لاہور(17 اگست 2025): پاکستان کے سلیکٹر اور سابق فاسٹ بولر عاقب جاوید نے اسٹار بلے باز بابر اعظم اور وکٹ کیپر بلے باز محمد رضوان کی ٹی ٹوئنٹی اسکواڈ میں نہ ہونے کہ وجہ بتادی۔
متحدہ عرب امارات میں ہونے والی تین ملکی ٹی ٹوئنٹی سیریز اور ایشیا کپ کے لیے پاکستانی اسکواڈ کا اعلان کردیا گیا، 17 رکنی اسکواڈ کا اعلان سلیکٹر اور ڈائریکٹر ہائی پرفارمنس عاقب جاوید اور ہیڈ کوچ مائیک ہیسن نے پریس کانفرنس میں کیا۔
اسکواڈ کے اعلان کے بعد عاقب جاوید نے میڈیا کانفرنس سے خطاب کرتے ہوئے کہا کہ قومی ٹیم میں مواقع کارکردگی کی بنیاد پر ہوتے ہیں، مستقل مزاجی اور کھلاڑیوں کو ان کی فارم کی بنیاد پر مواقع دیئے جاتے ہیں۔
ٹرائی سیریز اور ایشیا کپ کیلیے اسکواڈ کا اعلان، بابر اور رضوان آؤٹ
عاقب نے کہا کہ بابر اعظم اور محمد رضوان پچھلی تین سیریز کا حصہ نہیں تھے جبکہ ان کی جگہ صائم، فخر اور صاحبزادہ فرحان ٹاپ آرڈر میں شامل ہیں اور اوپننگ کررہے ہیں۔
عاقب جاوید نے کہا کہ بابر اور رضوان دیگر کھلاڑیوں کی طرح کھیلیں گے تو ضرور ٹی ٹوئنٹی کھیلیں گے، ان کے ساتھ کسی کو پرابلم نہیں ہے لیکن اس وقت ہمارے پاس آپشنز اچھے ہیں۔
عاقب جاوید کا کہنا تھا کہ صائم ، فخر اور صاحبزادہ فرحان ہی ٹاپ آرڈر میں تھے، کسی کھلاڑی کو دو تین میچز کی بنیاد پر زیر غور نہ لانے والی بات درست نہیں، ہم یہ نہیں کہہ سکتے کہ اب ہم بابر اور رضوان کو زیر غور کبھی نہیں لائیں گے۔
ہیڈ کوچ مائیک ہیسن کا کہنا تھا کہ بابر اعظم کو اسپنرز کے خلاف اپنی ٹیکنیک بہتر کرنے کا کہا گیا ہے اور وہ اس پر کام کر رہے ہیں۔
واضح رہے کہ پاکستان، افغانستان اور یو اے ای کی ٹرائی نیشن سیریز 29 اگست سے 7 ستمبر تک شارجہ میں ہو گی جب کہ ایشیا کپ 9 سے 28 ستمبر تک ابو ظہبی اور دبئی میں منعقد ہو گا۔
