کیلیفورنیا کی ایک مارکیٹ میں ایک بھوکے ریچھ نے بڑے آرام سے داخل ہوکر اپنی پسند کی چیزیں پکڑیں اور چلتا بنا، ڈیوٹی پر مامور اہلکار کے چھکے چھوٹ گئے۔
امریکہ کے شاپنگ مال میں اپنی بھوک مٹانے کیلئے گھسنے والے ریچھ کی معصومانہ حرکت کو دیکھنے والے مسکرائے بغیر نہ رہ سکے۔
سپر مارکیٹ میں آدھی رات کے وقت داخل ہونے والے ریچھ کو ڈیوٹی پر مامور ملازم نے دیکھا اور اس منظر کی ویڈیو بنالی جو سوشل میڈیا پر خوب وائرل ہورہی ہے۔
وائرل ویڈیو میں دیکھا جاسکتا ہے کہ جب ایک بھورے رنگ کا بھوکا ریچھ کیلیفورنیا کی اولمپک ویلی میں قائم سیون الیون نامی اسٹور میں داخل ہوتا ہے اور سیدھا اسنیکس اور کینڈی بارز سے اپنی پسند کے پیکٹ اپنے منہ میں دبا لیتا ہے۔
'You’re a thief, man' — This brown bear helped itself to some late night treats at a 7-Eleven in Olympic Valley, CA 🐻🍫 pic.twitter.com/hcSx1XiKXw
— NowThis (@nowthisnews) September 20, 2022
یہ واقعہ گزشتہ ہفتے اس وقت پیش آیا جب کیشیئر کرسٹوفر کنسن جو مذکورہ اسٹور میں نائٹ شفٹ میں ڈیوٹی کر رہے تھے نے اسٹور کا دروازہ کھلا دیکھا۔
انہوں نے میڈیا کو بتایا کہ پہلی نظر میں اسے دیکھ کر تو میرے بھی ہوش اڑ گئے میں حیران و پریشان تھا کہ کیا کروں کیونکہ یہ ایک خوفناک ریچھ تھا جو عام ریچھوں سے 20 سے 30 فیصد بڑے سائز کا تھا۔
انہوں نے بتایا کہ چند ہی لمحوں بعد مجھے احساس ہوا کہ یہ بھوکا ہے اور صرف کھانے کی تلاش میں ہی یہاں آیا ہے، اور وہی ہوا ریچھ اسنیکس اور کینڈی کے کچھ پیکٹ منہ میں دبائے خاموشی سے باہر نکل گیا۔
واقعے سے متعلق پولیس حکام کا کہنا ہے کہ ڈیپارٹمنٹل اسٹور کا عملہ اور خریدار محفوظ ہیں، اسٹور میں کسی شخص کی موجودگی کی اطلاع نہیں ہے۔
