدھی ہوکر رہ گئی ہے۔
سابق وزیر اعلیٰ پنجاب پر تنقید کرتے ہوئے عمران خان نے کہا کہ شوبازشریف نے کہا تھا کہ آصف زرداری کو گلیوں میں گھسیٹوں گا، الیکشن سے پہلے شہبازشریف نے ڈرامہ کیا پھر جیتنے کے بعد معافی مانگ لی۔
شہباز اینڈ سنز کرپشن کمپنی نے ملتان میں میٹرو صرف کرپشن کیلئے بنائی، ملتان والوں نے کہا کہ ہمیں میٹرو نہیں چاہیے مگر ن لیگ نے زبردستی بنادی، شہباز شریف نے56کمپنیز میں کرپشن کی، اس کی کرپشن بےنقاب کروں گا۔
عمران خان نے شرکاء سے کہا کہ پیپلزپارٹی یا ن لیگ اقتدار میں واپس آئیں تو آپ کی تقدیر نہیں بدلے گی، آپ نے25جولائی کو اس سوچ اور ظلم کو شکست دینی ہے، سندھ کے لوگ تحریک انصاف کے امیدواروں کو ووٹ نظریے کی بنیاد پر دیں۔
خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
سکھر: پاکستان پیپلز پارٹی کے چیئرمین بلاول بھٹو کا کہنا ہے کہ سندھ کی تقسیم کی بات کرنے والوں کو عوام مسترد کردیں گے، کٹھ پتلی الائنس کی کوئی حیثیت نہیں، لیاری میں گھیراؤ کی سازش کرنے والے ناکام ہوگئے۔
تفصیلات کے مطابق پاکستان پیپلز پارٹی کے چیئرمین بلاول بھٹو کی انتخابی مہم جاری ہے۔ آج سندھ کے شہر سکھر کے دورے کے موقع پر کارکنوں سے خطاب کرتے ہوئے انہوں نے کہا کہ جمہوریت کو تحفظ دینا ہم سب کی ذمہ داری ہے۔
انہوں نے کہا کہ آج انسانی حقوق اور سیاسی آزادی خطرے میں ہے۔ مطالبہ ہے تمام فیصلے عوام پر چھوڑیں، الیکشن شفاف منعقد کیے جائیں۔
بلاول کا کہنا تھا کہ ہم نے جس سیاسی آزادی کے لیے قربانی دی وہ آج خطرے میں ہے، ہمارے امیدواروں کو دھمکیاں برداشت نہیں کریں گے۔ ہر الیکشن میں پیپلز پارٹی کے خلاف کٹھ پتلی اتحاد اور جماعتوں کی مدد کی گئی۔
پی پی چیئرمین نے کہا کہ پارلیمنٹ میں آکر اداروں کو مضبوط کروں گا، جمہوریت کے بغیر مسائل حل نہیں ہوسکتے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
سکھر: پیپلز پارٹی کے سینئر رہنما خورشید شاہ نے کہا ہے کہ اس بار انتخابات فوج کی نگرانی میں ہو رہے ہیں، اگر اب بھی انتخابات پر سوال اٹھے تو تباہی آجائے گی۔
ان خیالات کا اظہار وہ سکھر میں جلسے سے خطاب کرتے ہوئے کر رہے تھے، انھوں نے کہا اسٹیبلشمنٹ خطرناک کھیل کھیل رہی ہے، اسٹیبلشمنٹ کو سمجھنا چاہیے جو کچھ ہو رہا ہے وہ نہیں ہونا چاہیے۔
سابق اپوزیشن لیڈر نے کہا کہ ہمیں حکومت نہیں ملک میں جمہوریت چاہیے، ہم سےسوال کیا جا رہا ہے کہ ہم نے کیا ترقیاتی کام کیے؟ ضیاءالحق اور مشرف کے ساتھ رہنے والوں نے کیا کیا، یہ بھی پوچھیں۔
ملک میں سیاست اور کرپشن کے حوالے سے جاری عدالتی سرگرمیوں کی طرف اشارہ کرتے ہوئے ان کا کہنا تھا کہ چیف جسٹس کا کام ہے عدالت میں لوگوں کو انصاف دیں، پاکستان کو اس وقت بے شمار چیلنجز کا سامنا ہے۔
خورشید شاہ نے پی ٹی آئی چیئرمین پر تنقید کرتے ہوئے کہا کہ عمران خان نے کرپٹ لوگوں کو پارٹی میں نہ لینے کا دعویٰ کیا تھا لیکن اب ساٹھ فی صد ٹکٹ دوسری پارٹی والوں کو دیے، ان کے یو ٹرنز سے ہمارا سر گھوم گیا ہے۔
پیپلز پارٹی کے رہنما نے مزارات پر دعا مانگنے والوں پر تنقید کرنے والوں کو مسترد کرتے ہوئے کہا کہ مزار پر دعا مانگنا غلط نہیں ہے، کہا ملک کے حوالے سے میرے شکوک و شبہات بڑھتے جا رہے ہیں، ’یہ توڑو وہ توڑو‘ کے کھیل سے ملک ہی کو نقصان ہوگا۔
خورشید شاہ نے جلسے سے خطاب کرتے ہوئے کہا کہ میں ن لیگ کے ٹکٹ ہولڈرز کی گرفتاری کی مذمت کرتا ہوں، جیسی جمہوریت یہاں ہے وہ ملک کو نہیں چلا سکتی، ملک کی سیاست میں اقدار ختم ہو چکی ہیں، ایم این اے، ایم پی اے شپ اہمیت نہیں رکھتی۔
پی پی رہنما کا کہنا تھا کہ ادارے ملک کے لیے ہوتے ہیں ذاتیات کے لیے نہیں، پیپلز پارٹی نے کبھی اقتدار کے لیے الیکشن نہیں لڑا، ہمیشہ جمہوریت اور پارلیمنٹ کے لیے جنگ لڑی لیکن ہم دوسروں کی طرح ترقیاتی کاموں پر ڈھول نہیں بجاتے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
سکھر : پیپلز پارٹی سندھ کے صدر اور سابق صوبائی وزیر نثار کھوڑو کے کاغذات نامزدگی فارم مسترد کردیئے گئے، عدالت نے اثاثے اور بیوی بچوں کی مکمل معلومات نہ ظاہر کرنے پر فیصلہ سنا دیا، نثار کھوڑو فیصلے کیخلاف اپیل کریں گے۔
تفصیلات کے مطابق اپیلٹ ٹریبونل نے پی ایس11سکھر میں پیپلز پارٹی کے امیدوار نثارکھوڑو کے صوبائی اسمبلی کی نشست کے لیے جمع کرائے گئے نامزدگی فارم مسترد کردیئے۔
نثار کھوڑو کےخلاف جی ڈی اے کے رہنما معظم عباسی نے اعتراضات داخل کیے تھے، درخواست گزار کا نثارکھوڑو پر الزام عائد کرتے ہوئے مؤقف تھا کہ نامزدگی فارم میں نثارکھوڑو نے تیسری بیگم،بیٹی کانہیں بتایا اور نہ نثارکھوڑو نےنامزدگی فارم میں اپنی166ایکٹر زمین ظاہرنہیں کی۔
معظم عباسی کے مطابق نثار کھوڑو نے کاغذات نامزدگی میں دو بیگمات اورچار بچے ظاہرکیے جو غلط معلومات ہیں، دوسری جانب نثارکھوڑو کا کہنا ہے کہ ٹریبونل کے فیصلے کے خلاف اپیل دائر کروں گا، کاغذات نامزدگی میں کوئی چیزنہیں چھپائی گئی۔
یاد رہے کہ اس سے قبل اپیلٹ ٹربیونل نے این اے57مری سے سابق وزیر اعظم شاھد خاقان عباسی، پی ایس 27خیرپور سے پیپلز پارٹی کے رہنما منظور وسان اور این اے67جہلم سے پاکستان تحریک انصاف کے رہنما فواد چوہدری کے کاغذات نامزدگی مسترد کرتے ہوئے انہیں انتخابات کیلئے نااہل قرار دیا ہے۔
خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
سکھر : سنگدل اور بد نصیب بیٹوں نے بوڑھی ماں پر بہیمانہ تشدد کرکے بے ہوشی کی حالت میں کھلے آسمان تلے کچرے کے ڈھیر پر پھینک دیا، بوڑھی ماں کا جرم بیٹوں سے دو وقت کی روٹی مانگنا تھا۔
تفصیلات کے مطابق سکھر کے علاقے بس ٹرمینل کے قریب سنگدل بیٹے بوڑھی ماں کو تشدد کے بعد نیم بے ہوشی کی حالت میں کچرے کے ڈھیر پر پھینک گئے،80 سالہ بوڑھی خاتون کئی گھنٹے تک کچرے کے ڈھیر پر روتی تڑپتی رہی کچھ خدا ترس لوگوں نے بوڑھی خاتون کو اٹھا کر طبی امداد کے لئے سول اسپتال پہنچایا۔
اے آر وائی نیوز پر خبر نشر ہو نے کے بعد سربراہ بحریہ ٹاؤن ملک ریاض نے فوری ایکشن لیتے ہوئے80 سالہ بوڑھی خاتون کا بیڑا اٹھا لیا، خاتون کو فوری طور پر لاہور بحریہ ٹاؤن اولڈایج ہوم منتقل کرنے کے احکامات جاری کر دیئے۔
ملک ریاض کی بحریہ ٹاؤن کی ٹیم کچھ دیر بعد کراچی سے سکھر پہنچ کر بوڑھی خاتون کو لاہور اولڈ ایج ہوم منتقلی کے لئے لے جائیں گے چار گھنٹے گزرجانے کے بعد پولیس حسبِ روایت تاخیر سے اسپتال پہنچی، بوڑھی خاتون کو اس وقت لیڈی کانسٹیبل کی نگرانی میں سکھر سول اسپتال میں رکھا ہوا ہے۔
خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
سکھر : آئی جی سندھ اے ڈی خواجہ نے کہا ہے کہ دو سال میں پولیس کی بہتری کیلئے جو کیا وہ سب کے سامنے ہے، بطور آئی جی اول ترجیح میرٹ پر بھرتی تھی جس پر عمل کیا۔
ان خیالات کا اظہار انہوں نے سکھر میں میڈیا سے گفتگو کرتے ہوئے کیا، ان کا کہنا تھا کہ پولیس کو جدید خطوط پر استوار کرکے ریکارڈ کو کمپیوٹرائز کیا۔
انہوں نے بتایا کہ سندھ حکومت نے ڈویژنل ہیڈ کوارٹر میں سہولت سینٹرز قائم کئے، 24ہزار نوجوانوں کو بھرتی کرکے آرمی سے تربیت کروائی گئی، اس کے علاوہ سندھ میں200سے زائد اور کراچی میں سو رپورٹنگ سینٹر قائم کئے گئے۔
ایک سوال کے جواب میں ان کا کہنا تھا کہ جب تک عوام پولیس کے ساتھ تعاون نہیں کرے گی تھانہ کلچر نہیں بدلے گا، جلسے جلوس شروع ہوچکےہیں، پولیس سیکیورٹی کیلئے تیار ہے، سیاسی تبدیلی سے پولیس کی کارکردگی متاثرنہیں ہوگی۔
سکھر/ لاڑکانہ / شکار پور : سیپکو نے سکھر، لاڑکانہ اور شکار پور میں بجلی چوروں کیخلاف آپریشن کرتے ہوئے ہزاروں کنڈے اتار دیئے، تاروں کے گچھے اتنے زیادہ تھے کہ ان کو اٹھانے میں کافی دشواری کا سامنا کرنا پڑا۔
تفصیلات کے مطابق سی او سیپکو کی ہدایت پر عملے نے بجلی چوروں کے خلاف بڑے پیمانے پر کریک ڈاؤن کر کے بجلی کے کنڈوں کو کاٹ دیا اوربجلی چوروں کے خلاف مقدمات درج کروا دئیے ہیں، تاہم اب تک کوئی گرفتاری عمل میں نہیں لائی گئی ہے۔
سکھر الیکٹرک سپلائی کارپوریشن کے عملے نے بجلی کے غیر قانونی کنکشنز کے خلاف بھرپور کارروائی کرتے ہوئے سکھر، لاڑکانہ اور شکار پور کے مختلف علاقوں سے ہزاروں کنڈے اتار کر قبضے میں لے لیے، کنڈے کے تاروں کی تعداد اتنی زیادہ تھی کہ ان کو اٹھانا بھی دشوار ہوگیا تھا۔
کارروائی کے دوران عملے کے ہمراہ پولیس کی بھاری نفری بھی موجود تھی، اس موقع پر شہریوں نے احتجاج بھی کیا، اے آر وائی نیوز کے نمائندے لالہ اسد پٹھان کے مطابق سی او سیپکو کا کہنا تھا کہ بجلی چوری کیخلاف آپریشن میں عوام بھی ہم سے تعاون کریں۔
شکارپور کے مختلف علاقوں میں سیپکو اہلکاروں نے ہزاروں کنڈے اتار دیئے گئے ہیں ، انہوں نے بتایا کہ فرائض میں غفلت برتنے پر دو ایکسیئن، پانچ ایس ڈی اوز سمیت بارہ اہلکار معطل کردیئے گئے ہیں، اس کے علاوہ مختلف تھانوں میں بجلی چوروں کیخلاف مقدمات بھی درج کرائے گئے ہیں۔
کراچی: 17 ویں سندھ گیمز کے فائنل کے نتائج کا اعلان کر دیا گیا جس کے تحت کراچی 126 گولڈ میڈلز حاصل کر کے فاتح قرار پایا، اس موقع پر وزیر اعلیٰ سندھ سید مراد علیٰ شاہ نے وزیر کھیل سمیت کھلاڑیوں کو مبارک باد پیش کی۔
تفصیلات کے مطابق سندھ گیمز میں کراچی 126 گولڈ میڈلز حاصل کر کے سرفہرست رہا اور حیدر آباد 15 گولڈ میڈلز کے ساتھ دوسرے نمبر پر جبکہ سکھر نے 12 گولڈ میڈلز حاصل کر کے تیسری پوزیشن حاصل کی۔
علاوہ ازیں میرپور خاص 7 گولڈ میڈلز کے ساتھ چوتھےنمبر پر براجمان ہوسکا، اور شہید بینظیر آباد 6 گولڈ میڈلز کے ساتھ پانچویں نمبر پر جبکہ لاڑکانہ ڈویژن 4 گولڈ میڈلز کے ساتھ چھٹی پوزیشن حاصل کرنے میں کامیاب رہا۔
اس موقع پر وزیر اعلیٰ سندھ سید مراد علی شاہ نے کامیاب ایونٹ پر مبارک باد پیش کرتے ہوئے کہا کہ سندھ گیمز جیسے ایونٹس مستقبل میں بھی منعقد کئےجائیں گے اور اس دوران ایتھلیٹس کو اپنی صلاحیتوں کا بھر مظاہرہ کرنے کا موقع فراہم کریں گے۔
انہوں نے کہا کہ کراچی میں سندھ گیمز کا کامیاب انعقاد کیا گیا اور امید ہے کھیل کے شعبے میں اس سال مزید کامیابیاں حاصل کریں گے، سندھ گیمز کے انعقاد پر وزیر کھیل سندھ اور تمام ایتھلیٹس کو مبارک باد پیش کرتا ہوں، انشااللہ اب یہ گیمز کا سلسلہ جاری رہے گا۔
مراد علیٰ شاہ کا مزید کہنا تھا کہ سندھ حکومت نے ناصرف کھیل بلکہ ہر شعبے میں بڑھ چڑھ کر حصہ لیا اور اسے کامیاب بنانے کی بھرپور کوشش کی، مستقبل میں بھی مختلف شعبوں کی بہتری کے لیے کام کریں گے۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
