راولپنڈی(17 اگست 2025): ٹیکسلا میں سی سی ڈی سے مبینہ پولیس مقابلے میں انتہائی مطلوب اشتہاری ملزم عامر شاہ ہوگیا۔
کرائم کنٹرول ڈیپارٹمنٹ (سی سی ڈی) پولیس کے مطابق موٹر سائیکل سوار ملزمان نے سی سی ڈی ٹیم پر فائرنگ کی، جوابی فائرنگ سے انتہائی مطلوب اشتہاری ملزم عامر شاہ ہلاک اور اس کے ساتھی فرار ہوگئے۔
ترجمان کا کہنا ہے کہ ملزم عامر شاہ راولپنڈی اور سرگودھا میں قتل کے بارہ مقدمات میں انتہائی مطلوب تھا، ملزم نے دینہ کے قریب اے این ایف اہلکاروں کو فائرنگ کر کے قتل کیا تھا، ملزم سوشل میڈیا پر پولیس، قانون نافذ کرنے والے اداروں کے افسران کو دھمکیاں بھی دیتا تھا۔
واضح رہے کہ کرائم کنٹرول ڈیپارٹمنٹ (سی سی ڈی) کو رواں سال میں وزیراعلٰی مریم نواز کی ہدایت پر قائم کیا گیا۔ اس کا مقصد منظم جرائم جیسے ڈکیتی، قتل، زیادتی، قبضہ مافیا، اور گینگسٹر ریکٹ کے خلاف فوری اور موثر کارروائی کرنا ہے۔
سی سی ڈی ساڑھے چار ہزار افسروں اور اہلکاروں پر مشتمل ہے۔ اس کا دائرہ کار تحصیل کی سطح تک پھیلا ہوا ہے۔ جدید ٹیکنالوجی، جیسے ڈرون سرویلنس، اور ڈیٹا مینجمنٹ سسٹم کے ذریعے یہ شعبہ جرائم پر قابو پانے کی کوشش کر رہا ہے۔ تاہم، اس کے قیام کے چند ماہ بعد ہی اس کی کارروائیوں، خاص طور پر پولیس مقابلوں کی تعداد میں اضافہ ہوا ہے۔
سی سی ڈی کی کارروائیوں میں متعدد مشہور جرائم پیشہ افراد ہلاک ہوئے ہیں، جن میں لاہور کے بادامی باغ میں عرفان عرف عفی (65 مقدمات میں مطلوب)، احمد پور شرقیہ میں چھ سالہ بچی سمیرا کے قاتل، اور چارسدہ میں پولیس اہلکار کے قاتل اسماعیل اور حمزہ شامل ہیں۔
ان مقابلوں سے متعلق جو بیان جاری کیا جاتا ہے وہ تقریباً ایک ہی طرح کا ہوتا ہے۔ ’ملزمان کو گرفتار کرنے کی کوشش کے دوران، جب وہ مبینہ طور پر فائرنگ کرتے ہیں، تو جوابی کارروائی میں وہ اپنے ہی ساتھیوں کے فائرنگ سے ہلاک ہو گئے۔‘
