لاہور : تحریک انصاف کےچئیرمین عمران خان کا کہنا ہے کہ جوڈیشل کمیشن کا جو بھی نتیجہ ہو گا اس سے جمہوریت آگے بڑھے گی۔
ان خیالات کا اظہار انہوں نے سپریم کورٹ کے باہرمیڈیا سےبات کرتےہوئے کیا، ان کا کہنا تھا کہ اگلے الیکشن صاف و شفاف ہو نگے۔
عمران خان نے کہا کہ حکومت کی چار میں سے ایک وکٹ گرچکی ہے۔ اگلے ایک دو ہفتوں میں دو وکٹیں مزید گرنے والی ہیں, کارکن تیاری کریں بلدیاتی انتخابات سے پہلے عام انتخابات کا اعلان ہو جائے گا۔
انہوں نے کہا کہ این اے 122 کا رزلٹ بھی آنے والا ہے بڑی شدت سے اس کا انتظار کر رہے ہیں۔ عمران خان کا کہنا تھا کہ ثابت کریں گے کہ 2013 کے الیکشن میں منظم دھاندلی ہوئی۔ انتخابات آئین اور قانون کے مطابق نہیں ہوئے ۔
عمران خان کا کہنا تھا کہ کارکن آپس کے اختلافات ختم کردیں۔ کارکن مسلم لیگ نواز سے انتخابات میں مقابلے کی تیاری کریں۔ لوکل گورنمنٹ سے پہلے عام انتخابات ہوں گے۔ لڑتے رہے تو ن لیگ کامیاب ہو جائے گی۔
