جڑانوالہ: پاکستان علما کونسل کے چیئرمین علامہ طاہر اشرفی نے کہا ہے کہ اب ملک میں دہشت اور وحشت نہیں چلے گی، جڑانوالہ واقعے پر 20 رکنی کمیٹی بنانے کا فیصلہ کیا ہے، دنیا بھر کی مسیحی برادری سے معافی مانگتا ہوں۔
تفصیلات کے مطابق چیئرمین پاکستان علما کونسل نے جڑانوالہ کا دورہ کیا اور متاثرہ مسیحی خاندانوں سے ملاقات کے بعد پریس کانفرنس کی، جس میں انھوں نے کہا کہ اسلام کسی مذہب کی توہین کی اجازت نہیں دیتا، جو کچھ جڑانوالہ میں ہوا وہ ناقابل بیان ہے، تاریخ میں کبھی اس طرح کی وحشت نہیں دیکھی۔
علامہ طاہر اشرفی نے کہا ہمیں سپہ سالار کے بیان سے امید پیدا ہوئی، اور جسٹس قاضی فائز عیسیٰ کے دورے سے اچھا پیغام گیا، میں جسٹس قاضی فائز عیسیٰ سے کہتا ہوں کہ آپ کے دورے سے ہمارے حوصلے بلند ہوئے، ہم ان کے بیان کی مکمل حمایت کرتے ہیں۔
علامہ نے کہا یہ مسیحیوں پر نہیں پاکستان پر حملہ ہے، امید ہے کہ مستقبل میں ایسے واقعات کے سدباب کے لیے قانون سازی ہوگی، کسی فرد یا جتھے کو امن سے نہیں کھیلنے دیں گے۔
قبل ازیں، نامزد چیف جسٹس پاکستان جسٹس قاضی فائز عیسیٰ نے اہلیہ کے ہمراہ جڑانوالہ کا دورہ کیا اور کرسچن کالونی میں جلائے گئے چرچز اور گھروں کا جائزہ لیا، متاثرہ مسیحی خاندانوں سے ملاقات کی اور انھیں ہر ممکن تعاون کا یقین دلایا۔
انھوں نے اپنے بیان میں کہا کہ جڑانوالہ میں پاکستان کے آئین اور قانون کو پامال کیا گیا، آئین کی پامالی سنگین غداری ہے، حملہ کرنے والوں نے قرآن کے احکامات کی خلاف ورزی کی ہے، مذہبی جذبات کو مجروح کرنے کی سزا دس سال قید اور جرمانہ ہے۔
