ممبئی: بھارتی سورما اپنی فلموں میں پاکستانی نغمے اور قوالیاں چرانے سے باز نہیں آئے اور انہوں نے نئی آنے والی بالی ووڈ فلم میں شہر آفاق قوالی ’تاجدار حرم‘ کے حسن کو بگاڑ کر پیش کیا۔
تفصیلات کے مطابق صابری برادران غلام فرید اور مقبول صابدی مرحوم نے شہر آفاق قوالی ’تاجدار حرم‘ پڑھی جسے امجد صابری نے بھی منفرد انداز سے پیش کیا اور پھر اس کلام نے دنیا بھر میں مقبولیت حاصل کی۔
تاجدار حرم اُس وقت نوجوانوں میں زیادہ مقبول ہوئی کہ جب اسے کوک اسٹوڈیو میں عاطف اسلم نے جدید انداز سے گایا۔
ویڈیو دیکھیں: تاجدار حرم دنیا بھر میں مقبول ترین پاکستانی قوالی بن گئی
بھارتی میوزک ڈائریکٹرز نے قوالی کو بالی ووڈ کی نئی آنے والی فلم میں شامل کرنے کا فیصلہ کیا اور تاجدار حرم کو بہت ہی بھونڈے انداز میں کمپوز کیا، اس نئی کمپوزنگ کو جان ابراہم کی نئی آنے والی فلم ’ستیا موا جیاتے‘ میں شامل کیا گیا ہے۔
بالی ووڈ کے شاطر میوزک اور فلم ڈائریکٹر نے نہ صرف اس قوالی کے حسن کو گہنایا بلکہ الفاظ تبدیل کیے، اس اقدام کا مقصد ’تاجدار حرم‘ کا سہرا خود لینا تھا البتہ اُن کی یہ کوشش ناکام ہوگئی۔
واضح رہے کہ ملاپ زویری کی ہدایات کاری میں بنائی جانے والی فلم میں عاطف اسلم کی آواز میں بھی ایک گانا شامل کیا گیا ہے جبکہ اس میں جان ابراہم ، کھنویکار، منوج باچپائی مرکزی کردار ادا کررہے ہیں۔
