Tag: T20 world cup

ٹی 20 ورلڈ کپ کے فائنل کے لیے قومی ٹیم سڈنی سے میلبرن پہنچ گئی ہے، فائنل اتوار 16 اکتوبر کو پاکستان اور آج انگلینڈ اور بھارت کے میچ کی فاتح ٹیم کے درمیان ہوگا۔

پاکستانی کرکٹ ٹیم ورلڈ کپ 1992 کی تاریخ دہرانے کے لیے سڈنی سے میلبرن پہنچ گئی ہے جہاں وہ ایم سی جی میں 13 اکتوبر کو ٹورنامنٹ کا فائنل کھیلے گی مدمقابل انگلینڈ ہوگا یا بھارت اس کا فیصلہ آج ہوگا۔

قومی ٹیم کل صبح 11 بجے ایم سی جی میں نیٹ سیشن کرے گی، فائنل کے روانگی سے قبل سڈنی کے ہوٹل میں قومی ٹیم کی کامیابی پر کیک بھی کاٹا گیا جب کہ ٹیم جب فائنل معرکے کے لیے روانہ ہوئی تو وکٹ کیپر بلے باز محمد رضوان نے ڈرائیور کی سیٹ پر بیٹھ کر بس چلانے کی اداکاری بھی کی جس پر ٹیم اراکین بہت محظوظ ہوئے۔

یاد رہے کہ پاکستان نے گزشتہ روز سڈنی میں نیوزی لینڈ کو سات وکٹوں سے شکست دے کر فائنل کے لیے کوالیفائی کیا تھا، کپتان بابر اعظم اور محمد رضوان نے سنچری پارٹنر شپ فراہم کی جس کے باعث فائنل کے لیے سفر ممکن ہوا، دونوں بلے بازوں نے نصف سنچریاں اسکور کی تھیں۔

دوسری جانب شائقین کرکٹ کے لیے بری خبر ہے کہ اتوار کو میلبرن میں کھیلا جانے والا ٹی ٹوئنٹی ورلڈ کپ کا فائنل میچ بارش سے متاثر ہونے کا اندیشہ ہے۔

یہ بھی پڑھیں: ٹی 20 ورلڈ کپ کا فائنل بارش سے متاثر ہونے کا خدشہ

آسٹریلوی محکمہ موسمیات نے اس روز میلبرن میں بارش کی پیشگوئی کی ہے، میچ کے لیے ریزرو ڈے رکھا گیا ہے، اگر بارش کے باعث اتوار کو میچ مکمل نہ ہوسکا تو پیر کو ریزرو ڈے پر میچ مکمل کیا جائے گا۔

ٹی 20 ورلڈ کپ کا اتوار کو میلبرن میں ہونے والا فائنل بارش سے متاثر ہونے کا خدشہ ہے، آسٹریلوی محکمہ موسمیات نے 13 نومبر کو بارش کی پیشگوئی کی ہے۔

اتوار 13 نومبر کو ورلڈ ٹی 20 کا فائنل بارش سے متاثر ہونے کا اندیشہ ہے، آسٹریلوی محکمہ موسمیات نے اس روز میلبرن میں بارش کی پیشگوئی کی ہے، میچ کے لیے ریزرو ڈے رکھا گیا ہے، اگر بارش کے باعث اتوار کو میچ مکمل نہ ہوسکا تو پیر کو ریزرو ڈے پر میچ مکمل کیا جائے گا۔

میچ مکمل کرنے کے لیے کم از کم دونوں ٹیموں کا 5 اوورز کا کھیل ہونا لازمی ہے، اگر اتوار کو10 ،10 اوورز کا کھیل نہ ہوسکا تو ہی میچ ریزرو ڈے پر جائے گا۔

ریزرو ڈے میں میچ وہیں سے شروع ہوگا جہاں بارش کے باعث رکا ہوگا، اگر دوسرے روز بھی بارش نے میچ مکمل نہ ہونے دیا تو دونوں فائنلسٹ مشترکہ چیمپئن ہوں گے۔

یاد رہے کہ میلبر میں جاری ٹی 20 ورلڈ کپ کے تین میچز بارش کی وجہ سے منسوخ ہوچکے ہیں، تاہم آسٹریلیا کا موسم آخری لمحات میں بدل جانے کی وجہ سے مشہور ہے، گزشتہ ماہ پاک بھارت میچ میں بھی بارش کی پیشگوئی تھی لیکن اس روز موسم صاف رہا تھا اور میچ بغیر کسی تعطل کے مکمل ہوا تھا۔

واضح رہے کہ ٹی 20 ورلڈ کپ کا فائنل اتوار کو میلبرن میں کھیلا جائے گا، فائنل میچ میں کون پاکستان کے مدمقابل ہوگا اس کا فیصلہ آج انگلینڈ اور بھارت کے مابین سیمی فائنل میچ کے بعد ہوگا۔

پاکستان گزشتہ روز سڈنی میں کھیلے گئے سیمی فائنل میں نیوزی لینڈ کو 7 وکٹوں سے شکست دے کر فائنل میں پہنچنے والی پہلی ٹیم بنی تھی۔

ٹی 20 ورلڈ کپ میں پاکستان اور نیوزی لینڈ کے مابین کل سیمی فائنل کھیلا جائے گا ریکارڈ دیکھیں تو اب تک تمام فارمیٹ کے عالمی کپ میں کیویز شاہینوں کو زیر نہیں کرسکے ہیں۔

آسٹریلیا میں جاری ٹی 20 ورلڈ کپ کی ٹرافی اب تین میچز کے فاصلے پر ہے اور چار ٹیمیں اس کے حصول کے لیے میدان میں ہیں، ٹورنامنٹ کا پہلا سیمی فائنل کل سڈنی میں پاکستان اور نیوزی لینڈ کے مابین کھیلا جائے گا ماضی کے ریکارڈ یہ بتاتے ہیں کہ کسی بھی فارمیٹ کے آئی سی سی ٹورنامنٹ کے سیمی فائنل میں کیویز پاکستانی شاہینوں کو بلند پرواز سے نہیں روک سکے ہیں شاہینوں نے جھپٹا مار کر ان کا شکار کیا ہے۔

ریکارڈ کھنگالیں تو پاکستان اور نیوزی لینڈ کا کسی بھی ورلڈ کپ کے سیمی فائنل میں پہلا مقابلہ 1992 کے ورلڈ کپ میں ہوا تھا جی ہاں یہ وہی ٹورنامنٹ ہے جس کی ٹرافی پاکستان نے اٹھائی تھی۔

نیوزی لینڈ اس ٹورنامنٹ میں پاکستان کے مدمقابل آنے سے قبل ناقابل شکست تھا اور دنیا کی 7 بہترین ٹیموں کو ہرا چکا تھا لیکن پاکستان نے پہلے گروپ میچ میں کیویز کا شکار کیا پھر سیمی فائنل میں 4 وکٹوں سے شکست سے دوچار کرکے فائنل میں رسائی حاصل کی تھی۔

اس میچ میں کیوی کپتان آنجہانی مارٹن کرو کے 91 اور کین ردر فورڈ کے 50 رنز کی بدولت نیوزی لینڈ نے 7 وکٹوں پر 262 رنز بنائے تھے، پاکستان کی جانب سے وسیم اکرم اور مشتاق احمد نے دو دو کھلاڑیوں کو آؤٹ کیا تھا، پاکستان نے مطلوبہ 268 رنز کا ہدف ایک اوور قبل حاصل کرلیا، میچ کے ہیرو نوجوان انضام الحق تھے جنہوں نے 60 رنز کی شاندار اننگ کھیلی جب کہ مرد بحران جاوید میانداد 57 رنز کے ساتھ ناٹ آؤٹ رہے تھے۔

ون ڈے فارمیٹ کے ورلڈ کپ 1999 میں پاکستان اور نیوزی لینڈ ایک بار پھر سیمی فائنل میں ایک دوسرے کے مدمقابل آئے لیکن نتیجہ 92 کے سیمی فائنل جیسا ہی تھا، یہاں گرین شرٹس نے 9 وکٹ سے فتح پائی۔

اولڈ ٹریفورڈ میں کھیلے جانے والے میچ میں نیوزی لینڈ نے 7 وکٹ پر 241 کا مجموعہ حاصل کیا، روجر ٹوز 46 رنز بنا کر نمایاں رہے پاکستان کے شعیب اختر نے 3 وکٹیں اڑائیں، پاکستان نے یہ ہدف صرف ایک وکٹ پر 15 بالز قبل عبور کرلیا، سعید انور 113 پر ناٹ آؤٹ رہے۔

جب ٹی 20 فارمیٹ شروع ہوا تو اس کے عالمی کپ کے دوسرے ایڈیشن میں 2009 کے سیمی فائنل میں گرین شرٹس اور کیویز کا جوڑ پڑا جو مختصر فارمیٹ میں پہلی بار جب کہ آئی سی سی کے کسی بھی ٹورنامنٹ کے سیمی فائنل میں تیسرا مقابلہ تھا۔

کیپ ٹاؤن میں کھیلے گئے اس میچ میں نیوزی لینڈ نے پاکستان کو جیت کے لیے 144 رنز کا ہدف دیا، پاکستان نے یہ ہدف 7 گیندیں قبل ہی حاصل کرلیا، عمران نذیر نے جارحانہ ففٹی سے فتح کا سفر آسان کیا۔

سیمی فائنل سے قطع نظر اگر دونوں ٹیموں کے درمیان ٹی 20 انٹرنیشنل میچز کا ریکارڈ دیکھا جائے تو یہاں بھی پاکستان کا پلڑا بھاری دکھائی دیتا ہے۔

اب تک پاکستان اور نیوزی لینڈ مختصر فارمیٹ کے کرکٹ مقابلوں میں 28 بار ایک دوسرے کے مدمقابل آچکے ہیں جن میں سے پاکستان نے 17 جب کہ نیوزی لینڈ نے 11 میچز جیتے ہیں۔

ٹی 20 ورلڈ کپ کا سیمی فائنل کھیلنے کے لیے پاکستانی ٹیم سڈنی پہنچ گئی، قومی ٹیم نے وہاں پہنچ کر آرام کو ترجیح دی جب کہ کپتان بابر اعظم نے تنہا پریکٹس کی۔

ٹی وی رپورٹ کے مطابق آسٹریلیا میں جاری ٹی 20 ورلڈ کپ کا پہلا سیمی فائنل کل سڈنی کرکٹ گراؤنڈ میں پاکستان اور نیوزی لینڈ کے مابین کھیلا جائے گا، قومی ٹیم گزشتہ روز سڈنی پہنچی تاہم اس نے آرام کرنے کو ترجیح دی۔

پاکستانی ٹیم نے سیمی فائنل سے قبل گراؤنڈ میں کرکٹ سیشن نہیں کیا تاہم قومی کپتان بابر اعظم نے تنہا بیٹنگ پریکٹس کی، ان کی اس پریکٹس کے دوران مینٹو میتھیو ہیڈن بھی موجود تھے۔

کپتان بابر اعظم نے ڈیڑھ گھنٹے بیٹنگ کی پریکٹس کی۔

واضح رہے کہ پاکستان کرکٹ کی حالیہ کامیابیوں میں اہم کردار ادا کرنے والے کپتان بابر اعظم ان دنوں آؤٹ آف فارم ہیں اور ان کا بلا ٹی 20 ورلڈ کپ میں اب تک خاموش ہے۔

پاکستان کرکٹ ٹیم کے مینٹور میتھیو ہیڈن نے کہا ہے کہ کپتان بابر اعظم ایک اسپیشل کھلاڑی ہے حیران نہ ہوں جب وہ بڑے میچوں میں کچھ کر دکھائے۔

قومی کرکٹ ٹیم کے مینٹور میتھو ہیڈن نے سڈنی میں ٹی 20 ورلڈ کپ کے پاک نیوزی لینڈ سیمی فائنل سے قبل پریس کانفرنس کرتے ہوئے کہا ہے کہ پاکستانی ٹیم کی بڑے میچوں میں شاندار واپسی ہوتی ہے اور کپتان بابر اعظم ایک اسپیشل کھلاڑی ہے، دنیا حیران نہ ہو جب وہ بڑے میچوں میں کچھ کر دکھائے۔

میتھو ہیڈن نے مزید کہا کہ میڈیا 92 ورلڈ کپ والی صورتحال سے مماثلت کی باتیں کر رہا ہے، آسٹریلیا میں اگر کوئی گراؤنڈ برصغیر کی ٹیموں کو سوٹ کرتا ہے تو وہ سڈنی ہے، جب سیمی فائنل میں پہنچے تو شاداب خان نے کہا ویلکم ٹو پاکستان کرکٹ۔

سابق جارح مزاج آسٹریلوی بلے باز نے کہا کہ نیوزی لینڈ کا بولنگ اٹیک خطرناک اور تجربہ کار ہے، کیوی ٹیم نے اسی گراؤنڈ پر آسٹریلیا کو شکست دی، ساؤتھی میرے ساتھ کھیلا ہے اس سے اس کے تجربے کا اندازہ لگائیں۔

مینٹور پاکستانی ٹیم کا کہنا تھا کہ ٹی 20 صرف پاور کا کھیل نہیں اس میں جدت بھی کرنی پڑتی ہے، آسٹریلیا کے پاس پاور ہے لیکن وہ نئی بال سے ناکام ہوئے۔

واضح رہے کہ ٹی ٹوئنٹی ورلڈ کپ کا پہلا سیمی فائنل کل پاکستان اور نیوزی لینڈ کے مابین سڈنی کرکٹ گراؤنڈ میں کھیلا جائے گا، میچ پاکستانی وقت کے مطابق دوپہر ایک بجے شروع ہوگا۔

نیوزی لینڈ کرکٹ ٹیم کے کپتان کین ولیمسن نے کہا ہے کہ کل پاکستان کے خلاف سیمی فائنل میں کون سی ٹیم فیورٹ ہے کہنا مشکل ہے۔

آسٹریلیا کے سڈنی کرکٹ گراؤنڈ میں ٹی 20 ورلڈ کپ کے سیمی فائنل میں کل پاکستان اور نیوزی لینڈ مدمقابل ہوں گے، اس ناک آؤٹ میچ سے قبل کیوی کپتان نے میڈیا سے گفتگو کرتے ہوئے کہا ہے کہ سیمی فائنل میں کون فیورٹ ہے کہنا مشکل ہے لیکن پاکستانی ٹیم دنیا کی ایک ایسی ٹیم ہے جو کسی بھی وقت سب کو حیران کر سکتی ہے۔

کین ولیمسن کا کہنا تھا کہ پاکستان ایک مضبوط ٹیم ہے اور اس کا پیس اٹیک بہت اچھا ہے، دونوں ٹیموں نے ایونٹ میں اچھی کرکٹ کھیلی ہے۔

کیوی کپتان کا مزید کہنا تھا کہ ہمارے کھلاڑی کنڈیشن سے ہم آہنگ ہیں، سڈنی میں آسٹریلیا کے خلاف میچ میچ میں اچھی وکٹ تھی لیکن دوسرے میچ میں مختلف تھی، ٹی ٹوئنٹی کرکٹ کی خاصیت ہے کہ وہ جھٹ پٹ بدل جاتی ہے۔

یاد رہے  کہ پاکستان اور نیوزی لینڈ کے مابین کل ٹی 20 ورلڈ کپ کا میچ سڈنی کرکٹ گراؤنڈ میں پاکستانی وقت کے مطابق دوپہر ایک بجے شروع ہوگا۔