لاہور: سپریم کورٹ آف پاکستان نے ریلوے کے خسارے کا 6 ہفتوں میں آڈٹ کراکے رپورٹ پیش کرنے کا حکم دے دیا۔
تفصیلات کے مطابق سپریم کورٹ لاہوررجسٹری میں چیف جسٹس میاں ثاقب نثار کی سربراہی میں 2 رکنی بینچ نے ریلوے میں اربوں روپے خسارے سے متعلق ازخود نوٹس کی سماعت کی۔
عدالت عظمیٰ میں سماعت کے آغاز پر چیف جسٹس نے استفسار کیا کہ آپ کے وزیر کہاں ہیں ؟ جس پرسیکریٹری ریلوے نے جواب دیا کہ آج انہیں عدالت نے طلب نہیں کیا اس لیے نہیں آئے۔
چیف جسٹس آف پاکستان میاں ثاقب نثار نے کہا کہ انہیں کس نے استثنیٰ دیا، بلائیں وزیرریلوے کو ان کے سامنے بات ہوگی۔
چیف جسٹس نے کہا کہ انہیں کس نے استثنا دیا، بلائیں وزیرریلوے کو، فوری طور پر عدالت میں پیش ہوں، ان کے سامنے بات ہوگی۔
چیف جسٹس آف پاکستان کے طلب کرنے وزیرریلوے خواجہ سعد رفیق عدالت میں پیش ہوئے اور کہا کہ آپ ہمارے قابل احترام چیف جسٹس ہیں جس پرانہوں نے کہا کہ آپ اپنے جملے میں سے قابل احترام کا لفظ نکال دیں۔
چیف جسٹس میاں ثاقب نثار نے کہا کہ عدالت میں قابل احترام کہنے سے آپ کی بات میں تضاد محسوس ہوتا ہے، قابل احترام عدالت کے اندر کہا جائے تو باہربھی سمجھا جائے۔
وزیرریلوے نے کہا کہ آپ کے اقدامات کی وجہ سے صرف عوام کو نہیں بلکہ حکومت کو بھی ریلیف ملا ہے، ہم نے ریلوے کو اپنے پاؤں پرکھڑا کرنے کے لیے بڑی محنت کی ہے، ہم سب مایوسی کا شکار ہیں ، اس لیے آپ اگر دو جملے تعریف کے بول دیں۔
چیف جسٹس نے ریمارکس دیے کہ آڈٹ رپورٹ ٹھیک آنے کے بعد تعریف بھی کریں گے، چاہتے ہیں ایسا نظام وضع کرکے جائیں تاکہ بعد میں کوئی من مانی نہ کرسکے۔
عدالت عظمیٰ نے ریلوے کے خسارے کا آڈٹ کراکے 6 ہفتوں میں رپورٹ پیش کرنے کا حکم دیا۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
