کراچی : پاکستان کے سابق کرکٹر اور تجزیہ نگار باسط علی کا کہنا ہے کہ جو کوچ اسلام آباد کی ٹیم نہ بنا سکا وہ پاکستانی ٹیم کیا بنائے گا؟
یہ بات انہوں نے اے آر وائی نیوز کے پروگرام ہر لمحہ پرجوش میں میزبان وسیم بادامی کے سوال کا جواب دیتے ہوئے کہی، انہوں نے کہا کہ بنگلہ دیش سیریز کیلیے بنائے گئے اس قومی ٹی ٹونٹی اسکواڈ کی سلیکشن میں بہت سارے سرپرائزز ہیں۔
باسط علی نے کہا کہ شاداب خان کو جب نیوزی لینڈ کیخلاف وائس کپتان بنایا گیا تھا تو کس کارکردگی کی بنیاد پر بنایا تھا؟ اس کا جواب مجھے کوئی دے سکتا ہے تو ضرور دے۔
انہوں نے کہا کہ اس بار پھر آپ نے اسی کو وائس کپتان بنادیا۔ ایک نیا لڑکا عباس آفریدی جس نے پی ایس ایل میں سب سے زیادہ 17 وکٹیں لیں اس کے علاوہ صفیان مقیم بھی ہے، کہاں ہیں یہ لڑکے؟ صفیان نے تو دکھے دل کے ساتھ ایک پوسٹ بھی شیئر کی تھی۔
باسط علی نے کہا کہ سب سے زیادہ زیادتی سلیکٹرز نے کی ہے، جن میں اظہر اور اسد بھی شامل ہیں اور مجھے حیرت بھی اسی بات کی ہے کہ ماضی میں ان دونوں سلیکٹرز کے ساتھ بھی ایسا ہی ہوا تھا۔
اس موقع پر قومی ٹی ٹونٹی اسکواڈ پر تبصرہ کرتے ہوئے کامران اکمل کا کہنا تھا کہ میرے لیے ٹیم میں حارث رؤف اور نسیم شاہ کا ہونا سرپرائز تھا بلکہ فخر زمان کو بھی آرام دینا چاہیے تھا۔
انہوں نے کہا کہ سلیکٹرز یاسر خان اور خرم شہزاد کو رکھ سکتے تھے، عباس آفریدی اور صفیان مقیم کے ساتھ تو سراسر ناانصافی ہوئی ہے۔
کامران اکمل نے کہا کہ اس ٹیم میں 5 اوپنرز ہیں 8 بیٹسمین ہیں صرف 3 میچوں کیلئے یہ اسکواڈ بنایا گیا ہے یا300 میچز کیلیے
واضح رہے کہ پاکستان کرکٹ بورڈ کی جانب سے بنگلا دیش سے تین میچوں کی ٹی 20 سیریز کے لیے 16 رکنی اسکواڈ کا اعلان کیا گیا ہے جس میں حسن علی، فخر زمان اور صائم ایوب کی واپسی ہوئی جبکہ بابر، رضوان اور شاہین کو ڈراپ کیا گیا ہے۔
ٹی 20 سیریز میں ٹیم کی قیادت سلمان علی آغا کریں گے۔
پاکستانی اسکواڈ میں شاداب خان، فخر زمان، ابرار احمد، فہیم اشرف شامل ہیں، حارث رؤف، حسن علی، حسن نواز، حسین طلعت، خوشدل شاہ، محمد عرفان ، محمد حارث، محمد وسیم جونئیر، صائم ایوب، صاحب زادہ فرحان، اور نسیم شاہ کو بھی اسکواڈ میں شامل کیا گیا ہے۔
https://urdu.arynews.tv/pak-bangladesh-series-pakistani-squad/
