عام طور پر کیلشیم کی کمی ہڈیوں کو کمزور کرنے، پٹھوں میں درد، تھکاوٹ اور دانتوں کے مسائل کا سبب بنتی ہے۔ تاہم جسم میں پیدا ہونے والی 7 علامات کو کبھی نظر انداز نہیں کرنا چاہیے۔
ماہرین صحت کے مطابق اس کی وجوہات میں کیلشیم سے بھرپور غذا نہ کھانا یا وٹامن ڈی کی کمی شامل ہے جبکہ علاج میں متوازن غذا، کیلشیم سپلیمنٹس اور وٹامن ڈی کا استعمال شامل ہے۔
یاد رکھیں ! کیلشیئم مرکزی اعصابی نظام کے متعدد حصوں کے لیے اہم کردار ادا کرنے والا غذائی جز ہے۔
کیلشیئم ہمارے جسم اور صحت کے لیے بہت اہم غذائی جز ہے کیونکہ ہمارا جسم اس منرل کو ہڈیاں اور دانت مضبوط بنانے کے لیے استعمال کرتا ہے جبکہ دل اور دیگر مسلز کے افعال کے لیے بھی اس کی ضرورت ہوتی ہے۔
جب جسم میں کیلشیئم کی کمی ہونا شروع ہوجاتی ہے تو ہڈیوں کی کمزوری سمیت دیگر امراض کا خطرہ بھی بڑھتا ہے۔
جسم میں کیلشیئم کی کمی ہونے پر ابتدا میں عموماً واضح علامات نمودار نہیں ہوتیں، مگر وقت کے ساتھ یہ مسئلہ سنگین ہوجاتا ہے جس کے بعد جو علامات ظاہر ہوتی ہیں وہ درج ذیل ہیں۔
کیلشیئم کی کمی کا سامنا کرنے والے فرد کو مسلز میں تکلیف، اکڑن اور تشنج جیسے مسائل کا سامنا ہو سکتا ہے۔
اسی طرح چلنے کے دوران رانوں اور ہاتھوں میں تکلیف ہوسکتی ہے جبکہ ہاتھوں اور پیروں کے سن ہونے یا سوئیاں چبھنے جیسے احساس کا بھی سامنا ہوتا ہے۔
جسم میں کیلشیئم کی مقدار کم ہونے پر بہت زیادہ تھکاوٹ کا سامنا ہوتا ہے جبکہ ایسا لگتا ہے جیسے جسمانی توانائی ختم ہوگئی ہے۔بہت زیادہ تھکاوٹ کے ساتھ ساتھ سستی، بے خوابی اور سر چکرانے جیسے مسائل کا بھی سامنا ہوتا ہے۔
کیلشیئم کی کمی ہونے پر خشک جِلد، کمزور یا بھربھرے ناخن، سر کے درمیان سے بالوں کے جھڑنے، چنبل اور کھردرے بالوں جیسے مسائل کا سامنا ہوسکتا ہے۔ البتہ ناخنوں پر سفید نشان بننا کیلشیئم کی کمی کی علامت نہیں ہوتی۔
اس کے علاوہ ہماری ہڈیوں کو کیلشیئم کی بہت زیادہ ضرورت ہوتی ہے تاکہ ان کی مضبوطی برقرار رہ سکے مگر جب جسم میں کیلشیئم کی سطح گھٹ جاتی ہے تو ہڈیوں کی کمزوری اور انجری کا خطرہ بڑھتا ہے۔
وقت گزرنے کے ساتھ ساتھ ہڈیوں کی کثافت گھٹ جاتی ہے اور ہڈیوں کے بھربھرے پن کے مرض کا سامنا ہوتا ہے۔اسی طرح ہڈیوں میں بہت زیادہ تکلیف بھی ہونے لگتی ہے۔
کیلشیئم کی کمی کے باعث دانتوں کی کمزوری، مسوڑوں میں خارش، دانتوں کی جڑیں کمزور ہونا اور دانت ٹوٹنے جیسے مسائل کا سامنا ہوتا ہے۔ اور ساتھ ہی انگلیاں سن ہونے یا سوئیاں چبھنے کا احساس پیدا ہوتا ہے۔
اگر جسم میں کیلشیئم کی کمی ہو تو اعصاب پر منفی اثرات مرتب ہوتے ہیں خاص طور پر ہاتھوں اور پیروں کی انگلیوں پر، جن میں اکثر سن ہونے یا سوئیاں چبھنے کا احساس ہوتا ہے۔
کچھ شواہد کے مطابق جسم میں کیلشیئم کی کمی سے ذہنی امراض بشمول ڈپریشن کا خطرہ بڑھتا ہے، ایسی صورتحال میں کسی معالج سے فوری رابطہ کرنا ضروری ہے۔
