دریائے ستلج کے قریب انتہائی نایاب نسل کا گھڑیال (مگرمچھ) دیکھا گیا ہے، جس کی ویڈیو ایک مقامی شہری نے بنائی ہے۔
تفصیلات کے مطابق دریائے ستلج کے قریب ایک گھڑیال دیکھا گیا ہے، جس کے بارے میں وائلڈ لائف ماہرین کا کہنا ہے کہ مگرمچھ کی یہ نسل انتہائی خطرے سے دوچار ہے، اور اس قیمتی جانور کے تحفظ اور مقامی افراد کو آگاہی فراہم کرنے کی ضرورت ہے۔
ترجمان ڈبیلو ڈبلیو ایف نے کہا گھڑیال کا تعلق مگرمچھ کے خاندان سے ہے، اسے یوں دوبارہ دیکھے جانے کا مطلب ہے کہ پاکستان میں اس نسل کی بحالی کے لیے امید کی ایک کرن موجود ہے۔
ترجمان کے مطابق گھڑیال لمبی اور پتلی تھوتھنی کی وجہ سے پہچانے جاتے ہیں، اس آبی جانور کی خوراک میں مچھلی سمیت دیگر چیزیں شامل ہیں، ایک زمانے میں پاکستان میں دریائے سندھ اور اس سے منسلک ندیوں میں گھڑیال بڑے پیمانے پر پائے جاتے تھے۔
ڈبیلو ڈبلیو ایف ترجمان نے کہا کہ 70 کی دہائی کے وسط تک گھڑیال پاکستان میں معدومیت سے دوچار ہونا شروع ہوئے، اس کی نسل کو شدید نوعیت کے متعدد خطرات کا سامنا ہے، گھڑیال کے مسکن کی تباہی کی وجوہ میں غیر قانونی شکار، درکار مچھلی اور دیگر خوراک کی کمی سمیت دیگر عوامل شامل ہیں۔
