ARYNews.tv | Urdu – Har Lamha Bakhabar

Tag: supreme court

  • سپریم کورٹ میں موسم گرما کی تعطیلات کا اعلان

    سپریم کورٹ میں موسم گرما کی تعطیلات کا اعلان

    اسلام آباد : سپریم کورٹ میں موسم گرما کی تعطیلات کا نوٹیفکیشن جاری کردیا گیا، مذکورہ چھٹیاں 15جون سے 11ستمبر تک ہوں گی۔

    تفصیلات کے مطابق چیف جسٹس پاکستان عمر عطاء بندیال نے سپریم کورٹ میں موسم گرما کی تعطیلات کی منظوری دے دی ہے جس کے بعد رجسٹرار آفس نے نوٹیفکیشن جاری کردیا۔

    جاری نوٹیفکیشن کے مطابق سپریم کورٹ میں موسم گرما کی تعطیلات 15جون سے 11ستمبر تک ہوں گی، جس کے بعد دیگر عدالتی امور انجام دیے جائیں گے۔

    نوٹیفکیشن کے مطابق تعطیلات کا اطلاق پرنسپل سیٹ اسلام آباد اور صوبائی برانچ رجسٹریوں پر بھی ہوگا، تعطیلات کے دوران فوری نوعیت کے مقدمات کی سماعت جاری رہے گی۔

    نوٹیفکیشن میں مزید کہا گیا ہے کہ گزشتہ 3 سال میں چھٹیوں کے دوران اہم نوعیت کے مقدمات بھی زیر سماعت رہے ہیں۔

  • سپریم کورٹ میں پریکٹس اینڈ پروسیجر بل کیخلاف کیس سماعت کیلئے مقرر

    سپریم کورٹ میں پریکٹس اینڈ پروسیجر بل کیخلاف کیس سماعت کیلئے مقرر

    سپریم کورٹ پریکٹس اینڈ پروسیجر بل کیخلاف کیس سماعت کیلئے مقرر کردیا گیا، چیف جسٹس کی سربراہی میں8رکنی بینچ2مئی کو سماعت کرے گا۔

    اس حوالے سے ن لیگ، پیپلزپارٹی اور پاکستان تحریک انصاف سمیت9سیاسی جماعتوں کو نوٹس جاری کردیے گئے، اس کے علاوہ اٹارنی جنرل، سپریم کورٹ بار، پاکستان بار کونسل کو بھی نوٹس جاری کیے گئے ہیں۔

    یاد رہے کہ رواں ماہ 13اپریل کو عدالت عظمیٰ نے سپریم کورٹ پریکٹس اینڈ پروسیجر ایکٹ پر تا حکم ثانی عمل درآمد روک دیا تھا۔

    <p>مقدمے کی سماعت 8 رکنی لارجر بینچ کرے گا— فوٹو: سپریم کورٹ ویب سائٹ</p>

    عدالت نے حکم دیا تھا کہ چیف جسٹس آف پاکستان کے اختیارات کو کم کرنے سے متعلق سپریم کورٹ پریکٹس اینڈ پروسیجر بل 2023 کی صدر مملکت کی جانب سے منظوری کے بعد یا دوسری صورت میں اس کے ایکٹ بننے کی صورت میں یہ مؤثر نہیں ہوگا، نہ ہی کسی بھی طرح سے اس پر عمل کیا جائے گا۔

    سپریم کورٹ پریکٹس اینڈ پروسیجر ایکٹ پر عمل درآمد روکنے سے متعلق سپریم کورٹ کے حکم میں کہا گیا تھا کہ ایکٹ بادی النظر میں عدلیہ کی آزادی اور اندرونی معاملات میں مداخلت ہے۔

    حکم نامے کے متن میں کہا گیا کہ سپریم کورٹ پریکٹس اینڈ پروسیجر ایکٹ پر تا حکم ثانی کسی بھی طریقے سے عمل درآمد نہیں ہوگا، سپریم کورٹ کا کہنا تھا کہ عدالت عدلیہ اور خصوصی طور پر سپریم کورٹ کی ادارہ جاتی آزادی کے لیے متفکر ہے۔

  • مسلم لیگ ن گن پوائنٹ پر سپریم کورٹ سے فیصلہ کروانا چاہتی ہے: اسد قیصر

    مسلم لیگ ن گن پوائنٹ پر سپریم کورٹ سے فیصلہ کروانا چاہتی ہے: اسد قیصر

    اسلام آباد: سابق اسپیکر قومی اسمبلی اسد قیصر کا کہنا ہے کہ مسلم لیگ ن گن پوائنٹ پر سپریم کورٹ سے فیصلہ کروانا چاہتی ہے، ہم سپریم کورٹ کا ہر فیصلہ ماننے کے لیے تیار ہیں۔

    تفصیلات کے مطابق سابق اسپیکر قومی اسمبلی اسد قیصر نے اے آر وائی نیوز سے گفتگو کرتے ہوئے کہا کہ سپریم کورٹ کا ہر فیصلہ ماننے کے لیے تیار ہیں، معاملات آگے بڑھانے کے لیے سپریم کورٹ نے اچھا موقع دیا ہے۔

    سابق اسپیکر کا کہنا تھا کہ پی ڈی ایم جماعتیں حیلے بہانے کر رہی ہیں، مسلم لیگ ن نے ابھی تک ٹکٹ نہیں دیے، ن لیگ گن پوائنٹ پر سپریم کورٹ سے فیصلہ کروانا چاہتی ہے۔

    انہوں نے کہا کہ ہم سنجیدہ ہیں اور آئین کے مطابق معاملات حل کرنا چاہتے ہیں، جو آئین کی بات کرتا ہے سب کو مذاکرات کے لیے ویلکم کرتے ہیں، ملک میں پھیلتی انارکی کو ختم کرنے کا واحد حل انتخابات ہی ہیں۔

    اسد قیصر نے کہا کہ انتخابات کے انعقاد کے لیے ہم قانونی چارہ جوئی کے لیے تیار ہیں، زمان پارک میں عید کے دن 2 ہزار سے زائد کارکنان موجود تھے، نگران حکومتوں کا وقت ختم ہونے پر عدالت جانے پر مشورہ کر رہے ہیں۔

  • الیکشن کمیشن سپریم کورٹ کے فیصلے کے خلاف نظر ثانی اپیل دائر کرے گا

    الیکشن کمیشن سپریم کورٹ کے فیصلے کے خلاف نظر ثانی اپیل دائر کرے گا

    اسلام آباد: الیکشن کمیشن نے سپریم کورٹ کے 4 اپریل کے فیصلے کے خلاف نظرثانی اپیل دائر کرنے کا فیصلہ کیا ہے۔

    ذرائع کے مطابق الیکشن کمیشن نے سپریم کورٹ کے 4 اپریل کے فیصلے کے خلاف اپنی قانونی ٹیم کو نظر ثانی اپیل دائر کرنے کی ہدایت کر دی ہے۔

    الیکشن کمیشن کی قانونی ٹیم نے اپیل کی تیاری شروع کر دی ہے، یہ اپیل جلد سپریم کورٹ میں دائر کی جائے گی، یاد رہے کہ سپریم کورٹ نے پنجاب کے انتخابات 14 مئی کو کرانے کا حکم دیا تھا۔

    دوسری طرف ذرائع کا کہنا ہے کہ سپریم کورٹ میں انتخابات کیس کے سلسلے میں اٹارنی جنرل نے کورٹ سے مزید وقت مانگ لیا ہے، اٹارنی جنرل نے درخواست کی کہ قائدین کی مشاورت جاری ہے، کچھ وقت مزید دیا جائے۔

    عمران خان سے بات کر نے کے عدالتی فیصلے کو نہیں مانتے: فضل الرحمان

    اس سلسلے میں اٹارنی جنرل اور فاروق نائیک نے چیف جسٹس سے ان کے چیمبر میں ملاقات کی، چیمبر میں جسٹس اعجاز الاحسن بھی موجود تھے، درخواست کے بعد سپریم کورٹ نے میں انتخابات کیس کی مزید سماعت 27 اپریل تک ملتوی کر دی، اس دوران اٹارنی جنرل نے چیف جسٹس کو اب تک کی پیش رفت سے بھی آگاہ کیا۔

  • سپریم کورٹ کے آڈٹ سے متعلق خبروں پر ترجمان کی وضاحت

    سپریم کورٹ کے آڈٹ سے متعلق خبروں پر ترجمان کی وضاحت

    اسلام آباد: ترجمان سپریم کورٹ آف پاکستان نے آڈٹ سے متعلق خبروں پر وضاحت جاری کرتے ہوئے کہا ہے کہ الزام لگایا جارہا کہ مذکورہ آڈٹ 10 سال سے نہیں کیا گیا، ایسی رپورٹس حقائق کے منافی اور گمراہ کن ہیں۔

    تفصیلات کے مطابق ترجمان سپریم کورٹ کا کہنا ہے کہ سپریم کورٹ کے آڈٹ کی خبریں میڈیا میں بڑے پیمانے پر شائع ہوئیں، الزام لگایا گیا کہ مذکورہ آڈٹ 10 سال سے نہیں کیا گیا۔

    ترجمان کا کہنا تھا کہ یہ کہا گیا کہ پبلک اکاؤنٹس کمیٹی نے رجسٹرار سپریم کورٹ کو طلب کر لیا۔

    ترجمان کے مطابق سپریم کورٹ کا آڈٹ 30 جون 2021 تک کیا گیا اور مکمل کیا گیا، سپریم کورٹ کا مالی سال 22-2021 کا آڈٹ زیر عمل ہے، اس کی تصدیق آڈیٹر جنرل آف پاکستان کے دفتر سے کی جا سکتی ہے۔

    ترجمان سپریم کورٹ کا کہنا ہے کہ ٹھوس الفاظ میں واضح کیا جاتا ہے کہ ایسی رپورٹس حقائق کے منافی اور گمراہ کن ہیں، پبلک اکاؤنٹس کمیٹی کے سامنے رکھی گئی تفصیلات غلط معلومات پر مبنی ہیں۔

  • مجرم ظاہر جعفر نے سزائے موت کے خلاف سپریم کورٹ سے رجوع کر لیا

    مجرم ظاہر جعفر نے سزائے موت کے خلاف سپریم کورٹ سے رجوع کر لیا

    اسلام آباد: نور مقدم قتل کیس میں مجرم ظاہر جعفر نے سزائے موت کے خلاف سپریم کورٹ سے رجوع کر لیا۔

    تفصیلات کے مطابق ظاہر جعفر نے نور مقدم قتل کیس میں اسلام آباد ہائیکورٹ کے فیصلے کے خلاف اپیل دائر کر دی ہے۔

    درخواست گزار نے مؤقف اپنایا کہ ٹرائل کورٹ اور ہائیکورٹ نے شواہد کا درست جائزہ نہیں لیا، غلطیوں سے بھرپور ایف آئی آر پر سزا دینا انصاف کے اصولوں کے منافی ہے، جن شواہد کو پذیرائی دی گئی وہ قانونِ شہادت کے مطابق قابل قبول نہیں۔

    درخواست میں ظاہر جعفر نے استدعا کی کہ اسلام آباد ہائیکورٹ کا، سزائے موت کا فیصلہ کالعدم قرار دیا جائے، اور درخواست گزار کو بری کرنے کا حکم دیا جائے۔

    یاد رہے کہ ظاہر جعفر کو نور مقدم قتل کیس میں ٹرائل کورٹ نے ایک جرم میں عمر قید اور دیگر میں سزائے موت سنائی تھی، اسلام آباد ہائی کورٹ نے عمر قید کو بھی سزائے موت میں تبدیل کر دیا تھا، ظاہر جعفر کو مجموعی طور پر 11 سال سزا اور 5 لاکھ روپے جرمانہ بھی کیا گیا ہے۔

  • ’سپریم کورٹ رولز اینڈ پروسیجر بل‘ کے خلاف آئینی درخواستوں کی سماعت، 8 رکنی لارجر بینچ تشکیل

    ’سپریم کورٹ رولز اینڈ پروسیجر بل‘ کے خلاف آئینی درخواستوں کی سماعت، 8 رکنی لارجر بینچ تشکیل

    اسلام آباد: سپریم کورٹ رولز اینڈ پروسیجر بل کے خلاف آئینی درخواستیں سماعت کے لیے مقرر کر دی گئیں، سپریم کورٹ نے 8 رکنی لارجر بینچ تشکیل دے دیا۔

    تفصیلات کے مطابق سپریم کورٹ رولز اینڈ پروسیجر بل کے خلاف سپریم کورٹ میں آئینی درخواستیں سماعت کے لیے مقرر کر دی گئیں، درخواستوں میں بل کالعدم قرار دینے کی استدعا کی گئی ہے۔

    چیف جسٹس عمر عطا بندیال کی سربراہی میں 8 رکنی لارجر بینچ اس کیس کی کل ساڑھے 11 بجے سماعت کرے گا۔

    بینچ میں جسٹس اعجاز الاحسن، جسٹس منیب اختر، جسٹس شاہد وحید، جسٹس مظاہر علی اکبر نقوی، جسٹس محمد علی مظہر، جسٹس عائشہ ملک، جسٹس سید حسن اظہر رضوی شامل ہیں۔

  • پنجاب الیکشن فنڈ، سپریم کورٹ نے گورنر اسٹیٹ بینک، سیکریٹری خزانہ کو طلب کر لیا

    پنجاب الیکشن فنڈ، سپریم کورٹ نے گورنر اسٹیٹ بینک، سیکریٹری خزانہ کو طلب کر لیا

    اسلام آباد: پنجاب الیکشن فنڈز کے سلسلے میں سپریم کورٹ نے گورنر اسٹیٹ بینک اور سیکریٹری خزانہ سمیت دیگر حکام کو طلب کر لیا۔

    تفصیلات کے مطابق پنجاب کے عام انتخابات کے معاملے میں رجسٹرار سپریم کورٹ نے اٹارنی جنرل، گورنر اسٹیٹ بینک، اور سیکریٹری الیکشن کمیشن کو نوٹس جاری کر دیا ہے۔

    نوٹس میں کہا گیا ہے کہ وفاقی حکومت بظاہر نافرمانی کی مرتکب ہوئی ہے، عدالتی حکم کے مطابق انتخابات کے لیے فنڈز مہیا نہیں کیے گئے، فنڈز کی عدم فراہمی عدالتی احکامات کی حکم عدولی ہے، بتایا جائے کہ سپریم کورٹ کے احکامات پر عمل کیوں نہیں کیا گیا؟

    سپریم کورٹ نے گورنر اسٹیٹ بینک اور حکام کو 14 اپریل کو چیمبر میں طلب کیا ہے، اٹارنی جنرل آف پاکستان کو بھی طلب کیا گیا، اور سیکریٹری خزانہ کو بھی چیمبر میں طلب کر لیا ہے۔

    عدالت نے سیکریٹری الیکشن کمیشن کو پنجاب اور کے پی انتخابات کے حوالے سے ریکارڈ دینے کا بھی حکم دے دیا ہے۔

  • سپریم کورٹ نے بغیر مرضی ڈی این اے ٹیسٹ کرانا غیر قانونی قرار دے دیا

    سپریم کورٹ نے بغیر مرضی ڈی این اے ٹیسٹ کرانا غیر قانونی قرار دے دیا

    اسلام آباد: سپریم کورٹ نے بغیر مرضی ڈی این اے ٹیسٹ کرانا غیر قانونی قرار دے دیا۔

    تفصیلات کے مطابق جسٹس منصور علی شاہ نے جائیداد کے تنازع کے ایک کیس میں 7 صفحات پر مشتمل تحریری فیصلہ جاری کر دیا، جس میں سپریم کورٹ نے ٹرائل کورٹ کا فیصلہ برقرار رکھتے ہوئے لاہور ہائیکورٹ کا حکم کالعدم قرار دے دیا ہے۔

    فیصلے کے مطابق دیوانی مقدمات میں بغیر مرضی ڈی این اے ٹیسٹ شخصی آزادی اور نجی زندگی کے خلاف ہے، آئین کے آرٹیکل 9 اور 14 شخصی آزادی اور نجی زندگی کے تحفظ کے ضامن ہیں۔

    فیصلے میں کہا گیا ہے کہ تاج دین اور زبیدہ بی بی کے ڈی این اے ٹیسٹ کا حکم دیا گیا وہ کیس میں فریق ہی نہیں ہیں۔

    فیصلے میں قرار دیا گیا کہ نجی زندگی کا تعلق انسان کے حق زندگی کے ساتھ منسلک ہے، مرضی کے بغیر ڈی این اے ٹیسٹ نجی زندگی میں مداخلت ہے، فوجداری قوانین کی بعض شقوں میں مرضی کے بغیر ڈی این اے ٹیسٹ کی اجازت ہے۔

    علاوہ ازیں فیصلے میں کہا گیا ہے کہ قانون شہادت کے مطابق شادی کے عرصے میں پیدا بچے کی ولدیت پر شک نہیں کیا جا سکتا۔ واضح رہے کہ جائیداد کے تنازع میں لاہور ہائیکورٹ نے تاج دین، زبیدہ اور محمد نواز کے ڈی این اے ٹیسٹ کا حکم دیا تھا۔

  • انتخابی فنڈز : الیکشن کمیشن نے رپورٹ عدالت میں جمع کرادی

    انتخابی فنڈز : الیکشن کمیشن نے رپورٹ عدالت میں جمع کرادی

    اسلام آباد : الیکشن کمیشن آف پاکستان نے پنجاب میں انتخابات سے متعلق رپورٹ سپریم کورٹ میں جمع کرادی۔

    تفصیلات کے مطابق سپریم کورٹ کی جانب سے پنجاب میں 14 مئی کو عام انتخابات کرانے کیلئے فنڈز فراہم کرنے کی ڈیڈلائن ختم ہوگئی، وفاقی حکومت نے الیکشن کمیشن کو فنڈز فراہم نہیں کیے۔

    پنجاب اسمبلی کے عام انتخابات کیلئے فنڈز کی فراہمی کے حوالے سے الیکشن کمیشن نے سپریم کورٹ میں رپورٹ جمع کرا دی۔

    اس حوالے سے ذرائع کا کہنا ہے کہ الیکشن کمیشن نے اپنی رپورٹ میں سپریم کورٹ کو آگاہ کر دیا ہے کہ ہمیں کوئی فنڈز نہیں ملے، حکومت نے انتخابات کے لیے رقم فراہم نہیں کی۔

    ذرائع کے مطابق الیکشن کمیشن نے سیکورٹی انتظامات کے حوالے سے بھی سپریم کورٹ کو آگاہ کرتے ہوئے بتایا ہے کہ ہمیں الیکشن کیلئے سیکورٹی کی بھی کمی کا سامنا ہے۔

    یاد رہے کہ سپریم کورٹ نے وفاقی حکومت کو 10 اپریل تک پنجاب میں انتخابات کیلئے فنڈز فراہمی کی ہدایت کر رکھی تھی، تاہم تاحال حکومت کی جانب سے الیکشن کمیشن کو فنڈز فراہم نہیں کئے گئے۔

    ذرائع کے مطابق الیکشن کمیشن نے سربمہر رپورٹ سپریم کورٹ میں جمع کرائی سپریم کورٹ کے ججز چیمبر میں الیکشن کمیشن کی رپورٹ کا جائزہ لیں گے اور اُسی بنیاد پر نیا حکم جاری کیے جانے کا امکان ہے۔

    مزید پڑھیں : سپریم کورٹ نے الیکشن کیمشن کا فیصلہ کالعدم قرار دے دیا 

    گزشتہ سماعت میں سپریم کورٹ کے 3 رکنی بینچ نے پنجاب میں انتخابات کے التواء کا الیکشن کمیشن کا فیصلہ کالعدم قرار دیتے ہوئے کہا تھا کہ یہ فیصلہ غیرقانونی اور غیر آئینی ہے، اب پولنگ 30اپریل کے بجائے 14 مئی کو ہوگی۔