ڈھاکہ(20 جولائی 2025): پاکستان اور بنگلا دیش کے درمیان ٹی ٹوئنٹی انٹرنیشنل سیریز کا پہلا میچ آج ہوگا۔
تفصیلات کے مطابق پاکستان اور بنگلا دیش کی کرکٹ ٹیموں کے درمیان تین ٹی ٹوئنٹی میچوں پر مشتمل سیریز کا پہلا مقابلہ آج ڈھاکا کے شیر بنگلا اسٹیڈیم میں ہوگا، سیریز کی ٹرافی کی رونمائی کردی گئی جبکہ گرین شرٹس نے تیاریاں بھی فائنل کرلیں۔
ٹی 20 فارمیٹ میں پاکستان کا بنگلا دیش کے خلاف ریکارڈ کافی شاندار رہا ہے، پاک ٹیم کو بنگال ٹائیگرز کے خلاف 19 جبکہ حریف کو 3 میچز میں کامیابی حاصل ہوئی۔
پاکستان نے گذشتہ باہمی سیریز میں بنگلا دیشی سائیڈ کو لاہور میں ٹی 20 سیریز میں وائٹ واش کیا تھا، اب جوابی سیریز میں بھی اسی کھیل کا سلسلہ برقرار رکھے جانے کا امکان ہے۔
https://urdu.arynews.tv/wcl-2025-pak-india-match-canceled/
پاکستانی کپتان سلمان علی آغا نے کہا کہ بنگلا دیش ہوم گراؤنڈ اور اپنی کنڈیشنز میں اچھی ٹیم ہے، چیلنجز کے بارے میں علم ہے، پوری تیاری کے ساتھ میدان میں اتریں گے۔
واضح رہے کہ آج بارش کی پیش گوئی کی گئی جبکہ سیریز کے بارش سے متاثر ہونے کا خدشہ ہے، اس سے قبل ہفتہ کو ڈھاکہ کے ایک مقامی ہوٹل میں منعقدہ تقریب میں پاکستان اور بنگلہ دیش کے درمیان تین میچوں کی سیریز کی ٹرافی کی رونمائی کی گئی۔
یاد رہے کہ سیریز کے تینوں میچ 20، 22 اور 24 جولائی کو ڈھاکہ کے مشہور شیر بنگلہ نیشنل کرکٹ اسٹیڈیم میں کھیلے جائیں گے۔